މާލެއާއި ހުޅުމާލޭގެ ފެނުގެ ވިއުގަ ގުޅާލުމުގެ މަސައްކަތް 2025 ގެ ކުރީކޮޅު ނިމޭނެ-އެމްޑީ ޢަބްދުލްމަތީން މުޙައްމަދު

މާލެއާއި ހުޅުމާލޭގެ ފެނުގެ ވިއުގަ ގުޅާލުމުގެ މަސައްކަތް 2025 ވަނަ އަހަރުގެ ކުރީކޮޅު ނިމޭނެ ކަމަށް މޯލްޑިވްސް ވޯޓަރ އެންޑް ސުވަރޭޖް ކޮމްޕެނީ (އެމްޑަބްލިއުއެސްސީ) ގެ މެނޭޖިން ޑިރެކްޓަރ ޢަބްދުލްމަތީން މުޙައްމަދު  ވިދާޅުވެއްޖެއެވެ.

ޕީއެސްއެމް ނިއުސްގެ ރާއްޖެމިއަދު ޕްރޮގްރާމްގައި ވާހަކަދައްކަވަމުން މަތީން ވިދާޅުވީ، މި މަޝްރޫޢު މިހާތަނަށް ލަސްވެފައިވަނީ ވޭތުވެދިޔަ ސަރުކާރުތަކުން ޕަމްޕް ސްޓޭޝަން ހަދަން ބިން ހަމަޖައްސާފައި ނުވާތީ ކަމަށެވެ. ނަމަވެސް މިހާރު އެ މައްސަލަ ޙައްލުކޮށް، ޕަމްޕް ސްޓޭޝަންގެ މަސައްކަތް ބާރު ދުވެލީގައި ކުރިއަށްދާ ކަމަށް އޭނާ ވިދާޅުވިއެވެ.

ހައެއްކަ އަހަރު ވޭތުވެދިޔައިރު ޕަމްޕް ސްޓޭޝަނަށް ބިން ހަމަޖައްސާފައެއް ނެތް. އެތައް އަހަރެއް އެދިޔައީ މަސައްކަތް ނުނިމި. އެކަމަކު މިހާރު ބިން ހަމަޖައްސާ ޕަމްޕް ސްޓޭޝަންގެ މަސައްކަތް އެ ދަނީ ބާރަށް ކުރިއަށް

މެނޭޖިން ޑިރެކްޓަރ ޢަބްދުލްމަތީން މުޙައްމަދު 

މާލެއާއި ހުޅުމާލޭގެ ފެނުގެ ވިއުގަ ގުޅާލުމަށް ބޭނުންވާ މައި ނެޓްވޯކް އެޅުމުގެ މަސައްކަތްތައް ކޮށްފައިވަނީ 2018 ވަނަ އަހަރު، ސިނަމާލެ ބްރިޖްގެ މަސައްކަތާއެކުގައެވެ. މި މަޝްރޫޢަކީ އެމްޑަބްލިއުއެސްސީގެ "ވޯޓަރ ސެކިއުރިޓީ ޕްލޭން" ގެ ދަށުން 2016 ވަނަ އަހަރު ފެށި މަސައްކަތެކެވެ.

މި ނިޒާމު ޤާއިމުކުރުމުން، ގަޑިއަކު 800 ޓަނުގެ ފެން ދައުރުކުރެވޭނެއެވެ. އަދި މާލެ ނުވަތަ ހުޅުމާލެއިން ފެން ކެނޑޭ ޙާލަތުގައި ވަގުތުން އެއް ރަށުން އަނެއް ރަށަށް ފެން ފޯރުކޮށްދެވޭނެއެވެ. މާލެ ސަރަޙައްދުގައި އިތުރުވަމުން އަންނަ އާބާދީއާއެކު މި ޚިދުމަތަކީ، ފެނުގެ ރައްކާތެރިކަން އިތުރުކުރުމަށް މުހިންމުވެފައިވާ މަޝްރޫޢުއެކެވެ.