ޚަބަރު
ވިއްސާރަ އަލިކުރާނީ އަންނަ ހޮނިހިރު ދުވަހުގެ ފަހުން - މެޓު އޮފީސް

ރާއްޖެއަށް ކުރަމުންދާ ވިއްސާރަ ފޮޓޯ:އެޓޯލް ޓައިމްސް
ރާއްޖެއަށް މިހާރު ކުރަމުންދާ ވިއްސާރަ އަލިކުރާނެކަމަށް ބެލެވެނީ އަންނަ ހޮނިހިރު ދުވަހުގެ ފަހުންކަމަށް މޫސުމާ ބެހޭ ޤައުމީ އިދާރާއިން (މެޓު އޮފީސް) ވިދާޅުވެއްޖެއެވެ. މިއަދާއި މާދަމާވެސް މުޅި ރާއްޖެއަށް ވިއްސާރަކުރާނެކަމަށް އެ އިދާރާއިން މަޢުލޫމާތު ދެއްވިއެވެ.
މެޓު އޮފީހުން ވިދާޅުވިގޮތުގައި، މިހާރު ރާއްޖެއަށް ކުރަމުންދާ ވިއްސާރައަކީ މި ސަރަޙައްދުގައި އުފެދިފައިވާ ސަރކިއުލޭޝަންއެއްގެ ސަބަބުން ކުރަމުންދާ ވިއްސާރައެކެވެ. އަދި މި ވިއްސާރަ އަލިކުރާނެކަމަށް ލަފާކުރެވެނީ އަންނަ ހޮނިހިރު ދުވަހުން ފެށިގެންކަމަށް އެ އިދާރާއިން ފާހަގަކުރެއްވިއެވެ.
މީގެ އިތުރުން، ހުކުރު ދުވަހުވެސް ރާއްޖޭގެ ބޮޑު ބަޔަކަށް ވިއްސާރަކުރާނެކަމަށާއި މޫސުމަށް ހުރިހާ ފަރާތަކުންވެސް ސަމާލުވާންޖެހޭކަމަށް މެޓު އޮފީހުން އިންޒާރު ދެއްވިއެވެ. އަދި ދެކުނުގެ ބައެއް ރަށްތަކަށް ކެރީގެ އަސަރު ކުރުން އެކަށީގެންވާކަމަށާއި، އެހެން ހިސާބުތަކަށް ވިއްސާރަކުރުމާއެކު ގުގުރާނެކަމަށް ލަފާކުރެވޭކަމަށް ވިދާޅުވިއެވެ. ބައެއް ރަށްތަކަށް ބޯކޮށް ވާރޭ ވެހޭނެކަމަށްވެސް މެޓު އޮފީހުން ލަފާކުރައްވައެވެ.
ދެކުނާއި މެދުރާއްޖޭގެ ރަށްތަކަށް ހުޅަނގާއި ހުޅަނގު އުތުރުން ގަޑިއަކު 15 މޭލާއި 25 މޭލާ ދެމެދުގެ ބާރުމިނުގައި ވައިޖެހޭނެކަމަށް މެޓު އޮފީހުން ލަފާކުރައްވައެވެ. އުތުރުގެ ރަށްތަކަށް އުތުރާއި އިރުއުތުރުން ގަޑިއަކު 10 މޭލާއި 20 މޭލާ ދެމެދުގެ ބާރުމިނުގައި ވައިޖެހޭނެކަމަށާއި، ވިލާގަނޑުގައި ގަޑިއަކު ގާތްގަނގާތްގަނޑަކަށް 45 މޭލަށް ވައިގަދަވުން އެކަށީގެންވާކަމަށްވެސް ފާހަގަކުރެއްވިއެވެ.
މި މޫސުމުގެ ސަބަބުން ދެކުނާއި މެދުރާއްޖެތެރޭގެ ކަނޑުތައް ގަދަވާނެކަމަށާއި އުތުރުގެ ކަނޑުތައް އާދައިގެ ވަރަކަށް ގަދަވާނެކަމަށް ބެލެވޭތީ، ކަނޑު ދަތުރުކުރައްވާ ފަރާތްތަކުން ސަމާލުވުމަށް މެޓު އޮފީހުން އިލްތިމާސްކުރައްވައެވެ. ޢާއްމުގޮތެއްގައި ރާއްޖޭގެ ހުރިހާ ސަރަޙައްދެއްގެ ކަނޑުތަކުގެ ރާޅުގެ އުސްމިން ހުންނާނީ 3 ފޫޓާއި 5 ފޫޓާ ދެމެދުގައި ކަމަށާއި، މެދުރާއްޖެތެރޭގެ ކަނޑުތަކުގެ ރާޅުގެ އުސްމިން 5 ފޫޓާއި 7 ފޫޓާ ދެމެދުގައި ހުންނާނެކަމަށް ލަފާކުރެވެއެވެ.
ވޭތުވެދިޔަ 24 ގަޑިއިރުގައި އެންމެ ބޯކޮށް ވާރޭ ވެހިފައިވަނީ ލ. މާވަށަށް ކަމަށާއި، އެ ރަށަށް 107.7 މިލިމީޓަރުގެ ވާރޭ ވެހިފައިވާކަމަށް މެޓު އޮފީހުން ހާމަކުރެއްވިއެވެ. މޫސުން ރާއްޖޭގެ ބޮޑު ބަޔަކަށް ގޯސްވެފައިވާއިރު، މި ދުވަސްވަރު މޫސުމަށް ސަމާލުވުމަކީ މުހިއްމުކަމެއްކަމަށް އެ އިދާރާއިން އިންޒާރު ދެއްވިއެވެ.
މި ނުރައްކާތެރި މޫސުމާ ގުޅިގެން، ކަމާބެހޭ ފަރާތްތަކުން ރައްޔިތުންނަށް އިތުރު އިރުޝާދުތަކެއް ދެއްވާފައިވެއެވެ. މިގޮތުން، ވިއްސާރަވެ ފެންބޮޑުވުމުގެ ސަބަބުން ގެއަށް ފެންވަނުމުގެ ފުރުސަތު އޮތްނަމަ، ވެލިބަސްތާ ޖެހުމަށް އިރުޝާދު ދެއްވާފައިވެއެވެ. އަދި ވައިބާރުވެ ފުރާޅު އެއްލާލުން ފަދަ ކަމެއް މެދުވެރިވެދާނެކަމަށް ބެލެވޭނަމަ، ވާޖަހައިގެން ފުރާޅު ހިފެހެއްޓޭނެފަދަ ގޮތަކަށް ތައްޔާރުވުމަށްވެސް އިލްތިމާސްކުރައްވާފައިވެއެވެ.