ދުނިޔެ

ކޮވިޑް-19ގެ އަސްލު ހޯދުމަށް ޗައިނާއިން މަޢުލޫމާތު ހިއްސާކުރުމަށް ޑަބްލިއު.އެޗް.އޯއިން ގޮވާލައިފި

ކޮވިޑް-19ގެ އަސްލު ހޯދުމަށް ޗައިނާއިން މަޢުލޫމާތު ހިއްސާކުރުމަށް ޑަބްލިއު.އެޗް.އޯއިން ގޮވާލައިފި

ކޮވިޑް 19 އަށް ޓެސްޓުކުރުން ފޮޓޯ:އިންޓަނެެޓް

އާމިނަތު ޔުމްނާ

އާމިނަތު ޔުމްނާ

31 ޑިސެމްބަރު 2024، 01:37

31 ޑިސެމްބަރު 2024، 01:37

ވުހާން ސިޓީގައި ކޮވިޑް-19 ފެތުރެން ފެށިތާ ފަސް އަހަރު ފުރުނު މުނާސަބަތުގައި، މި ބަލީގެ އަސްލު ދެނެގަތުމަށްޓަކައި ޗައިނާއިން މަޢުލޫމާތު ހިއްސާކުރުމަށް ވޯލްޑް ހެލްތު އޯގަނައިޒޭޝަން (ޑަބްލިއު.އެޗް.އޯ) އިން ގޮވާލައިފިއެވެ.

2019 ވަނަ އަހަރުގެ ޑިސެމްބަރު 31 ވަނަ ދުވަހު، ވުހާން ސިޓީގެ ސިއްހީ އިދާރާތަކުން ނެރުނު ބަޔާނެއްގައި "ނިއުމޯނިއާ" ގެ ކޭސްތަކެއް ފާހަގަކުރެވުނު ކަމަށް ޑަބްލިއު.އެޗް.އޯގެ ޗައިނާ އޮފީހުން ބުނެފައިވެއެވެ. އޭގެ ތިން ހަފްތާއެއްހާ ދުވަސް ފަހުން، 11 މިލިއަން މީހުން ދިރިއުޅޭ މި ސިޓީ ޗައިނާގެ އިދާރާތަކުން ބަންދުކުރިއެވެ.

މި ބަލި އަވަހަށް ފެތުރޭކަމުގެ ބިރުވެރިކަން ޤައުމަށް ކުރިމަތިވިއެވެ. ނަމަވެސް، ފަހުން އިދާރާތަކަށް އެނގުނު ގޮތުގައި ކޮރޯނާ ވައިރަސް ވަނީ ޗައިނާއިން ބޭރަށްވެސް ފެތުރިފައެވެ.

ދުނިޔޭގެ ގިނަ ޤައުމުތަކުން މިހާރު ވަނީ ބަލީގެ ސަބަބުން ކުރެވުނު ލޮކްޑައުންތަކާއި ހަނިކުރުންތަކުން އަރައިގަނެފައެވެ. ނަމަވެސް، މަދުވެގެން 7 މިލިއަން މީހުންގެ ފުރާނަ ގެއްލުވާލި، ސިއްހީ ނިޒާމުތައް ހަލާކުކޮށްލި އަދި ދުނިޔޭގެ އިޤްތިސާދު ވީރާނާކޮށްލި މި ވައިރަހުގެ އަސްލާ ގުޅޭ ގޮތުން އަދިވެސް ގިނަ ސުވާލުތަކެއް އެބަހުއްޓެވެ. އަދި ގިނަ ތަޖުރިބާކާރުން ބުނާ ގޮތުގައި ޗައިނާގެ ހާމަކަން ކުޑަވުމުގެ ސަބަބުން ބަލީގެ އަސްލު ހޯދުން އިތުރަށް ދަތިވެފައިވެއެވެ.

އަޅުގަނޑުމެން ޗައިނާއަށް ގޮވާލަމުން މިދަނީ ކޮވިޑް-19ގެ އަސްލު ދެނެގަތުމަށްޓަކައި މަޢުލޫމާތާއި ވަސީލަތްތަކަށް ވާސިލުވުމުގެ ފުރުސަތު ދިނުމަށް. މިއީ އަޚްލާޤީ އަދި ސައިންޓިފިކް ގޮތުން ކޮންމެހެން ކުރަންޖެހޭ ކަމެއް ޑަބްލިއު.އެޗް.އޯއިން ހޯމަ ދުވަހު ނެރުނު ބަޔާން

ޤައުމުތަކުގެ މެދުގައި ހާމަކަމާއި، ހިއްސާކުރުމާއި އަދި އެއްބާރުލުން ނެތި، ދުނިޔެއަށް މުސްތަޤްބަލުގައި ކުރިމަތިވެދާނެ ބަލިމަޑުކަމަކަށް އެކަށީގެންވާ ގޮތެއްގައި ތައްޔާރުވެ، އޭގެ އަސަރުތައް ކުޑަކުރުމަށް މަސައްކަތް ނުކުރެވޭނެކަމަށް މި ބަޔާނުގައި ވެއެވެ.

ބަލިމަޑުކަން ފެށުނު ގޮތާމެދު ސައިންޓިފިކް ދާއިރާގައާއި ސިޔާސީ ދާއިރާގައި ވަރަށް ބޮޑަށް ބަހުސްކުރެވިފައިވެއެވެ. މައިގަނޑު ގޮތެއްގައި ޚިޔާލު ތަފާތުވަނީ މި ބަލި ޤުދުރަތީ ގޮތުން ޖަނަވާރުންގެ ކިބައިން އިންސާނުންނަށް ފެތުރުނީތޯ ނުވަތަ ލެބޯޓަރީއަކުން ލީކުވެގެން ފެތުރުނީތޯއެވެ.

ގިނަ ސައިންޓިސްޓުން ގަބޫލުކުރާ ގޮތުގައި މި ވައިރަސް އުފެދުނީ ވައިލްޑްގައެވެ. އޭގެ ފަހުން ޖަނަވާރުންގެ ކިބައިން އިންސާނުންނަށް ފެތުރި، ވުހާންގެ ވެޓް މާކެޓެއް މެދުވެރިކޮށް ފެތުރުނީ ކަމަށް ބެލެވެއެވެ. ނަމަވެސް މެދުވެރިވި ޖަނަވާރު ދެނެގަނެވިފައެއް ނުވެއެވެ.

މާކެޓާ ކައިރީގައި ހުރި ލެބޯޓަރީއަކުން ވައިރަސް ލީކުވެގެން ފެތުރުނު ކަމަށް ފުރަތަމަ ދެކެވުނު ވާހަކަތައް ހިމާޔަތްކޮށް، ބައެއް ތަހުގީގުވެރިން އެކަމަށް ތާއީދުކޮށްފައިވެއެވެ.

ވައިރަހުގެ އަސްލު ހޯދުމުގެ މަސައްކަތް ފެށުނީއްސުރެ އެކަމާ ގުޅޭ ގޮތުން ބޮޑެތި ޚިލާފުތަކެއް އުފެދި، ސިޔާސީ ގޮތުން ބޮޑެތި ގެއްލުންތަކެއް ލިބިފައިވެއެވެ. އެމެރިކާ އާއި އެހެނިހެން ހުޅަނގުގެ ގައުމުތަކުން ތަކުރާރުކޮށް ޗައިނާއަށް ތުހުމަތުކޮށްފައިވަނީ އަސްލު އަދި ފުރިހަމަ މަޢުލޫމާތު ހިފަހައްޓާފައިވާ ކަމަށެވެ. ނަމަވެސް ބެއިޖިންގއިން މިކަން ގަދައަޅައި ދެކޮޅު ހަދާފައިވެއެވެ.

ޑަބްލިއު.އެޗް.އޯގެ އިސްވެރިންވެސް ޗައިނާއިން މަޢުލޫމާތު ހާމަކުރުމުގައި ގެންގުޅޭ ހަރުކަށި ސިޔާސަތުތަކާމެދު ފާޑުކިޔާފައިވެއެވެ. 2023 ވަނަ އަހަރު އެ ޖަމްޢިއްޔާގެ އިސްވެރިއަކު ބުނެފައިވަނީ ޗައިނާއިން މަޢުލޫމާތު ހާމަނުކުރުމަކީ "އެއްގޮތަކަށްވެސް މަޢާފުކުރެވޭނެ ކަމެއް ނޫން" ކަމަށެވެ.

މިކަމާ ގުޅިގެން ޗައިނާގެ ބަލި ކޮންޓްރޯލްކުރާ އިދާރާތަކުން އޭރު ބުނެފައިވަނީ ވައިރަހުގެ އަސްލާ ގުޅޭ ގޮތުން ޑަބްލިއު.އެޗް.އޯގެ މާހިރުންގެ ގްރޫޕަށް އެއްވެސް ކޭސްއެއް، ސާމްޕަލްއެއް ނުވަތަ ޓެސްޓުކުރުމާއި ދިރާސާކުރުމުގެ ނަތީޖާއެއް  ހުރިހާ މަޢުލޫމާތެއް ފޯރުކޮށްދީފައިވާ ކަމަށެވެ.

އަހަރުތަކެއް ވަންދެން ޑަބްލިއު.އެޗް.އޯއިން މަސައްކަތްކޮށްފައިވަނީ މާކެޓުގައި މަސައްކަތްކުރި މީހުންގެ ޓެސްޓު ނަތީޖާތަކާއި، ބަލިމަޑުކަން ފެށުނު ދުވަސްވަރު ޗައިނާއިން އެއްކުރި އެހެނިހެން ޚާއްމު މަޢުލޫމާތުތައް ހޯދުމަށެވެ.

2023 ވަނަ އަހަރު، ބަލިމަޑުކަން ފެށުނުތާ ތިން އަހަރު ފަހުން، ޑަބްލިއު.އެޗް.އޯއަށް ވާސިލުވެވުނީ 2020 ވަނަ އަހަރުގެ ކުރީކޮޅު ވުހާންގެ ހުއަނަން ސީފުޑް މާކެޓުން ޗައިނާގެ ސައިންޓިސްޓުން ނެގި ބައެއް މަޢުލޫމާތުތަކަށެވެ. މި މަޢުލޫމާތުތައް ޖީ.އައި.އެސް.އޭ.އައި.ޑީ ނަމަކަށް ކިޔާ މަޢުލޫމާތު ހިއްސާކުރާ ވެބްސައިޓަކަށް އަޕްލޯޑްކޮށްފައިވީ ނަމަވެސް، އެ މަޢުލޫމާތުތައް އަވަހަށް ނަގާލެވުނެވެ. ނަމަވެސް، ވިސްނުންތެރި ބައެއް ތަހުގީގުވެރިން އެ މަޢުލޫމާތުތައް ފާހަގަކޮށް، އިތުރަށް ދިރާސާކުރުމަށް ޑައުންލޯޑްކޮށްފައިވެއެވެ.

މި މަޢުލޫމާތުތައް ދިރާސާކޮށް، "ސެލް" ނަމަކަށް ކިޔާ ޖާނަލެއްގައި ސެޕްޓެމްބަރު މަހު ޝާއިޢުކުރެވުނު ދިރާސާއަކުން ދައްކާގޮތުގައި، މާކެޓުގެ ވަކި ސަރަހައްދެއްގައި ކޮރޯނާ ވައިރަހަށް ހާއްސަ ޖަނަވާރުންނާއި ކޮވިޑް-19 އަށް ސަބަބުވާ ކޮރޯނާ ވައިރަސް ހުރިކަން ފާހަގަކުރެވިފައިވެއެވެ. ނަމަވެސް މި ދިރާސާއިން އެ ޖަނަވާރުންގެ ގައިގައި ވައިރަސް ހުރިކަން ކަށަވަރުކޮށްދީފައެއް ނުވެއެވެ.

ހޯމަ ދުވަހު ނެރުނު ބަޔާނުގައި ޑަބްލިއު.އެޗް.އޯއިން ބުނެފައިވަނީ 2019 ވަނަ އަހަރުގެ ޑިސެމްބަރު 31 ވަނަ ދުވަހު، އެ ޖަމްޢިއްޔާގެ ޗައިނާ އޮފީހުން ވުހާން މުނިސިޕަލް ހެލްތު ކޮމިޝަނުގެ ވެބްސައިޓުން ފާހަގަކުރެވުނީ އެ ސިޓީގައި "ވައިރަލް ނިއުމޯނިއާ"ގެ ކޭސްތަކެއް ހުރި ކަމަށް ބުނާ ބަޔާނެއް ކަމަށެވެ.


                    


                    


                    

މި ލިޔުން ކިޔާލުމުން

Ads by MSS