ބްރިސްބޭން އިންޓަނޭޝަނަލް: ޖޮކޮވިޗް އަދި ކިރްގިއޯސްގެ ޕެއަރ ޑަބަލްސްގެ ދެވަނަ ބުރުން ކަޓައިފި

ބްރިސްބޭން އިންޓަނޭޝަނަލްގެ ދެވަނަ ބުރުން، ނޯވަކް ޖޮކޮވިޗް އަދި ނިކް ކިރްގިއޯސްގެ ޕެއަރ ކަޓައިފިއެވެ. އެ ޕެއަރ މުބާރާތުން އަލްވަދާއު ކިޔަންޖެހުނީ، އެ ޕެއަރއަށް ވުރެން މަތިން ސީޑް ކޮށްފައިވާ ނިކޮލާ މެކްޓިކް އަދި މައިކަލް ވީނަސްގެ ޕެއަރ އަތުން ހަނި ގޮތަކަށް ބަލިވެގެންނެވެ.

މި މެޗަށް ނިކުތުމުގެ ކުރިން، 18 މަސްދުވަހު އަނިޔާގެ ސަބަބުން ކުޅުމާއި ދުރުގައި ހުރުމަށްފަހު ކޯޓަށް ނިކުމެ ކުޅުނު ސިންގަލްސް މެޗުން ވެސް 29 އަހަރުގެ ކިރްގޯސް ވަނީ ބަލިވެފައެވެ. 

ނަމަވެސް އޮސްޓްރޭލިއާގެ ކިރްގޯސް ކުރިން ހުރީ މި އަހަރުގެ ފުރަތަމަ ގްރޭންޑް ސްލޭމް މުބާރާތް ކަމުގައިވާ، މި މަހު ފަށާ އޮސްޓްރޭލިއަން އޯޕަންގައި އަނިޔާގެ ސަބަބުން ކުޅެވޭނެ ކަމުގެ އުއްމީދެއް ނެތިއެވެ. 

ޖޮކޮވިޗް އާއި ކިރްގޯސްގެ ޕެއަރއަށް ފުރަތަމަ ސެޓު ގެއްލުނީ 6-2 އިންނެވެ. ނަމަވެސް ދެވަނަ ސެޓުގައި ކުޅުން ރަގަޅުކޮށް، އެ ޕެއަރ ވަނީ އެ ސެޓު 6-3 އިން ކާމިޔާބު ކޮށްފައެވެ.

ފަހު ސެޓުގައި މެޗު ލިބެން ދެ ޕޮއިންޓަށް ވެފައިވަނިކޮށް، ސްކޯރ 8-6 ގައި އޮއްވައި، ޖޮކޮވިޗަށް ހެދުނު ދެ ގޯހެއްގެ ފައިދާނަގައި މެކްޓިކް އަދި ވީނަސް ވަނީ ނަތީޖާ ހަމަހަމަ ކުރިއެވެ. އަދި އެއަށްފަހު އެ ސެޓު 10-8 އިން ކާމިޔާބު ކުރިއެވެ. 

މެޗަށްފަހު ވާހަކަ ދައްކަމުން މެކްޓިކް ބުނީ، ޖޮކޮވިޗް ހުރި ޕެއަރ ބަލިކުރެވުމަކީ ވަރަށް ބޮޑު އުފަލެއް ކަމަށާއި، އެ ފެންވަރުގެ ކުޅުންތެރިންނާ ދެކޮޅަށް ފައިދާ ނެގުމަށް ލިބޭނީ މަދު ފުރުސަތެއް ކަމަށެވެ. އަދި އެ ފުރުސަތުގެ ބޭނުން ހިފައިފިނަމަ ބަލިކުރެވޭނެ ކަމަށެވެ.

ޖޮކޮވިޗް ވަނީ މި މުބާރާތުގައި ސިންގަލްސްގެ ކުއާޓާ ފައިނަލަށް ދަތުރުކޮށްފައެވެ. ކުއާޓާގައި އޭނާ ބައްދަލު ކުރަން ޖެހޭނީ ފްރާންސްގެ ގައެލް މޮންފިލްސްއާއެވެ. އަދި މި މުބާރާތް ކާމިޔާބު ކުރެވިއްޖެނަމަ، އޭޓީޕީގެ 100 ތަށި އޭނާއަށް ކާމިޔާބު ކުރެވުނީއެވެ.