އަނިޔާގައި ހުރި ސަކާ ނެތްތަން ނުވަނޭރީ ފޫބައްދައި، އާސެނަލް ލީގުގެ ދެވަނައަށް

އިންގްލިޝް ޕްރިމިއަރ ލީގުގައި އާސެނަލް އާއި ބްރެންޓްފޯޑް ބައްދަލުކުރި މެޗަށް، އަނިޔާގައި ހުރި ބުކާޔޯ ސަކާގެ ބަދަލުގައި ކުޅެން އެރުވި އީތަން ނުވަނޭރީ ތަފާތު ދައްކައި، ފަހަތުން އަރައި ބްރެންޓްފޯޑު ބަލިކޮށް އާސެނަލް ލީގުގެ ދެވަނައަށް ކުރިޔަށް ޖެހިލައިފިއެވެ. މިއީ ނުވަނޭރީ މި ސީޒަނުގައި ކުޅުނު ފުރަތަމަ ލީގު މެޗު ވެސް މެއެވެ.

މި މެޗުގައި ބްރެންޓްފޯޑުން ވަނީ މެޗުގެ ފުރަތަމަ 10 މިނެޓުގައި މޮޅަށް ކުޅެ، މެޗުގެ ކުރީ ގޮޅު ގޯލެއް ވެސް ކާމިޔާބުކޮށްފައެވެ. އެގޮތުން 13 ވަނަ މިނެޓުގައި ބްރެންޓްފޯޑަށް ލީޑު ނަގައިދީފައިވަނީ، މި ސީޒަނުގައި ގިނަ ގޯލުތަކެއް ކާމިޔާބު ކުރަމުން އަންނަ ބްރްޔަން ބޭމޯއެވެ. ކަނާތް ފަރާތުން އާސެނަލްގެ ޕެނަލްޓީ އޭރިއާ ތެރެއަށް ވަނުމަށްފަހު، ތިރިތިރިން އޭނާ ފޮނުވާލި ބޯޅަ ގޯލުގެ ތެރެއަށް ވަނީ އާސެނަލްގެ ގޯލްކީޕާރ، ޑޭވިޑް ރާޔާގެ ވާތް ފަރާތުންނެވެ. 

އޭގެ ވަގުތުކޮޅެއް ފަހުން ބްރެންޓްފޯޑަށް އެ ޓީމުގެ ލީޑު ފުޅާނުކުރެވުނީ ހަމަކިރިޔާއެވެ. އެ ޓީމުގެ ލެވިސް ޕޮޓާރ ފޮނުވާލި ބޯޅަ ރާޔާގެ އަތުގައި ޖެހުމަށްފަހު ގޯލުގެ ތެރެއަށް ވަންނަން ދަނިކޮށް، ދުވެފައި ގޮސް ގޯލުގެ ރޮނގު ހުރަސް ކުރުމުގެ ކުރިން ރާޔާ ވަނީ ބޯޅަ ދުރަށް ފޮޅުވާލާފައެވެ.

އާސެނަލްއިން ވަނީ އެ ހަމަލާގެ ކުޑަ ވަގުތުކޮޅެއް ފަހުން މެޗުގެ ނަތީޖާ ހަމަހަމަކޮށްފައެވެ. އާސެނަލްގެ މެދުތެރެއަށް ކުޅެމުން އަންނަ ތޯމަސް ޕާޓޭ ދުރުން ބާރަށް ފޮނުވާލި ބޯޅަ ދިފާއުކުރަން އުޅުމުގެ ތެރޭގައި ބްރެންޓްފޯޑުގެ ގޯލްކީޕަރ، މާކް ފެލެކެން އަތުގައި ޖެހިފައި ގޯލް އޭރިއާގެ ތެރެއަށް ބޯޅަ ވެއްޓެން ދަނިކޮށް، ފުއްމާލުމަށްފަހު ޑައިވްހެޑާއެއްކޮށް، އާސެނަލްއަށް މެޗުގެ ނަތީޖާ ހަމަހަމަ ކޮށްދިނީ ފޯމުގައި ހުރި ގެބްރިއަލް ޖީސުސްއެވެ. މިއީ ހަ މެޗުން އޭނާ ކާމިޔާބުކުރި ހަތަރު ވަނަ ގޯލެވެ.

ދެވަނަ ހާފުގައި އާސެނަލްއިން މެޗުގެ ކޮންޓްރޯލް ރަގަޅަށް ނެގިތަން ފެނުނެވެ. އެގޮތުން ތިން މިނެޓުގެ ތެރޭގައި ދެ ގޯލު ކާމިޔާބުކޮށް، އާސެނަލްއިން ދެވަނަ ހާފުގެ އަށްވަނަ މިނެޓުގެ ފަހުން ރަގަޅަށް ހަމަޖެހިލިއެވެ.

އެ ޓީމަށް ލީޑު ނަގައިދިނީ ނުވަނޭރީ ނެގި ކޯނަރަކުން ފަހިވި ފުރުސަތެއްގައި މައިކަލް މެރީނޯސްއެވެ. މެޗުގެ 50 ވަނަ މިނެޓުގައި މެރީނޯސް ލީޑު ނަގައިދިނީ ގޯލު އޭރިއާ ތެރެއަށް ވެއްޓުނު ބޯޅަ އެއްޓަޗުން ގޯލުގެ ދާގަނޑަށް ފޮނުވާލުމަށްފަހުއެވެ. 

އަދި އޭގެ ތިން މިނެޓު ފަހުން ގެބްރިއަލް މާޓިނެލީ ވަނީ ވާތް ފަރާތުގައި ހުރެފައި ކަނާތް ފަރާތުކަނަށް ބޯޅަ ފޮނުވާލައި އާސެނަލްގެ ތިންވަނަ ގޯލު ކާމިޔާބުކޮށްފައެވެ. 

މާޓިނެލީގެ ގޯލަށްފަހު ވެސް އާސެނަލްއަށް ވަނީ އެ ޓީމުގެ ލީޑު ފުޅާ ކުރާނެ ރަގަޅު ފުރުސަތުތަކެއް ލިބިފައެވެ. ނަމަވެސް އެ ޓީމަށް އިތުރު ފުރުސަތެއްގެ ބޭނުމެއް ނުހިފުނެވެ. 

މި ނަތީޖާއާއެކު އާސެނަލްއަށް ލިވަޕޫލްއާ ދެމެދު އޮތް ފަރަގު މިހާރު ވަނީ 6 ޕޮއިންޓަށް ހަނިކުރެވިފައެވެ. ނަމަވެސް ލިވަޕޫލަށް އޮތް ފައިދާއަކީ، އެ ޓީމު އާސެނަލްއަށް ވުރެން އެއް މެޗު މަދުން ކުޅެފައި އޮތުމެވެ.

މެޗަށްފަހު އާސެނަލްގެ ކޯޗު މައިކަލް އާޓޭޓާ ބުނެފައިވަނީ، އެ ޓީމު އޮތީ ލިވަޕޫލަށް ހެދޭ ގޯސްތަކުގެ ފައިދާނަގައި، ލީގު ކާމިޔާބު ކުރުމުގެ އަޒުމުގައި ކަމަށެވެ.