މެޗުތައް ކާމިޔާބު ނުކުރެވުނު ނަމަވެސް، ދެވަނަ މެޗުގައި ރާއްޖެ ޓީމުން އިންޑިއާ ކޮޅަށް ގޯލެއް ކާމިޔާބުކޮށްފި

ރާއްޖޭގެ ގައުމީ އަންހެން ފުޓުބޯޅަ ޓީމުން އިންޑިއާއާއެކު ކުޅުނު ފީފާ އިންޓަނޭޝަނަލް ރަހްމަތްތެރިކަމުގެ ދެވަނަ މެޗުން ވެސް ނާކާމިޔާބާ ކުރިމަތިލާން ޖެހިއްޖެއެވެ. ނަމަވެސް، މިފަހަރު އޮތް ހިތްހަމަ ޖެހުމަކީ ފުރަތަމަ މެޗަށް ވުރެން ފަރަގު ކުޑަކުރެވި، އިންޑިއާ ކޮޅަށް ގޯލެއް ކާމިޔާބު ކުރުމެވެ. 

މި ދެ ޓީމު ކުޅުނު ފުރަތަމަ މެޗު އިންޑިއާއިން 14-0 އިން ކާމިޔާބުކުރި ނަމަވެސް، ދެވަނަ މެޗު އެ ޓީމަށް ކާމިޔާބު ކުރެވުނީ 11-1 އިންނެވެ. ދެވަނަ މެޗުގައި ރާއްޖޭގެ ޓީމުން ވަނީ ކުރީ މެޗަށް ވުރެން ރަގަޅަށް ކުޅެފައެވެ. 

ބެންގަލޫރުގެ ޕަޑުކޯނޭ ޑްރާވިޑް ސެންޓަރ ފޯރ ސްޕޯޓްސް އެކްސެލެންސްގައި ކުޅުނު މި މެޗުގައި ރާއްޖެ ޓީމުން ކާމިޔާބުކުރި ހަމައެކަނި ގޯލު، މެޗުގެ ފުރަތަމަ ހާފުގައި ކާމިޔާބުކޮށްފައި ވަނީ މަރިޔަމް ރިފާއެވެ. މިއީ އިންޑިއާގެ އަންހެން ގައުމީ ފުޓުބޯޅަ ޓީމު ކޮޅަށް ރާއްޖޭއިން ކާމިޔާބުކުރި ފުރަތަމަ ގޯލު ވެސް މެއެވެ.

މި މެޗުގައި އިންޑިއާގެ ގައުމީ ޓީމަށް އަލަށް ކުޅުނު ހިންޑެއިކިމް ވަނީ ހެޑްރިކް ހަދާފައެވެ. އޭނާ ވަނީ ކޮންމެ ހާފަކު ދެ ގޯލު ކާމިޔާބުކޮށްފައެވެ. 

އިންޑިއާ ޓީމަށް ދެން ގޯލުތައް ކާމިޔާބު ކޮށްދިނީ، ކާޖޮލް ޑިސޫޒާ، ޕޫޖާ، ސިބާނީ ދޭވީ، ސިމްރަން ގުރުންގް އަދި ހުމުކްޗަމް ބުމިކާ ދޭވީއެވެ. މީގެ ތެރެއިން ސިމްރަން ގުރުންގް ދެ ގޯލު ކާމިޔާބުކޮށްފައިވާއިރު، ރާއްޖޭގެ ހައްވާ ހަނީފާއަތުން ބައިކޮޅަށް ވެސް ގޯލެއް ވަދެފައި ވެއެވެ. 

މި މެޗުތައް ކުޅުމަށް ރާއްޖޭގެ ޓީމަށް ތައްޔާރުވާން ލިބުނީ 10 ދުވަހެވެ. މީގެ އިތުރުން، ޓީމުގެ ކޯޗު، މުހައްމަދު ނިޒާމް (ނިޒާމްބެ) ފާހަގަކޮށްފައިވާ ގޮތުގައި، މުބާރާތެއް ނުކުޅެ ހަމައެކަނި ޕްރެކްޓިސްތަކެއް ކޮށްލައިގެން ރަގަޅު ނަތީޖާއެއް ނުނެރެވޭނެއެވެ. ނަމަވެސް އުންމީދަކީ އަންހެން ފުޓްބޯޅައިގެ މުބާރާތްތަކެއް ބޭއްވިގެން ދިއުންކަމަށް ނިޒާމްބެ ވަނީ ބުނެފައެވެ.