އެސްޓީއޯއިން މާފަންނު މަޖީދީމަގުގައި ޒަމާނީ ބޭސްފިހާރައެއް ހުޅުވައިފި

ސްޓޭޓް ޓްރޭޑިން އޮގަނައިޒޭޝަން (އެސްޓީއޯ) އިން މާލޭގެ މާފަންނު މަޖީދީމަގުގައި އައު ބޭސްފިހާރައެއް މިއަދު ހުޅުވައިފިއެވެ. މި ބޭސްފިހާރަ ހުޅުވާފައިވަނީ ވެލިގާ ހާޑްވެއަރއާ ޖެހިގެން ހުންނަ އިމާރާތުގެ ފުރަތަމަ ދެ ފަންގިފިލާގައެވެ.

އެސްޓީއޯއިން މަޢުލޫމާތު ދެއްވިގޮތުގައި، މި ސަރަހައްދުގައި ގިނަ ކްލިނިކްތަކެއް ހުރުމާއެކު، ޑޮކްޓަރަށް ދައްކާ ފަރާތްތަކަށް އެސްޓީއޯގެ ފާމަސީގެ ޚިދުމަތް ފަސޭހައިން ލިބޭނެ ގޮތް ހަމަޖެއްސުމަށްޓަކައި މި ސަރަހައްދުގައި ބޭސްފިހާރައެއް ހުޅުވުމަށް ނިންމާފައިވަނީއެވެ.

މި އައު ބޭސްފިހާރައަކީ ޒަމާނީ ކޮންސެޕްޓަކަށް ބިނާކޮށް ހުޅުވާފައިވާ ފާމަސީއެކެވެ. މިތަނުން ބޭހުގެ އިތުރުން، ހޮސްޕިޓަލް އަދި ގޭގައި ބޭނުންކުރާ މެޑިކަލް އެކުއިޕްމަންޓް، ހޯމްކެއަރ އަދި ޕަރސަނަލް ކެއަރ ރޭންޖްގެ ގިނަ ބާވަތްތަކެއް ލިބެން ހުންނާނެއެވެ.

ބޭސްފިހާރައިގެ ދެވަނަ ފަންގިފިލާ ޚާއްޞަކޮށްފައިވަނީ މެޑިކަލް އިކުއިޕްމަންޓްސްއާއި މެޑިކަލް ކޮންޒިލް ކޮންޒިއުމަބަލްސްގެ ޒަމާނީ އުފެއްދުންތަކަށެވެ. މީގެއިތުރުން، ހޯލްސޭލް ކަސްޓަމަރުންނަށް ޚާއްޞަ ކައުންޓަރެއްވެސް ދެވަނަ ފަންގިފިލާގައި ހުންނާނެއެވެ.

މި އައު ބޭސްފިހާރަ ހުޅުވިފައި ހުންނާނީ ކޮންމެ ދުވަހަކު ހެނދުނު 8:00 އިން ރޭގަނޑު 10:00 އަށެވެ. ހުކުރު ދުވަހު ހުޅުވޭނީ މެންދުރުފަހު 2:00 އިން ރޭގަނޑު 10:00 އަށެވެ.

އެސްޓީއޯއިން ބުނާގޮތުގައި، އެ ކުންފުނިން އަބަދުވެސް މަސައްކަތްކުރަމުންދަނީ އާންމު ރައްޔިތުންނަށް ބޭނުންވާ ޚިދުމަތްތައް ފަސޭހަކަމާއެކު ލިބޭނެ އިންތިޒާމު ހަމަޖެއްސުމަށެވެ. މި އައު ބޭސްފިހާރައިގެ އިތުރުން، އެސްޓީއޯއިން ހެންވޭރު މަޖީދީމަގުގައިވެސް ބޭސްފިހާރައެއް ހިންގަމުންދާކަން ފާހަގަކޮށްލެވެއެވެ.