ޚަބަރު
ގިނަ ރަށްތަކެއްގެ ފެނާ ނަރުދަމާގެ ނިޒާމް ނިންމައި، އެމްޑަބްލިއުއެސްސީއިން އަމާޒަށް ވާސިލްވެއްޖެ

އެމްޑަބްލިއުއެސްސީގެ މަޝްރޫއުގެ ތެރެއިން
ހުލާސާ
މި 20 ރަށުގެ ތެރޭގައި ހިމެނެނީ 5 ރަށުގެ ފެނުގެ ނިޒާމު ޤާއިމް ކުރުމާއި، އަދި 15 ރަށުގެ ފެނާއި ނަރުދަމާ ނިޒާމު ޤާއިމްކުރުން.
20 ރަށެއްގެ ފެނާ ނަރުދަމާގެ ނިޒާމު ނިންމައި، މޯލްޑިވްސް ވޯޓަރ އެންޑް ސުއަރޭޖް ކޮމްޕެނީ (އެމްޑަބްލިއުއެސްސީ) އިން 2024 ވަނަ އަހަރަށް އެ ކުންފުނިން ކަނޑައެޅި އަމާޒަށް ހާސިލްވެވިއްޖެކަމަށް ހާމަކޮށްފިއެވެ.
މި 20 ރަށަކީ އެ ކުންފުނިން މި އަހަރު ނިންމުމަށް ކަނޑައެޅި ޕީއެސްއައިޕީ މަޝްރޫއުތަކުގެ ތެރޭގައި ހިމެނޭ ރަށްތަކެކެވެ. މީގެ ތެރޭގައި ހިމެނެނީ 5 ރަށުގެ ފެނުގެ ނިޒާމު ޤާއިމް ކުރުމާއި، އަދި 15 ރަށުގެ ފެނާއި ނަރުދަމާ ނިޒާމު ޤާއިމްކުރުމެވެ.
މި ޕްރޮޖެކްޓުގެ ދަށުން އެ ކުންފުނިން ވަނީ ގިނަ މަސައްކަތްތަކެއް ކޮށްފައެވެ. އެގޮތުން އެ ކުންފުނިން ކޮށްފައިވާ މަސައްކަތްތަކުގެ ތެރޭގައި ހިމެނެނީ؛
· ފެން ޕްލާންޓް ބަހައްޓާ ބިލްޑިންގ އިމާރާތްކުރުން
· ފެން އުފެއްދުމަށް ބޭނުންވާ ފެން ޕްލާންޓާއި އެހެނިހެން ވަސީލަތްތައް ޤާއިމްކުރުން
· ފެން ރައްކާކުރުމަށް ތާންގީ ބެހެއްޓުން
· ފެނާއި ނަރުދަމާ ހޮޅީގެ މައިނެޓްވޯރކް އެޅުން
· ގޭގެއަށް ފެނާއި ނަރުދަމާ ކަނެކްޝަން ގުޅައިދިނުން
· ނަރުދަމާގެ ޕަންޕިންގ ސްޓޭޝަންތައް ޤާއިމްކުރުން
· ސީ އައުޓް ފޯލް އާއި ރިޖެކްޓް ލައިން އެޅުން
މީގެ އިތުރުން، މި ޕްރޮޖެކްޓުގެ ދަށުން އެ ރަށްރަށުގެ ފެނާއި ނަރުދަމާގެ ނިޒާމް ބެލެހެއްޓުމަށް ބޭނުންކުރާ ސާމާނާއި އަދި ފެން ތަޙުލީލު ކުރުމަށް ބޭނުންވާ ސަމާނު ފޯރުކޮށްދޭނަކަމަށް ވެސް އެމްޑަބްލިއުއެސްސީން ހާމަކޮށްފައިވެއެވެ.
މި މަޝްރޫއުތަކަށް 1.34 ބިލިއަން ރުފިޔާ ސަރުކާރުން ހަރަދުކޮށްފައިވާއިރު، މި މަޝްރޫއުތަކަކީ މިނިސްޓްރީ އޮފް ނޭޝަނަލް ޕްލޭނިންގ، ހައުސިންގ އެންޑް އިންފްރާސްޓްރަކްޗަރއިން އެމްޑަބްލިއުއެސްސީއާ ހަވާލުކުރި މަޝްރޫއުތަކެކެވެ.
މި މަޝްރޫއުގެ ދަށުން އެމްޑަބްލިއުއެސްސީއިން ފެނުގެ ނިޒާމް ގާއިމްކޮށްދިން ރަށްތަކަކީ ރ. އިންނަމާދޫ، އއ. މަތިވެރި، ހއ. މުރައިދޫ، ށ. ފީވައް އަދި ނ.ހެނބަދޫއެވެ.
އަދި ފެނާއި ނަރުދަމާ ނިޒާމު ޤާއިމްކޮށްފައިވަނީ ހއ. މާރަންދޫ، ހއ. ތަކަންދޫ، ހދ. ހިރިމަރަދޫ، ހދ. ކުމުންދޫ، ށ. ގޮއިދޫ، ނ. މާފަރު، ނ. ފޮއްދޫ، ރ. ފައިނު، ބ. ކަމަދޫ، ހއ. ވަށަފަރު، ބ. މާޅޮސް، ޅ. އޮޅުވެލިފުށި، އދ. ކުނބުރުދޫ، އއ. ހިމަންދޫ، އއ. ފެރިދޫ އަދި ހއ. ވަށަފަރެވެ.
މި މަޝްރޫޢުތަކުގެ ސަބަބުން މި ރަށްރަށުގެ ރައްޔިތުންނަށް ސާފު ބޯފެނާއި ރައްކާތެރި ނަރުދަމާ ނިޒާމެއް ލިބިގެންދާނެކަމަށް ވެސް އެ ކުންފުނިން ފާހަގަކުރައްވައެވެ.