ނިއު އޯލިއަންސްގައި ދާއިޝް ޖަންގުލީއިން ދިން ހަމަލާއެއްގައި 15 މަރު

އެމެރިކާގެ ނިއު އޯލިއަންސް ސިޓީގައި އައު އަހަރުގެ ފާހަގަކުރުން ކުރިއަށްދަނިކޮށް، އިސްލާމިކް ސްޓޭޓް (ދާއިޝް) ޖަންގުލީގެ ދިދަ ހަރުކޮށްފައިވާ  ޓްރަކެއް ގައިއައިސް ދިން ހަމަލާއެއްގައި 15 މީހުން މަރުވެއްޖެއެވެ. މި ހަމަލާ ދިން މީހާ ވަނީ ފުލުހުންގެ އަތުން މަރުވެފައެވެ.

އެފްބީއައިން ބުނެފައިވާ ގޮތުގައި މި ހަމަލާ ދިން މީހާއަކީ ޝަމްސުއްދީން ޖައްބާރު (42 އަހަރު) ނަމަކަށް ކިޔާ ޓެކްސާސްގެ އެމެރިކާ ރައްޔިތެކެވެ. އޭނާއަކީ ކުރީގެ އެމެރިކާ އާމީ ސިފައިންގެ މީހެކެވެ. އޭނާ މި ހަމަލާ ދިނީ އައު އަހަރުގެ ފުރަތަމަ ދުވަހުގެ ފަތިހު 2:00 ހާއިރުއެވެ.

ފުލުހުންގެ ބްލޮކޭޑް ފަހަނައަޅައި ގޮސް އޭނާ ޓްރަކް ދުއްވާލީ ބޫބަން މަގުގައި ތިބި މީހުންނާއި ދިމާލަށެވެ. މި ހަމަލާގައި 15 މީހުން މަރުވެ، އެތައް ބަޔަކު ޒަޚަމްވިއެވެ. ހަމަލާ ދިނުމަށްފަހު ޓްރަކުން ފައިބައި އޭނާ ފުލުހުންނާ ދިމާލަށް ބަޑި ޖަހަން ފެށުމުން، ފުލުހުން ވަނީ އޭނާ މަރާލާފައެވެ.

އެފްބީއައިން ބުނެފައިވާ ގޮތުގައި މި ހަމަލާއަކީ ޓެރަރިސްޓް ހަމަލާއެއްގެ ގޮތުގައި ބަލައި ތަޙުޤީޤު ކުރަމުންދެއެވެ. އަދި މިކަމުގައި ޝާމިލްވަނީ ހަމަލާ ދިން މީހާ އެކަނި ނޫންކަމަށް ޤަބޫލުކުރެވޭ ކަމަށް އެފްބީއައިން ބުނެފައިވެއެވެ. ހަމަލާ ދިން ޓްރަކުން އަދި ފްރެންޗް ކުއާޓަރުގެ އެހެން ތަންތަނުން ވެސް ހަތިޔާރާއި ގޮވާ ތަކެތި ފެނިފައިވާ ކަމަށް އެފްބީއައިން މަޢުލޫމާތު ދީފައިވެއެވެ.

މި ހަމަލާގެ އިތުރުން ހޮނޮލޫލޫ އަދި ލާސް ވޭގާސްގައި ވެސް ގޮވުމުގެ އަޑު އިވިފައިވާ ކަމަށް ބުނެވެއެވެ. ނަމަވެސް މި ހާދިސާތަކާއި ނިއު އޯލިއަންސްގެ ހަމަލާއާ ގުޅުމެއް އޮތްކަން އަދި ކަށަވަރުވެފައެއް ނުވެއެވެ.

އެމެރިކާގެ ރައީސް ޖޯ ބައިޑެން މި ހަމަލާ ކުށްވެރިކޮށް، މަރުވި މީހުންގެ ޢާއިލާތަކަށް ތަޢުޒިޔާ ފާޅުކުރައްވާފައިވެއެވެ. އަދި މި ހަމަލާއާ ގުޅޭ އިތުރު މަޢުލޫމާތު ލިބުމުން އިތުރު ބަޔާނެއް ނެރުއްވާނެ ކަމަށް ވިދާޅުވެފައިވެއެވެ.