ބޭރުފައިސާ މާރުކުރުން ލާޒިމްކުރާ އައު ޤާނޫނަށް ޢަމަލުކުރަން ފަށައިފި

ބޭންކުތަކަށް ޑޮލަރު މާރުކުރުން ނުވަތަ ޑޮލަރު ޖަމާކުރުން ލާޒިމްކުރާ ބޭރުފައިސާއާ ބެހޭ އައު ޤާނޫނަށް ޢަމަލުކުރަން ފަށައިފިއެވެ. މި ޤާނޫނުގެ ދަށުން ބޭރުފައިސާގެ އާމްދަނީ ލިބޭ ވިޔަފާރިތަކުން އެ ފަރާތްތަކަށް ލިބޭ އާމްދަނީގެ ބައެއް ބޭންކުތަކަށް މާރުކުރަން ޖެހެއެވެ.

މި ޤާނޫނުގެ މައިގަނޑު މަޤްޞަދަކީ، ދިވެހިރާއްޖޭގައި ބޭރު ފައިސާއިން ކުރެވޭނެ މުޢާމަލާތްތައް ކަނޑައަޅައި، ބޭރު ފައިސާ އެތެރެކޮށް ބޭނުންކުރުމާއި ގެންގުޅުމާއި އަދި ޖަމާކޮށް މާރުކުރުމާއި ގުޅޭ އުސޫލުތައް ކަނޑައަޅައި ހިންގުމަށް ބޭނުންވާ ޤާނޫނީ އޮނިގަނޑެއް އެކުލަވާލުމެވެ. މި ޤާނޫނުގެ ދަށުން އިސްތިސްނާވާ މުޢާމަލާތްތައް ފިޔަވައި އެހެން ހުރިހާ މުޢާމަލާތްތައް ކުރަން ޖެހޭނީ ދިވެހި ރުފިޔާއިންނެވެ.

ޤާނޫނުގެ ދަށުން ބޭރު ފައިސާގެ އާމްދަނީ ލިބޭ ފަރާތްތައް 3 ގިންތިއަކަށް ބަހާލާފައިވެއެވެ. މީގެ ތެރޭގައި ހިމެނެނީ:

1. ކެޓަގަރީ އޭ: ފަތުރުވެރިންނަށް ޚިދުމަތްދޭ ވިޔަފާރިތަކުގެ ތެރެއިން ދިވެހިރާއްޖޭގައި ހިންގާ ޓޫރިސްޓް ރިސޯޓުތަކާއި، އިންޓްގްރޭޓެޑް ޓޫރިސްޓް ރިސޯޓުތަކާއި، ޕްރައިވެޓް އައިލަންޑްތަކާއި، ރިސޯޓު ހޮޓާތައް.

2. ކެޓަގަރީ ބީ: ޓޫރިސްޓް އުޅަނދުތަކާއި، ޓޫރިސްޓު ހޮޓާތަކާއި، ޓޫރިސްޓް ގެސްޓްހައުސްތައް.

3. ކެޓަގަރީ އޭ އަދި ބީ ގައި ނުހިމެނޭ ބޭރުފައިސާގެ އާމްދަނީ ލިބޭ ވިޔަފާރިތައް.

މި ޤާނޫނުގެ ދަށުން ކެޓަގަރީ އޭ އަދި ބީ ގައި ހިމެނޭ ވިޔަފާރިތަކުން ކޮންމެ ފަތުރުވެރިއަކަށް ވަކި އަދަދެއް ނުވަތަ އާމްދަނީގެ 20 އިންސައްތަ ބޭންކަށް މާރުކުރަން ޖެހެއެވެ. އަދި ކެޓަގަރީ އޭ އަދި ބީ ގައި ނުހިމެނޭ ވިޔަފާރިތަކުން އަހަރަކު މަދުވެގެން 15 މިލިއަން އެމެރިކާ ޑޮލަރުގެ އާމްދަނީ ލިބޭނަމަ، މަހަކު ލިބޭ އާމްދަނީގެ 20 އިންސައްތަ ބޭންކަށް މާރުކުރަން ޖެހެއެވެ.

މި ޤާނޫނަށް ޢަމަލުކުރަން ފަށާފައިވާއިރު، ބޭރުފައިސާ މާރުކޮށް ޖަމާކުރަން ފަށާނީ މި މަހުގެ 28 ވަނަ ދުވަހުންނެވެ. އަދި ޤާނޫނު ތަންފީޒުކުރާނީ މޯލްޑިވްސް މަނިޓަރީ އޮތޯރިޓީ (އެމްއެމްއޭ) އިންނެވެ. މި ޤާނޫނަކީ ދިވެހިރާއްޖެއަށް ދިމާވެފައިވާ ޑޮލަރުގެ ދަތިކަމަށް ހައްލެއް ގެނައުމަށް ތަޢާރަފްކޮށްފައިވާ ޤާނޫނެއް ކަމަށް ސަރުކާރުން ބުނެއެވެ.