"ވޯލްޑްސް ބިގެސްޓް ގިވްއަވޭ": 2025 ގައި ރާއްޖެއަށް ފަތުރުވެރިން ޝައުގުވެރިކުރުވުމަށް ބޮޑު ކެމްޕޭނެއް ފަށައިފި

މޯލްޑިވްސް މާކެޓިންގ އެންޑް ޕަބްލިކް ރިލޭޝަންސް ކޯޕަރޭޝަން (އެމްއެމްޕީއާރުސީ/ވިޒިޓް މޯލްޑިވްސް)އިން އިންތިޒާމްކޮށްގެން ބާއްވާ 2025 ވަނަ އަހަރުގެ އެންމެ ބޮޑު ގްލޯބަލް ކެމްޕޭން "ވޯލްޑްސް ބިގެސްޓް ގިވްއަވޭ" މިއަދު ރަސްމީކޮށް ފަށައިފިއެވެ.

މި ކެމްޕޭން ފުރަތަމަ އިޢުލާނުކުރެވުނީ 2024 ވަނަ އަހަރުގެ ނޮވެމްބަރު 5 ވަނަ ދުވަހު ލަންޑަންގައި ބޭއްވުނު ވޯލްޑް ޓްރެވަލް މާކެޓް (ޑަބްލިއުޓީއެމް) ގައެވެ. މި ހަރަކާތުގެ ދަށުން، 2025 ވަނަ އަހަރުގެ ޖެނުއަރީ މަހުގެ 1 ވަނަ ދުވަހުން ފެށިގެން ކޮންމެ ހަފްތާއަކު އެއް ފަރާތަކަށް ހިލޭ ޗުއްޓީއެއް ދިނުމަށް ވަނީ ހަމަޖެހިފައެވެ. މިއީ އަހަރެއްގެ މައްޗަށް ޖުމްލަ 52 ހިލޭ ޗުއްޓީއެވެ.

އެމްއެމްޕީއާރްސީން މަޢުލޫމާތު ދެއްވިގޮތުގައި، މި ކެމްޕޭންގެ ދަށުން ކޮންމެ މަހަކު ސޯޝަލް މީޑިއާ މެދުވެރިކޮށް މުބާރާތްތަކެއް ބޭއްވޭނެއެވެ. މި މުބާރާތްތަކުގެ ނަސީބުވެރިންނަށް ރާއްޖޭގައި ހިތްގައިމު ޗުއްޓީއެއް ހޭދަކުރުމުގެ ފުރުސަތު ލިބިގެންދާނެއެވެ.

ކޮންމެ މުބާރާތެއްގައިވެސް ރާއްޖޭގެ ރީތި ގޮނޑުދޮށްތަކާއި، ސާފު މޫދު، ޤުދުރަތީ ރީތިކަން، މުއްސަނދި ސަގާފަތް އަދި ކަނޑުގެ ދިރުންތައް ފަދަ ކަންކަމަށް އަލިއަޅުވާލެވޭނެއެވެ. މީގެ އިތުރުން، ރޮމޭންސް، ލަގްޒަރީ، ފެމިލީ އަދި ޑައިވިންގ ފަދަ ތަފާތު ދާއިރާތަކަށްވެސް ސަމާލުކަން ދެވޭނެއެވެ.

މި ކެމްޕޭންގެ މައިގަނޑު މަޤްޞަދަކީ ސޯޝަލް މީޑިއާ މެދުވެރިކޮށް ބައިނަލްއަޤްވާމީ ފަރާތްތަކުގެ ސަމާލުކަން ހޯދައި، ރާއްޖެއަށް އިތުރު ފަތުރުވެރިން ޝައުޤުވެރިކުރުވުމެވެ. އަދި ރާއްޖެއަކީ އަހަރުގެ ކޮންމެ ވަގުތެއްގައިވެސް ޒިޔާރަތްކުރެވޭނެ މަންޒިލެއްގެ ގޮތުގައި އިޝްތިހާރުކުރުމެވެ.

އެމްއެމްޕީއާރުސީން ވިދާޅުވިގޮތުގައި، 2025 ވަނަ އަހަރު އެ ފަރާތުން އަމާޒުކުރަނީ 25 މާކެޓެއްގައި ކޮންމެ ކުއާޓަރއެއްގައިވެސް ހަރަކާތްތަކެއް ހިންގުމަށެވެ. މިއީ ދިވެހިރާއްޖެ ދުނިޔޭގެ އެންމެ މަޤްބޫލު ޓްރެވަލް މަންޒިލުގެ ގޮތުގައި ދެމެހެއްޓުމަށް ކުރެވޭ މަސައްކަތުގެ ބައެކެވެ.

ވިޒިޓް މޯލްޑިވްސްއިން މިހާރު މަސައްކަތް ކުރަމުންދަނީ 2025 ވަނަ އަހަރު އިންޑަސްޓްރީ ޕާޓްނަރުންނާ ގުޅިގެން އިތުރު ކާމިޔާބީތަކަށް ވާސިލްވުމަށެވެ. މި ކެމްޕޭންގެ ސަބަބުން ރާއްޖޭގެ ފަތުރުވެރިކަމުގެ ސިނާޢަތަށް އިތުރު ކުރިއެރުންތަކެއް ލިބޭނެކަމަށް އުންމީދު ކުރެވެއެވެ.