ޢިއްޒުއްދީން ފާލަމުގެ އޯވަހެޑް ސްޓްރަކްޗާގެ މަސައްކަތް ނިމިއްޖެ

މާލޭގެ ރަސްމީ ފާލަން ކަމުގައިވާ ޢިއްޒުއްދީން ފާލަން އަލުން ތަރައްގީކުރުމުގެ މަޝްރޫޢުގެ ދަށުން އެ ފާލަމުގެ އޯވަހެޑް ސްޓްރަކްޗާގެ މަސައްކަތް ނިމިފައިވާ ކަމަށް މޯލްޑިވްސް ޓްރާންސްޕޯޓް އެންޑް ކޮންޓްރެކްޓިން ކޮމްޕެނީ (އެމްޓީސީސީ) އިން ބުދަ ދުވަހު ހާމަކޮށްފިއެވެ.

އެމްޓީސީސީން ވިދާޅުވި ގޮތުގައި، ޢިއްޒުއްދީން ފާލަން އަލުން ތަރައްގީކުރަން ފަށާފައިވަނީ އެ ފާލަން މަރާމާތުނުކޮށް ގިނަ ދުވަސްތަކެއްވެ، ވަރަށް ބޮޑަށް ވީރާނާވެފައި އޮތުމުންނެވެ. މި މަޝްރޫޢުގެ ދަށުން ކުރިން ހުރި ފާލަން ރޫޅާލުމަށްފަހު، މިހާރު ތަރައްގީކުރަމުންދަނީ ދިވެހީންގެ ޤައުމިއްޔަތާއި ސަޤާފަތް ރަމްޒުކޮށްދޭ، ގިނަ ދުވަހު ބޭނުންކުރެވޭފަދަ ފެންވަރު ރަނގަޅު ފާލަމެކެވެ.

މަސައްކަތަށް ބޭނުންވާ ތަކެތި ލިބުމުގައި ދަތިތަކެއް ދިމާވެ މަސައްކަތް ކުރިން މަޑުޖެހުނު ނަމަވެސް، މިހާރު ތަކެތި ލިބި ހަލުވި ދުވެލީގައި މަސައްކަތް ކުރިއަށްދާ ކަމަށް އެމްޓީސީސީން ފާހަގަކުރެއްވިއެވެ. ފާލަން ހެދުމުގައި ލަސްތަކެއް ދިމާވެފައިވަނީ، ވީރާނާނުވެ ގިނަ ދުވަހު ދެމެހެއްޓޭނެފަދަ ތަނަކަށް ހެދުމަށް ބޭނުންވާ ޚާއްޞަ ސާމާނު ބޭރުން ގެނައުމުގައި ލަސްތަކެއް ދިމާވުމުންނެވެ.

މިހާރު ފާލަމުގެ އޯވަހެޑް ސްޓްރަކްޗަރ ފްރޭމްގެ މަސައްކަތް ނިންމާފައިވާ ކަމަށާއި، ފުރާޅުގައި ޝިންގަލްސް ހަރުކޮށް، ސީލިންގް ފްރޭމްވޯކްގެ މަސައްކަތް ކުރަމުންދާ ކަމަށް އެމްޓީސީސީން ހާމަކުރެއްވިއެވެ.

ޢިއްޒުއްދީން ފާލަން ތަރައްގީކުރުމުގައި ބޭނުންކުރަނީ ތިމާވެއްޓާ ރައްޓެހި، ވީހާވެސް މަދުން މަރާމާތުގެ މަސައްކަތް ކުރަންޖެހޭ، ލޮނުފެނާއި އަވި އަދި ގަދަ ވާރޭގައިވެސް ގިނަ ދުވަހު ހަލާކުނުވެ ހުންނާނެ ފަދަ ޒަމާނީ، ފެންވަރު ރަނގަޅު ތަކެތިކަން އެމްޓީސީސީން ފާހަގަކުރެއްވިއެވެ.

ރަސްމީ ފާލަން އަލުން މަރާމާތުކޮށް އައު ޑިޒައިނަކަށް ހެދުމަށް އެމްޓީސީސީއާ ހަވާލުކޮށްފައިވަނީ ޑިޒައިން އެންޑް ބިލްޑް އުސޫލުން 11.7 މިލިއަން ރުފިޔާއަށެވެ. މި ފާލަން ފަރުމާކުރުމުގައި ރާއްޖޭގެ ސަގާފަތާއި ދިވެހީންގެ އަމިއްލަވަންތަކަން ދައްކުވައިދިނުމަށް ޚާއްޞަ އިސްކަމެއް ދެވިފައިވާ ކަމަށް އެމްޓީސީސީން ވިދާޅުވިއެވެ.