ދުނިޔެ / ޚަބަރު
ސީރިއާގެ ފޮރިން މިނިސްޓަރ ސައުދީއަށް ވަޑައިގެންފި

މި ދަތުރުފުޅުގެ ބޭނުމަކީ ދެ ގައުމުގެ ގުޅުން ބަދަހިކުރުން ކަމަށް ސީރިއާގެ އައު ފޮރިން މިނިސްޓަރ ބުނެފައިވޭ، ފޮޓޯ: ރޮއިޓާސް
ހުލާސާ
ސީރިއާގެ ފޮރިން މިނިސްޓަރ ސައުދީއަށް ވަޑައިގެންނެވިއިރު، އެ ގައުމުގެ އިޤްތިޞާދާއި އިންފްރާސްޓްރަކްޗަރ ދާހިލީ ހަނގުރާމައިގެ ސަބަބުން ވަނީ ފުނޑުފުނޑު ވެފައި.
ސީރިއާގެ ފޮރިން މިނިސްޓަރކަމަށް އަލަށް އައްޔަންކޯށްފައިވާ، އަސާދު އަލް ޝައިބާނީ ރަސްމީ ދަތުރުފުޅެއްގައި ސައުދީ އަރަބިއްޔާއަށް ވަޑައިގެންފިއެވެ. މި ދަތުރުފުޅުގެ ބޭނުމަކީ އެކުވެރިކަމުގެ އައު ޞަފްޙާއެއް ހުޅުވާލުންކަމަށް އަސާދު ބުނެފައިވެއެވެ.
ބުދަ ދުވަހު އަސާދު ފެށި މި ދަތުރުފުޅަކީ ސީރިއާގެ ރައީސް ބައްޝާރު އަލް އަސަދު މަގާމުން ބޭލިތާ މަހެއް ވެސް ނުވަނީސް ފޮރިން މިނިސްޓަރ ކުރައްވަމުން ގެންދަވާ ދަތުރު ފުޅެކެވެ. މި ދަތުރުފުޅުގައި ޑިފެންސް މިނިސްޓަރ މުރްހަފް އަބޫ ޤަސްރާ އާއި ހެޑް އޮފް ޖެނެރަލް އިންޓެލިޖެންސް ސާވިސް އަނަސް ޚައްޠާބު ވަނީ ބައިވެރިވެ ވަޑައިގެންފައެވެ.
އަސާދު އެކްސްގައި ކުރެއްވެވި ޕޯސްޓެއްގައި ދަތުރުފުޅުގެ ވާހަކަ ހިއްސާ ކުރަމުން ވިދާޅުވީ، ސީރިއާ މިނިވަންވީފަހުން ސައުދީއަށް މި ކުރި ދަތުރުފުޅުގައި އެންމެ ބޮޑަށް މަސައްކަތްޕުޅު ކުރައްވާނީ ދެ ގައުމުގެ ދޭތެރޭގައި އޮތް ގުޅުން ބަދަހިކޮށް، އެކަމުން ދެ ގައުމަށް ފައިދާ ވާނެ ގޮތަކަށް ކުރިޔަށް ދިއުމަށް ކަމަށެވެ.
ސީރިއާގެ ސަރުކާރުން ހިންގާ ޓީވީ ޗެނަލަކުން ރިޕޯޓުކޮށްފައިވާ ގޮތުގައި، އަސާދު އާއި ޑެލިގޭޝަން ސައުދީއަށް ވަޑައިގެންނެވީ ސައުދީގެ ފޮރިން މިނިސްޓަރުގެ ދައުވަތަކަށެވެ.
މި ދަތުރުފުޅާ ގުޅިގެން ދެ ގައުމުން ހިއްސާކުރި ބަޔާނެއްގައި ބުނީ، އަސާދު އާއި ޑެލިގޭޝަނަށް އެއަރޕޯޓުން މަރުހަބާ ވިދާޅުވީ، ސައުދީ އަރަބިއްޔާގެ ވައިސް ފޮރިން މިނިސްޓަރ ވަލީދު ބިން އަބްދުލް ކަރީމް އެލް ޚަރަޖީ ކަމަށެވެ.
ސީރިއާގެ ފޮރިން މިނިސްޓަރ ސައުދީއަށް ވަޑައިގެންނެވިއިރު، އެ ގައުމުގެ އިޤްތިޞާދާއި އިންފްރާސްޓްރަކްޗަރ ދާހިލީ ހަނގުރާމައިގެ ސަބަބުން ވަނީ ފުނޑުފުނޑު ވެފައެވެ.