ޚަބަރު
ށ އަތޮޅު ނަރުދޫއަށް އުދަ އަރައި ގިނަ ގެ ތަކަކަށް ލޮނު ވަދެއްޖެ

ނަރުދޫގައި ފެން ހިންދުމުގެ މަސައްކަތް ކުރިޔަށްދަނީ، ފޮޓޯ: އެމްއެންޑީއެފް
ހުލާސާ
އެ ރަށަށް އުދަ އަރާތާ މިހާރު ތިން ރޭ ވެއްޖެ. ނަމަވެސް އެހެން ރޭރެއާ ޚިލާފަށް، ރޭގައި އުދަ އެރިވަރު ބޮޑު.
ށ އަތޮޅު ނަރުދޫއަށް އުދަ އަރައި، އެ ރަށުގެ ގިނަ ގެ ތަކަކަށް ލޮނުވަދެ، އެކިވަރުގެ ގެއްލުންތައް ވެއްޖެއެވެ.
'ފަރުފުން' އަށް މައުލޫމާތު ދެމުން އެ ރަށުގެ ކައުންސިލްގެ ބޭފުޅަކު ވިދާޅުވީ، އެ ރަށަށް އުދަ އަރާތާ މިހާރު ތިން ރޭ ވެއްޖެ ކަމަށާއި، ނަމަވެސް އެހެން ރޭރެއާ ޚިލާފަށް، ރޭގައި އުދަ އެރިވަރު ބޮޑުކަމަށެވެ. އެހެންކަމުން، ރޭ އެރަށަށް އެރި އުދައިގައި 12 ގެއަކަށް ލޮނުވަދެ، އެކިވަރުގެ ގެއްލުންވެފައިވާ ކަމަށް ވެސް ކައުންސިލުން ވާހަކަ ދެއްކި ބޭފުޅާ ވަނީ މި ނޫހަށް މައުލޫމާތު ދެއްވާފައެވެ.
މި ހާދިސާއާ ގުޅިގެން، މޯލްޑިވްސް ނޭޝަނަލް ޑިފެންސް ފޯސްގެ ނޮދަން އޭރިއާ ކޮމާންޑުން އަންނަނީ ފެން ހިންދުމުގެ މަސައްކަތުގައި އެހީތެރިވަމުންނެވެ.
އަދި ނޭޝަނަލް ޑިޒާސްޓަރ މެނޭޖްމެންޓް އޮތޯރިޓީއިން ބުނެފައިވަނީ، ނަރުދޫ ހިމެނޭހެން ފެން ބޮޑުވެފައިވާ އެއްވެސް ރަށެއްގައި ބޯހިޔާވަހިކަން ގެއްލި އިންސާނީ އެހީތެރިކަން ފޯރުކޮށްދޭން ޖެހިފައި ނުވާކަމަށެވެ.
ކައުންސިލުން މައުލޫމާތު ދީފައިވާ ގޮތުގައި، މިހާރު ވަނީ ލޮނުގަނޑުގެ ބޮޑުބައި ރަށު ތެރެއިން ހިންދާލެވިފައެވެ. ނަމަވެސް މަސައްކަތް ހުއްޓާނުލައި، ފެން ހިންދުމުގެ މަސައްކަތް މިހާރު ވެސް ކުރަމުންދާކަމަށް، މި ނޫހަށް މައުލޫމާތުދީފައި ވެއެވެ.
ރޭ އުދަ އަރާފައިވާ މިންވަރަށް އެންމެ ފަހުން އެ ރަށަށް އުދައެރީ 2021 ވަނަ އަހަރުއެވެ.
އަދި މި ފަހަރު އެ ރަށަށް އުދައަރާ މިންވަރު އިތުރުވެފައި މިވަނީ، އެ ރަށުގެ ފަޅު ތޮށި ނުޖަހައި އޮތުމުންކަމަށް ވެސް ކައުންސިލުން ވަނީ މައުލޫމާތުދީފައެވެ.