ބަންގްލަދޭޝްގައި ގައި ޑޮކްޓަރުކަން ކިޔެވުމަށް  ސްކޮލަރޝިޕް ފުރުޞަތު ހުޅުވާލައިފި

މަތީ ތަޢުލީމާއި މަސައްކަތްކުރުމާއި ހުނަރުތައް ތަރައްޤީކުރުމާ ބެހޭ ވުޒާރާއިން ބަންގްލަދޭޝްގައި ޑޮކްޓަރުކަން ކިޔެވުމަށް 7 ސްކޮލަރޝިޕަކަށް އެދުމުގެ ފުރުޞަތު ހުޅުވާލައިފިއެވެ. މިއީ ސާކްގެ ޤައުމުތަކަށް ހުޅުވާލި ސްކޮލަޝިޕް ޕްރޮގްރާމެއްގެ ތެރެއިން ރާއްޖެއަށް ލިބިފައިވާ ފުރުޞަތުތަކެކެވެ.

މި ސްކޮލަރޝިޕްތަކުގެ ދަށުން ކިޔެވޭނީ ބަންގްލަދޭޝްގެ ޔުނިވަރސިޓީތަކުގައެވެ. އޭގެ ތެރޭގައި ހިމެނެނީ އެމްބީބީއެސްގެ ބެޗްލަރސް ޑިގްރީގެ 6 ފުރުޞަތަކާއި، ބީޑީއެސްގެ ބެޗްލަރސް ޑިގްރީގެ 1 ފުރުޞަތެވެ.

މި ސްކޮލަރޝިޕަށް ކުރިމަތިލާ ފަރާތްތަކުން މޯލްޑިވްސް މެޑިކަލް އެންޑް ޑެންޓަލް ކައުންސިލުން ކަނޑައަޅުއްވާފައިވާ ޝަރުތުތައް ފުރިހަމަވާންޖެހެއެވެ. އަދި ބަންގްލަދޭޝް މެޑިކަލް އެންޑް ޑެންޓަލް ކައުންސިލްގެ ވެބްސައިޓްގައި ނުވަތަ ކޯސް ހިންގާ ޔުނިވަރސިޓީން އިތުރު ޝަރުތެއް ކަނޑައަޅާފައިވާނަމަ އެ ޝަރުތުތައްވެސް ފުރިހަމަވާންޖެހޭނެއެވެ.

މަތީ ތަޢުލީމާބެހޭ ވުޒާރާއިން ވިދާޅުވެފައިވަނީ މި ސްކޮލަރޝިޕަށް އެޕްލައިކުރާ ފަރާތްތަކުގެ ތެރެއިން ޝަރުތު ހަމަވާ ހުރިހާ ކެންޑިޑޭޓުން ނޮމިނޭޓް ކުރެވޭނެ ކަމަށެވެ. އެއަށްފަހު ސްކޮލަރޝިޕަށް ހޮވޭ ދަރިވަރުން ކަނޑައަޅާނީ ބަންގްލަދޭޝް ހެލްތް ޕްރޮޓެކްޝަން އިންސްޓިޓިއުޓް (ބީއެޗްޕީއައި) ގެ ފަރާތުންނެވެ.

ސްކޮލަރޝިޕަށް އެދި ހުށަހެޅުމުގެ ފުރުޞަތު މަތީ ތަޢުލީމާބެހޭ ވުޒާރާގެ މައި އެޑިޔު ޕޯޓަލް މެދުވެރިކޮށް ހުޅުވާލާފައިވެއެވެ. ހުށަހެޅުންތައް ބަލައިގަތުމުގެ ސުންގަޑިއަކީ މި މަހުގެ 14 ވާ އަންގާރަ ދުވަހުގެ މެންދުރު 12:00 އެވެ. މި ސްކީމްގެ ދަށުން ކޯސް ފުރިހަމަކުރެވޭނެ ޔުނިވަރސިޓީތަކާއި ކޮލެޖްތަކުގެ މަޢުލޫމާތު މިނިސްޓްރީގެ ވެބްސައިޓުން ލިބެން ހުންނާނެކަމަށް މަތީ ތަޢުލީމާބެހޭ ވުޒާރާއިން ވިދާޅުވެފައިވެއެވެ.