ދަތުރުގެ ކުރިން ބެލި ބެލުމުން އެއްވެސް މައްސަލައެއް ނެތް :ޖެޖޫ އެއަރ

ދެކުނު ކޮރެއާގެ މުއާން އިންޓަނޭޝަނަލް އެއަރޕޯޓުގައި ޖެޖޫ އެއަރގެ ބޯޓެއް ވެއްޓި 179 މީހުން މަރުވި ހާދިސާގައި، އެ ބޯޓު ދަތުރަށް ފުރުމުގެ ކުރިން ކުރި ޗެކުގައި އެއްވެސް މައްސަލައެއް ފާހަގަ ނުކުރެވުނު ކަމަށް އެ ކުންފުނިން ބުނެފިއެވެ.

ސިއޯލްގައި ބޭއްވި ނޫސްވެރިންގެ ބައްދަލުވުމެއްގައި ޖެޖޫ އެއަރގެ ސީއީއޯ ކިމް ޔީ-ބޭ ވިދާޅުވީ ބޯޓުގެ ލޭންޑިންގ ގިއަރގައި އެއްވެސް މައްސަލައެއް ނެތް ކަމަށެވެ. މިއީ ދެކުނު ކޮރެއާގެ ތާރީޚުގައި އެންމެ ގިނަ މީހުން މަރުވި ވައިގެ ހާދިސާއެވެ.

ބެންކޮކުން ފުރި މި ބޯޓު އިރުއަރާ ވަގުތު މުއާން އިންޓަނޭޝަނަލް އެއަރޕޯޓުގައި ޖެހުނު އިރު، ރަންވޭގެ ކޮޅުގައި ހުރި ފާރަކާ ޖެހި އަލިފާން ރޯވިއެވެ. މި ހާދިސާގައި ދެ ކުރޫ މެންބަރުން ފިޔަވައި އެހެން އެންމެން މަރުވިއެވެ.

ތަޙުޤީޤު ކުރިއަށްދާ އިރު، ގިނަ ސުވާލުތަކެއް އަދިވެސް ވަނީ ޖަވާބު ނުލިބިއެވެ. މީގެ ތެރޭގައި ބޯޓު ޖެހުނު އިރު ލޭންޑިންގ ގިއަރ ތިރިކޮށްފައި ނެތީ ކީއްވެގެންކަމާއި، ދޫންޏެއް ޖެހުމުގެ ސަބަބުން ނުވަތަ މޫސުމުގެ ސަބަބުން މިކަން ދިމާވީތޯ ބަލަމުންދެއެވެ.

ޖެޖޫ އެއަރގެ ސީއީއޯ ވިދާޅުވީ ކުންފުނިން ސަލާމަތީ ފިޔަވަޅުތައް ހަރުދަނާ ކުރުމަށް މަސައްކަތް ކުރާނެ ކަމަށެވެ. އަދި މަރުވި މީހުންގެ ޢާއިލާތަކަށް ބަދަލު ދިނުމަށް ތައްޔާރުވަމުންދާ ކަމަށާއި، ޖަނާޒާގެ ޚަރަދުތައް ކުންފުނިން ދައްކާނެ ކަމަށްވެސް އޭނާ ވިދާޅުވިއެވެ.