މޯލްޑިވިއަންގެ ވައިޑްބޮޑީ ބޯޓު ގެނައުމާއެކު އަގުހުރި އިނާމުތަކާއި ޚާއްޞަ މުބާރާތެއް

މޯލްޑިވިއަންގެ ފުރަތަމަ ވައިޑްބޮޑީ އެއަރކްރާފްޓް ކަމުގައިވާ އޭ-330 ބޯޓު ރާއްޖެ އައުމާ ގުޅިގެން، އަގުހުރި އިނާމުތަކާއެކު ފޮޓޯ އަދި ވީޑިއޯގްރަފީ މުބާރާތަކާއި ގިނަ އިނާމުތައް ހިމެނޭ ލަކީޑްރޯއެއް ބޭއްވުމަށް ވަނީ ހަމަޖެހިފައެވެ. މި ބޯޓު ރާއްޖެ އަންނާނީ އަންނަ ހޯމަ ދުވަހު ކަމަށް މޯލްޑިވިއަނުން މަޢުލޫމާތު ދީފައިވެއެވެ.

ވައިޑްބޮޑީ ފްލައިޓްގެ ޚިދުމަތް ފެށުން ފާހަގަކުރުމުގެ ރަސްމީ ޖަލްސާ އޮންނާނީ މި މަހުގެ 6 ވަނަ ދުވަހު ވެލާނާ އިންޓަނޭޝަނަލް އެއަރޕޯޓުގައެވެ. އަދި އެ ދުވަހު ހަވީރު 5:00 އިން 5:30 އަށް މާލޭގެ އުސްފަސްގަނޑު ސަރަހައްދާއި ހުޅުމާލޭގެ ފުރަތަމަ އަދި ދެވަނަ ފިޔަވަހީގެ އިރުމަތީ ގޮނޑުދޮށު ސަރަހައްދުގައި ޚާއްޞަ އެއަރ ޝޯވއެއް ބޭއްވުމަށް ވަނީ ހަމަޖެހިފައެވެ.

މި ހަރަކާތުގެ ތެރެއިން، އަގުބޮޑު އިނާމުތަކާއެކު ފޮޓޯ އަދި ވީޑިއޯ މުބާރާތެއް ބޭއްވުމަށް ވަނީ ހުޅުވާލާފައެވެ. މި މުބާރާތުގެ 1 ވަނަ އިނާމަކީ ރާއްޖޭގެ 5 ތަރީގެ ރިސޯޓެއްގައި 2 ރޭ ހޭދަކުރުމުގެ ފުރުޞަތު ދެ މީހަކަށް ދިނުމެވެ. 2 ވަނަ އިނާމަކީ އިންޑިއާ ދެކޮޅު ޓިކެޓު ދެމީހަކަށް ދިނުމެވެ. އަދި 3 ވަނަ އިނާމަކީ ރާއްޖޭގެ މަންޒިލަކަށް ދެ މީހަކަށް ދެކޮޅު ޓިކެޓު ދިނުމެވެ.

މީގެ އިތުރުން، ޖެނުއަރީ 11 ވަނަ ދުވަހު ހުޅުމާލެ ސެންޓްރަލް ޕާކުގައި ޚާއްޞަ އާއިލީ ހަވީރެއް ބޭއްވުމަށް ވަނީ ހަމަޖެހިފައެވެ. މި ހަވީރުގައި އަގުބޮޑު އިނާމުތައް ހިމެނޭ 30 ލަކީޑްރޯއެއް ނެގުމަށް ވަނީ ހަމަޖެހިފައެވެ. މި ލަކީޑްރޯގެ އިނާމުގެ ގޮތުގައި ބައިނަލްއަޤްވާމީ އަދި އެތެރޭގެ އުދުހުންތަކުގެ ޓިކެޓްތައް ހިމެނެއެވެ.

📸 Prepare your cameras for the skies! ✈️ Don’t miss this airshow! ✨ Join our photo & videography competition and capture the magic in the air. #MaldivianAero pic.twitter.com/cQsl9EuAA6

— MaldivianAero (@MaldivianAero) January 1, 2025

މޯލްޑިވިއަންއަށް ގެންނަ ވައިޑްބޮޑީ މަތިންދާ ބޯޓަކީ 264 މީހުންގެ ޖާގައިގެ އޭ-330 މާކާގެ ބޯޓެކެވެ. މި ބޯޓު ރާއްޖެ ގެންނަ ދަތުރުގައި ބައިވެރިވާނީ ހަމައެކަނި ދިވެހިންކަމަށް މޯލްޑިވިއަންއިން މަޢުލޫމާތު ދީފައިވެއެވެ. އަދި މި ބޯޓުގެ ދަތުރުތައް ފުރަތަމަ ފަށާނީ ޗައިނާގެ 3 މަންޒިލަކަށް ކަމަށްވެސް މަޢުލޫމާތު ދީފައިވެއެވެ.