އައު އަހަރާއެކު އައު ޖީލެއް " ޖެނެރޭޝަން ބީޓާ"

އައު އަހަރު ފެށުމާއެކު، ދުނިޔެއަށް އައު ޖީލެއް ތަޢާރަފުވާން ފަށާނެއެވެ. މިއީ "ޖެނެރޭޝަން ބީޓާ" ގެ ނަމުން މަޝްހޫރުވާނެ ޖީލެކެވެ. މި ޖީލުގެ ކުދިން އުފަންވާން ފަށާނީ 2025 ވަނަ އަހަރުން ފެށިގެންނެވެ.

އޮސްޓްރޭލިއާގެ ޑިމޮގްރާފަރ އަދި ފިއުޗަރިސްޓް މާކް މެކްރިންޑަލް ވިދާޅުވި ގޮތުގައި، މި އައު ޖީލުގެ ކުދިން ދިރިއުޅެމުންދާނީ މުޖުތަމަޢުގެ ބޮޑެތި ގޮންޖެހުންތަކާ ކުރިމަތިލަމުންދާ ދުނިޔެއެއްގައެވެ. މޫސުމަށް އަންނަ ބަދަލުތަކާއި، ދުނިޔޭގެ އާބާދީއަށް އަންނަ ބަދަލުތަކާއި، އަދި ހަލުވި ދުވެލީގައި ކުރިއަރަމުންދާ ޤައުމުތަކާއިއެކު، ދެމެހެއްޓެނިވި ގޮތެއްގައި ދިރިއުޅުމަކީ މި ޖީލުގެ ކުދިންނަށް ކޮންމެހެން ބޭނުންވާނެ ކަމެއް ކަމުގައި އޭނާ ވިދާޅުވިއެވެ.

ޖެނެރޭޝަނަލް ރިސާޗަރ އަދި "ޒްކޮނޮމީ" ގެ މުސައްނިފު ޖޭސަން ޑޯސީ ވިދާޅުވި ގޮތުގައި، ޖީލު ބީޓާގެ ކުދިން ދުނިޔެއަށް އަންނާނީ ކޯވިޑް-19 ގެ ބަލިމަޑުކަމަށް ފަހުގެ ދުނިޔެއަކަށެވެ. މި ކުދިންގެ ތެރެއިން ގިނަ ކުދިން 22 ވަނަ ގަރުނު ވެސް ދެކޭނެއެވެ.

ޑޯސީ ވިދާޅުވި ގޮތުގައި، މި ޖީލުގެ ކުދިން ވަރަށް ހަގު އުމުރުން ފެށިގެން ސްމާޓް ޑިވައިސްތަކާއި އާޓިފިޝަލް އިންޓެލިޖެންސްއާ ގުޅިލާމެހިފައިވާ ދިރިއުޅުމެއް އުޅޭނެއެވެ. އަދި މައްސަލަތައް ހައްލުކުރުމަށް މި ޓެކްނޮލޮޖީތަކަށް ބަރޯސާވާނެއެވެ.

މީގެ އިތުރުން، މޫސުމަށް އަންނަ ބަދަލުތަކުގެ ސަބަބުން ކުރިމަތިވާ ނޭދެވޭ އަސަރުތަކާ ސީދާ ކުރިމަތިލާންޖެހޭނީ މި ޖީލުގެ ކުދިންނެވެ. އަދި މި ކުދިން ބޮޑެތިވަމުންދާއިރު، މިހާރުގެ ލީޑަރުންގެ ބަދަލުގައި މިލެނިއަލްސް އަދި ޖެން ޒެޑްގެ ލީޑަރުން އިސްވެ ތިބެނިކޮށް ދެކޭނެއެވެ.

މެކްރިންޑަލްގެ ދިރާސާތަކުން ދައްކާ ގޮތުގައި، 2035 ވަނަ އަހަރާ ހަމައަށް އާދެވޭއިރު، ދުނިޔޭގެ އާބާދީގެ 16 އިންސައްތައަކީ ޖީލު ބީޓާގެ ކުދިން ކަމުގައިވާނެއެވެ.