ޚަބަރު
އައު އަހަރާއި ގުޅުވައިގެން މަޖިލިސް ރައީސްގެ މުޙިއްމު މެސެޖެއް :ޤައުމުގެ ފާގަތިކަމަށް މަސައްކަތްކުރުމަށް ގޮވާލެއްވި
މަޖިލީހުގެ ރައީސް އަބްދުއްރަހީމް އަބްދުﷲ ފޮޓޯ:އެކްސް ޕްލެޓްފޯމް
މި ފެށުނު 2025 ވަނަ އަހަރު ދިވެހި ޤައުމުގެ ފާގަތިކަމަށް ކޮންމެ ދިވެއްސަކުވެސް ގަދައަޅާ މަސައްކަތްކޮށްދެއްވުމަށް ރައްޔިތުންގެ މަޖިލީހުގެ ރައީސް ޢަބްދުއްރަޙީމް ޢަބްދުﷲ އެދިވަޑައިގެންފިއެވެ.
މަޖިލިސް ރައީސް މިފަދައިން ވިދާޅުވެފައިވަނީ މީލާދީ އައު އަހަރުގެ މުނާސަބަތުގައި ސޯޝަލް މީޑިއާގައި ޙިއްސާކުރެއްވި ޕޯސްޓެއްގައެވެ. މި ޕޯސްޓުގައި އެމަނިކުފާނު ވަނީ މިފެށުނު މީލާދީ އާ އަހަރުގެ ތަޙުނިޔާއާއި ހެޔޮއެދުންތައް ރާއްޖޭގެ ރައީސުލްޖުމްހޫރިއްޔާގެ ދެކަނބަލުންނަށާއި ރައްޔިތުންގެ މަޖިލީހުގެ މެންބަރުންނަށާއި އެންމެހާ ދިވެހި ރައްޔިތުންނަށް އަރިސްކުރައްވާފައެވެ.
މީލާދީ އައު އަހަރުގެ ތަޙުނިޔާ 2025
— Abdul Raheem Abdulla (@Banafsaa) December 31, 2024
މިފެށޭ މީލާދީ އައު އަހަރުގެ ތަޙުނިޔާ އާއި ހެޔޮއެދުންތައް ރާއްޖޭގެ ޢިއްޒަތްތެރި ރައީސުލް ޖުމްހޫރިއްޔާގެ ދެކަނބަލުންނަށާއި، ރައްޔިތުންގެ މަޖިލީހުގެ ޢިއްޒަތްތެރި މެންބަރުންނަށާއި، އެންމެހާ ދިވެހި ލޮބުވެތި ރައްޔިތުންނަށް އިޚްލާޞްތެރިކަމާއެކު… pic.twitter.com/Tv6ggLy3px
މަޖިލިސް ރައީސް ޢަބްދުއްރަޙީމް އެ ޕޯސްޓުގައި ވިދާޅުވެފައިވަނީ "2025 ވަނަ އަހަރު ކޮންމެ މީހަކުވެސް އާ ޢަޒުމަކާއި ހިތްވަރަކާއެކު ދިވެހި ޤައުމަށް ފާގަތިކަމާއި ކުރިއެރުމާއި އަރުތަ ހާޞިލުކުރުމަށް ގަދައަޅާ މަސައްކަތްކޮށްދެއްވުން އެދެމެވެ." މީގެއިތުރުން، ދިވެހީންނަށް އުފާފާގަތި، ފުދުންތެރި މުސްތަޤުބަލެއް ހޯދައިދިނުމަށް ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ގިނަ މަސައްކަތްތަކެއް ކުރައްވަމުން ގެންދަވާކަންވެސް އެމަނިކުފާނުގެ ޕޯސްޓުގައި ފާހަގަކުރައްވާފައިވެއެވެ.
މީލާދީ އައު އަހަރުގެ މުނާސަބަތުގައި ވަޒީރުންގެ އިތުރުން ކުރީގެ ރައީސުންނާއި ބައެއް ސިޔާސީ ލީޑަރުންވެސް ވަނީ އުފާވެރި އައު އަހަރަކަށް އެދިވަޑައިގެން ސޯޝަލް މީޑިއާގައި ޕޯސްޓުތައް ޙިއްސާކުރައްވާފައެވެ. މި ޕޯސްޓުތަކުގައި ދިވެހި ޤައުމުގެ ކުރިއެރުމަށް މަސައްކަތްކުރާ އަހަރަކަށް ހެދުމަށް ކުރީގެ ރައީސުންނާއި ލީޑަރުން ވަނީ އެދިވަޑައިގެންފައެވެ.
