ފާއިތުވި 24 ގަޑިއިރު އެންމެ ބޯކޮށް ވާރޭވެހުނީ ދިއްފުއްޓަށް: 118.5 މިލިމީޓަރުގެ ވާރޭ ވެހުނު

ފާއިތުވި 24 ގަޑިއިރު ތެރޭގައި ރާއްޖޭގެ އެންމެ ބޯކޮށް ވާރޭވެހުނީ ކ. ދިއްފުއްޓަށް ކަމަށް މޫސުމާ ބެހޭ ގައުމީ އިދާރާ (މެޓް) އިން ހާމަކޮށްފިއެވެ. މެޓުން އާންމުކޮށްފައިވާ މަޢުލޫމާތުގެ މައްޗަށް ބަލާއިރު، ދިއްފުއްޓަށް 118.5 މިލިމީޓަރުގެ ވާރޭ ވެހިފައިވާކަން ފާހަގަކުރެވެއެވެ.

މެޓުން ހާމަކޮށްފައިވާ ތަފާސްހިސާބުތަކަށް ބަލާއިރު، ދެވަނައަށް އެންމެ ގިނައިން ވާރޭވެހުނީ ކ. ގާފަރަށެވެ. އެރަށަށް 42.6 މިލިމީޓަރުގެ ވާރޭ ވެހިފައިވެއެވެ. ތިންވަނައަށް އެންމެ ގިނައިން ވާރޭވެހުނީ ހުޅުލެއަށް ކަމަށްވާއިރު، ހަތަރުވަނައަށް އެންމެ ގިނައިން ވާރޭވެހުނީ މާލެއަށެވެ. މާލެއަށް 25.6 މިލިމީޓަރުގެ ވާރޭ ވެހިފައިވެއެވެ.

މީގެ އިތުރުން، އއ. ތޮއްޑޫ، ބ. ދަރަވަންދޫ، އދ. މާމިގިލި އަދި ބ. ގޮއިދޫ ހިމެނޭގޮތަށް ރާއްޖޭގެ އެކި ސަރަހައްދުތަކަށް ބޯކޮށް ވާރޭވެހިފައިވާކަން މެޓުން ހާމަކޮށްފައިވެއެވެ.

މިއަދު ވެސް ރާއްޖޭގެ އެކި ސަރަހައްދުތަކަށް މޫސުން ގޯސްވެ، ވިއްސާރަވެދާނެ ކަމަށް މެޓުން ލަފާކޮށްފައިވެއެވެ. ވުމާއެކު، މޫސުމަށް ސަމާލުވުމަށް އާންމުންނަށް އިލްތިމާސްކުރެވެއެވެ.