ދުނިޔެ
ޣައްޒާގެ ހާލަތު ވަނީ އެއްވެސް މީހަކަށް ސިފަކުރެވޭވަރަށްވުރެ ބޮޑަށް ގޯސްވެފަ

ޣައްޒާގެ ޓެންޓުތައް ހުންނަ ސަރަޙައްދެއްގައި ފެންބޮޑުވެފަ ފޮޓޯ: އިންޓަނެޓް
ޣައްޒާގެ ގިނަ އާބާދީއެއް މިހާރު ދިރިއުޅެމުންދަނީ ވަގުތީ ކޭމްޕްތަކުގައި ކަމަށް ވާއިރު، ފާއިތުވި 14 މަސްދުވަހު އެމީހުން ބޭނުންކުރަމުން އައި ޓެންޓުތައް ފިނިކަމުން ރައްކާތެރިވުމަށް އެކަށީގެންވާ ވަރަށް ރަނގަޅު ނޫންކަން ހާމަކޮށްފިއެވެ. ޣައްޒާ ހެލްތު މިނިސްޓްރީން ބުނާ ގޮތުގައި ފިނިކަމުގެ ސަބަބުން މިއަދު މަރުވެފައިވާ ފަލަސްޠީނު މީހުންގެ އަދަދު މިހާރު ވަނީ 7 އަށް އަރާފައެވެ.
މި ޚަބަރު ފެތުރެމުންދާއިރު، ގިނަ މައިންބަފައިން ތިބީ އެމީހުންގެ ކުޑަކުދިން މަރުވެދާނެކަމުގެ ބިރުވެރިކަމުގައެވެ. އެމީހުން ވީހާވެސް ބޮޑަކަށް ކުދިން ރައްކާތެރިކުރަން މަސައްކަތްކުރަމުންދާއިރު، ފާއިތުވި 15 މަސްދުވަހުގެ ތެރޭގައި އެތައް ފަހަރެއްގެ މަތިން ގެދޮރު ދޫކޮށް ދާންޖެހިފައިވާ މައިންބަފައިންނަށް އެމީހުންގެ ކުދިންނަށް ފިނި މޫސުމަށް އެކަށޭނަ އަންނައުނާއި ބްލެންކެޓް ގަތުމުގެ ޤާބިލުކަމެއް ނެތެވެ.
ޣައްޒާގެ ބޮޑު އާބާދީއެއް މިހާރު ބަރޯސާވެފައިވަނީ އެހީގެ މައްޗަށެވެ. ޚާއްޞަކޮށް ފިނި މޫސުމުގެ އަންނައުނާއި، ޓެންޓާއި، ޓާޕޯލިންފަދަ ތަކެއްޗަށެވެ. ނަމަވެސް، ގިނަ މީހުންނަށް މިފަދަ ތަކެއްޗާއި ކާބޯތަކެތި އެހީގެ ގޮތުގައި ނުލިބެއެވެ.
ގިނަ ކުދިން ދުވާލަކު އެއްފަހަރު ކާއިރު، ކެއުމުން ހަށިގަނޑަށް ހޫނުކަން ލިބޭކަން އެނގެއެވެ.މަންމައަކު ބުނި ގޮތުގައި އޭނާގެ ކުދިންނަށް ހޫނުކަން ދެވޭ ހަމައެކަނި ގޮތަކީ އެކުދިންނާ ގައިގޯޅިވެ އޮތުމެވެ. އެއީ އެމީހުންގެ އަތުގައި ރަޖާ ނެތުމުންނެވެ.
ޣައްޒާގެ ހާލަތު މިހާރު ވަނީ އެއްވެސް މީހަކަށް ސިފަކުރެވޭވަރަށްވުރެ ބޮޑަށް ގޯސްވެފައެވެ. ފަލަސްޠީނު މޫސުމާބެހޭ އިދާރާއިން ލަފާކުރާ ގޮތުގައި މިއަދު މުޅި ސަރަޙައްދުގައި ވާރޭވެހި، ގުގުރާނެކަމަށް ބެލެވެއެވެ. އަދި ފިނިކަން ދެމިހުންނާނެކަމަށް ވަފާ ނިއުސް އޭޖެންސީން ރިޕޯޓުކޮށްފައިވެއެވެ.
މޫސުން ގޯސްވާނެކަން ލަފާކޮށްފައިވަނީ ރޭގަނޑު ބޯކޮށް ވެހުނު ވާރޭގެ ސަބަބުން ދެކުނާއި މެދު ގާޒާގައި ފެންބޮޑުވެފައިވާކަމަށް ކުއްލި ޙާލަތުގެ މަސައްކަތްތެރިން ރިޕޯޓުކޮށްފައިވަނިކޮށެވެ.
ވަފާއިން މޫސުމާބެހޭ އިދާރާއާ ހަވާލާދީ ބުނެފައިވާ ގޮތުގައި ބުދަ ދުވަހު މޫސުން ރަނގަޅުވާނެކަމަށް ލަފާކުރެވެއެވެ.