އަދީބުގެ އެއް މިލިއަން ރުފިޔާގެ ޖޫރިމަނާ ދެއްކުމަށް އަނެއްކާ ވެސް އެއް މަސް ދުވަހުގެ މުއްދަތެއް ދީފި

އެއް މިލިއަން ރުފިޔާގެ ޖޫރިމަނާއެއް އެއް މަސްދުވަހުގެ ތެރޭގައި ދައުލަތަށް ދެއްކުމަށް 2020 ވަނަ އަހަރު ކުރީގެ ނައިބު ރައީސް އަހުމަދު އަދީބުގެ މައްޗަށް ކްރިމިނަލް ކޯޓުން ކުރި ހުކުމާ އެއްގޮތަށް އެ ފައިސާ ދައްކާފައި ނުވާތީ، 31 ޑިސެންބަރު 2024 ވަނަ ދުވަހުން ފެށިގެން އެ ފައިސާ ދައުލަތަށް ދެއްކުމަށް އަނެއްކާ ވެސް އެއް މަސް ދުވަހުގެ މުހުލަތެއް ދީފިއެވެ. 

މޯލްޑިވްސް މާކެޓިން އެންޑް ޕަބްލިކް ރިލޭޝަންސް ކޯޕަރޭޝަން (އެމްއެމްޕީއާރުސީ) ގެ ޚިޔާނާތާ ގުޅިގެން ދައުލަތުން އަދީބުއާ ދެކޮޅަށް ކުރި ދައުވާތަކާއެކު، އެއް މިލިއަން ރުފިޔާ ދައުލަތަށް ދެއްކުމަށް ކްރިމިނަލް ކޯޓުން ހުކުމްކުރީ 05 އޮކްޓޯބަރ 2020 ގައެވެ.

އެ ހުކުމާ ގުޅިގެން އަދީބު ބުނެފައިވަނީ، އެ ފައިސާ އެއް ފަހަރާ ދެއްކުމަށް ދަތި ކަމަށާއި އަދި ފައިސާ ދެއްކޭނެ ގޮތެއް ހުށަހެޅުމަށް ހަތް ދުވަހުގެ ފުރުސަތެއް ދިނުމަށެވެ. 

ނަމަވެސް ދައުލަތުން ނިންމީ އަދީބުއަށް އެ ފުރުސަތު ނުދީ، ކުރީގެ ހުކުމާ އެއްގޮތަށް އަމަލު ކުރުމަށެވެ. އަދި މި ކަމުގައި ދައުލަތުން އެދުނީ އިތުރު ޝަރީއަތަކާ ނުލައި އެ މައްސަލަ ނިންމުމަށެވެ.

މި ޖޫރިމަނާގެ އިތުރުން، އަދީބުއާ ދެކޮޅަށް ކުރި ދައުވާތަކާ ގުޅިގެން 20 އަހަރުގެ ޖަލު ހުކުމެއް ވެސް އޭނާއަށް އައިސްފައި ވެއެވެ. ނަމަވެސް ކުރީގެ ރައީސް އިބްރާހިމް މުހައްމަދު ވަނީ އެ މަނިކުފާނުގެ ވެރިކަމުގެ ފަހު ދުވަސްވަރުގައި، 20 އަހަރުގެ ހުކުމް 4 ދުވަހަށް ލުއިކޮށްދެއްވާފައެވެ. އެހެންކަމުން އަދީބު މިހާރު ވަނީ މިނިވަންވެފައެވެ. 

މިނިވަންވުމަށް ފަހު މިހާރު އަދީބު ދިރިއުޅެނީ ރާއްޖެއިން ބޭރުގައެވެ.