24 ވަނަ ޤައުމީ ކެޑޭޓް ކޭމްޕުގެ ޕާސިންގ އައުޓް ޕެރޭޑް ބާއްވައިފި

ދިވެހި ރާއްޖޭގެ ކެޑޭޓުންނަށް އަމާޒުކޮށްގެން އެމްއެންޑީއެފުން ހިންގި 24 ވަނަ ޤައުމީ ކެޑޭޓް ކޭމްޕުގެ ޕާސިންގ އައުޓް ޕެރޭޑް ރަސްމިއްޔާތު އިއްޔެ ގިރިފުށީ ޓްރެއިނިންގ ސެންޓަރުގައި ބާއްވައިފިއެވެ. މި ރަސްމިއްޔާތު ޝަރަފުވެރިކޮށްދެއްވީ ޗީފް އޮފް ޑިފެންސް ފޯސް، މޭޖަރ ޖެނެރަލް އިބްރާހީމް ޙިލްމީއެވެ.

2024 ޑިސެންބަރު 21 އިން 2025 ޖަނަވަރީ 1 ވަނަ ދުވަހުގެ ނިޔަލަށް ކުރިޔަށްގެންދިޔަ މި ކޭމްޕުގައި ރާއްޖޭގެ އެކިކަންކޮޅުތަކުން 44 ސްކޫލަކުން، 120 ދަރިވަރުން ބައިވެރިވިއެވެ. މީގެތެރޭގައި ހިމެނެނީ، 66 ފިރިހެން ދަރިވަރުންނާއި 54 އަންހެން ދަރިވަރުންނެވެ. އަދި އިންޓަނޭޝަނަލް ކެޑޭޓް އެކްސްޗޭންޖް ޕްރޮގްރާމުގެ ދަށުން އިންޑިއާ، ސްރީލަންކާ އަދި ނޭޕާލުން 12 ކެޑޭޓުންނާއި 3 އޮފިސަރުން ވަނީ މި ކޭމްޕަށް ޒިޔާރަތްކޮށްފައެވެ.

ރަސްމިއްޔާތުގައި ވަނަވަނައަށް ހޮވުނު ކެޑޭޓުންނަށް ތަށްޓާއި ޝީލްޑް ހަވާލުކޮށްދެއްވީ ޗީފް އޮފް ޑިފެންސް ފޯސް، މޭޖަރ ޖެނެރަލް އިބްރާހީމް ޙިލްމީއެވެ. އެންމެ މޮޅު ފިރިހެން ދަރިވަރުގެ މަޤާމު ހާސިލުކުރީ އއ.މަތިވެރި ސްކޫލުގެ ކެޑޭޓް ކޯޕްރަލް މުޙައްމަދު ޒިމްޔާންއެވެ. އެންމެ މޮޅު އަންހެން ދަރިވަރުގެ މަޤާމު ހާސިލުކުރީ އަޙްމަދިއްޔާ އިންޓަނޭޝަނަލް ސްކޫލުގެ ކެޑޭޓް ކޯޕްރަލް ފާޠިމަތު މައިހާ މުޙައްމަދެވެ.

ކެޑޭޓުންނަށް އަމާޒުކޮށްގެން އެމްއެންޑީއެފުން ހިންގި 24 ވަނަ ޤައުމީ ކެޑޭޓް ކޭމްޕުގެ ޕާސިންގ އައުޓް ޕެރޭޑް ރަސްމިއްޔާތު ބާއްވައިފި.https://t.co/AaWmFYeXsT pic.twitter.com/ahqO82rMtY

— Maldives National Defence Force (@MNDF_Official) January 2, 2025

ކެޑޭޓް ކޭމްޕްގެ މައިގަނޑު މަޤްޞަދަކީ ކެޑޭޓުންނަކީ މުޖުތަމަޢުއަށް ފައިދާހުރި، ޒިންމާދާރު ރައްޔިތުންތަކެއްގެ ގޮތުގައި ބިނާކުރުމާއި، ދީނީ އަދި ޤައުމީ ރޫޙު އާލާކުރުމާއި، އަސްކަރީ ހުނަރުތައް ދަސްކޮށްދިނުމެވެ.

މި ރަސްމިއްޔާތުގައި އެމްއެންޑީއެފްގެ އިސް އޮފިސަރުންނާއި، ކެޑޭޓް ކޭމްޕްގެ އިންސްޓްރަކްޓަރުންނާއި އަދި ކެޑޭޓް ދަރިވަރުންގެ ބެލެނިވެރިން ބައިވެރިވެލެއްވިއެވެ.