ޢުމްރާވެރިން އެނބުރި އައުމާއެކު އެއަރޕޯޓަށް ބާރުބޮޑުވާނެތީ ދުރާލާ ދިއުމަށް އިލްތިމާސްކޮށްފި

މާދަމާ ވެލާނާ އިންޓަނޭޝަނަލް އެއަރޕޯޓަށް ބާރުބޮޑުވާނެތީ، ދަތުރުކުރާ ފަރާތްތަކުން ދުރާލާ އެއަރޕޯޓަށް ދިއުމަށް މޯލްޑިވްސް އެއަރޕޯޓް ކޮމްޕެނީ ލިމިޓެޑް (އެމްއޭސީއެލް) އިން އިލްތިމާސްކޮށްފިއެވެ. މިގޮތަށް އިލްތިމާސްކޮށްފައިވަނީ މިދުވަސްވަރަކީ ޕީކް ސީޒަނަށް ވެފައި، ޑިސެމްބަރުމަހު ޢުމްރާގެ އަޅުކަމަށްދިޔަ ދިވެހިން މާދަމާ އެނބުރި އަންނަން ފަށާފައިވާތީއެވެ.

އެމްއޭސީއެލްއިން މަޢުލޫމާތު ދެއްވިގޮތުގައި، މާދަމާ ހެނދުނު 6:00 އިން 9:00 އާ ހަމައަށް ގާތްގަނޑަކަށް 2,678 މީހުން ރާއްޖެ އައުމަށް ހަމަޖެހިފައިވާއިރު، އޭގެ ތެރޭގައި 618 ޢުމްރާވެރިން ހިމެނެއެވެ. އަދި މެންދުރު 14:00 އިން 16:00 އަކާ ދެމެދު 2,071 މީހުން ރާއްޖެއައުމަށް ހަމަޖެހިފައިވާއިރު އޭގެ ތެރޭގައި 452 ޢުމްރާވެރިން ހިމެނެއެވެ.

މި ސަބަބަށްޓަކައި، މާދަމާއަކީ ވެލާނާ އިންޓަނޭޝަނަލް އެއަރޕޯޓުގެ މަގުތަކާއި، ޓަރމިނަލް ސަރަހައްދަށް ބާރުބޮޑު ދުވަހަކަށްވާނެ ކަމަށް އެމްއޭސީއެލްއިން ބަޔާންކޮށްފައިވެއެވެ. އެހެންކަމުން އެއަރޕޯޓަށް ފުރަންދާ ފަރާތްތަކުން، ފުރުމަށް ކަނޑައެޅިފައިވާ ވަގުތުގެ އެންމެ ލަސްވެގެން 3 ގަޑިއިރު ކުރިން އެއަރޕޯޓަށް ދިއުމަށް އެމްއޭސީއެލުން ވަނީ ބާރުއަޅުއްވާފައެވެ.

އިތުރުން، އެއަރޕޯޓުގެ އޮޕަރޭޝަންތައް ވީހާވެސް ފަސޭހަކަމާއެކު ކުރިއަށްގެންދިއުމަށްޓަކައި، އެއަރޕޯޓް ސްޓާފުން ދެއްވާ އިރުޝާދާއެއްގޮތަށް އަމަލުކުރުމަށް އާންމުންގެ ފަރާތުން އެމްއޭސީއެލްއިން ވަނީ އެދިވަޑައިގެންފައެވެ.

އިސްލާމީ ކަންތައްތަކާ ބެހޭ ވުޒާރާއިން ހާމަކުރައްވާފައިވާ ގޮތުގައި، މިދިޔަ ޑިސެމްބަރުމަހަކީ ފަހުގެ ތާރީޚެއްގައި ރިކޯޑް ޢަދަދަކަށް ދިވެހިން ޢުމްރާގެ އަޅުކަމަށް ދިޔަ މަހެކެވެ. މިގޮތުން އެކި ކުންފުނިތަކުގެ ޙަވާލުގައި 6,300 އަށްވުރެ ގިނަ ދިވެހިން ޢުމްރާގެ އަޅުކަމަށް ގޮސްފައިވެއެވެ. މި ޢުމްރާވެރިން އެނބުރި ރާއްޖެއަށް އައުމާ ގުޅިގެން އެއަރޕޯޓަށް ކުރިމަތިވެދާނެ ތޮއްޖެހުމަށް ތައްޔާރުވުމުގެ ގޮތުން އެމްއޭސީއެލްއިން މިފަދަ އިލްތިމާސެއް ކޮށްފައިވަނީއެވެ.