ކީރިތި ޤުރްއާނުގެ އަޚުލާޤުން ޒިނާތްތެރިވުމަކީ ދެ ދުނިޔޭގެ ބާއްޖަވެރިކަން ލިބޭނެ ކަމެއް: ޚުޠުބާ

ކީރިތި ޤުރްއާނުގެ އަޚުލާޤުން ޒީނަތްތެރިވުމަކީ އެކަމުގެ ސަބަބުން ގިނަގުނަ ދަރުމައާއި ޘަވާބު ލިބި، ދެ ދުނިޔޭގެ ބާއްޖަވެރިކަން ލިބޭނެ ކަމެއްކަމަށް މިއަދުގެ ހުކުރު ޚުޠުބާގައި ބުނެފިއެވެ.

އަދުގެ ހާލަތަށް އިޝާރާތްކޮށް، ކީރިތި ޤުރްއާން ކިޔެވުމަށާއި އެ ފޮތަށް ޢަމަލު ކުރުމަކީ މުޖުތަމައުގައި މިހާރު އުނދަގޫ ކަމަކަށް ވެފައިވާކަމަށް ފާހަގަކޮށްފައިވެއެވެ. އަދި އެކަމުގެ ސަބަބުން މުޖުތަމައުގެ ފަރުދުން ދީނާ ދުރުވެ، ޣައިރު މުސްލިމުންގެ ކުރިމަތީގައި މުސްލިމުން ބަލިކަށިވެފައިވާކަމަށް ވެސް ޚުޠުބާގައި ފާހަގަކޮށްފައިވެއެވެ. 

ކަން މިހެން އޮތް ނަމަވެސް، ކީރިތި ޤުރްއަނަކީ މުސްލިމުންގެ ހިތާ، ފުރާނައާއި ނަފްސުގެ ކާނާ ކަމަށާއި އަދި ބަލިތަކަށް އޮތް ޝިފާއެއް ކަމުން، ޤުރްއާން ކިޔަވައި ޤުރްއާނަށް ޢަމަލު ކުރުމަކީ އަހަރެމެން މުސްލިމުންގެ މައްޗަށް ވާޖިބު ކަމެކެވެ. 

އަދި ޤުރްއާނުން މީހާ ޒީނަތްތެރި ވުމަކީ ވާޖިބެއްކަން ފާހަގަކޮށް، ތިމާގެ އަޚުލާގުން އެކަން ދައްކާނެ ގޮތްތައް ވަނީ ކިޔާދީފައެވެ.

އެގޮތުން ޤުރްއާނުގެ އެންމެ ފުރަތަމަ ޒީނަތަކީ އެތެރެ ފުށާއި ބޭރު ފުށުގެ ޒީނަތެވެ. ދެވަނަ ޒީނަތަކީ ﷲއަށް ބިރުވެތިވުމުގައި ތިމާގެ ނަފްސު ޒީނަތްތެރި ކުރުމެވެ. 

ކީރިތި ޤުރްއާނުން ލިބޭ ތިންވަނަ ޒީނަތަކީ، އެ ފޮތުގައިވާ ހުރިހާ ކަމެއް ތެދުކޮށް ޤަބޫލުކުރުމެވެ. އެގޮތުން ﷲގެ އެއްކައުވަންތަކަން ޤަބޫލުކޮށް އީމާންކަމާއި އިސްލާމްކަމުގެ ރުކުންތައް ތެދުކޮށް ޤަބޫލުކުރާނަމަ، ތިމާގެ އަމަލާއި ބަސް ދިމާވާންޖެހޭނެކަމަށް ޚުޠުބާގައި ފާހަގަކޮށްފައި ވެއެވެ. 

ޤުރްއާނުގެ ހަތަރު ވަނަ ޒީނަތަކީ މަޑުމައިތިރިވުމާއި ކެތްތެރިވުންކަން ބަޔާންކޮށް ޚުޠުބާގައި ބުނީ، ކެތްތެރިކަމާ ބެހޭގޮތުން ޤުރްއާނުގައި ގިނަ އާޔަތްތަކެއް އައިސްފައިވުމުން އެންގެނީ އެކަމުގެ މުހިންމުކަން ކަމަށެވެ. އަދި ކެތްތެރިވުމުގެ ފޭރާމުން ފޭރާން އެޅުމަކީ، ކީރިތި ޤުރްއާން ޤަބޫލުކުރާ ކޮންމެ މީހަކު ކުރަންޖެހޭނެ ކަމެއް ކަމަށް ޚުޠުބާގައި ފާހަގަ ކުރިއެވެ. މީގެ އިތުރުން، މަޑުމައިތިރިކަމާއެކު ވާހަކަ ދައްކައި ހެދުމަކީ ވެސް ކެތްތެރިވުމުގެ ސިފައެއްކަން ފާހަގަކޮށްފައި ވެއެވެ.

ކީރިތި ޤުރްއާނަކީ މާތް ﷲ އިންސާނުންނަށް ތެދުމަގު ދެއްކެވުމަށްޓަކައި ބާވައިލެއްވި އިލާހީ ޤާނޫނެވެ. އަހަރެމެން މުސްލިމުންގެ އުޅުން ބައްޓަންކުރަން ޖެހޭނީ އެ ފޮތާ އެއްގޮތަށެވެ. އަދި އަހަރެމެންގެ ދަރީންނަށް ކީރިތި ޤުރްއާން އުނގަންނައި ދޭން ޖެހޭނެއެވެ. އެކުދިންގެ ހިތްތަކުގައި ޤުރްއާނަށް ލޯބި ޖެއްސުމަކީ ބެލެނިވެރިންގެ މައްޗަށް ލާޒިމު ކަމެކެވެ.