ދުންފަތާ ދުރުވުމަށް ބޭނުންކުރާ ނިކޮޓިން ޕެޗް ފަދަ ބާވަތްތައް ރާއްޖެ އެތެރެކުރުން މަނަލެއް ނުކުރޭ

ދުންފަތް ކޮންޓްރޯލް ކުރުމާ ބެހޭ ގާނޫނުގެ ދަށުން، ދުންފަތުގެ ބާވަތްތައް އުފެއްދުމަށް ބޭނުންކުރާ ތަކެތި ރާއްޖެ އެތެރެކުރުން މަނާކޮށްފައިވީ ނަމަވެސް، ދުންފަތާ ދުރުވުމަށް ހަދާ ސެޒޭޝަން ފަރުވާއަށް ބޭނުންވާ ނިކޮޓިން ޕެޗް ފަދަ ބާވަތްތައް ރާއްޖެ އެތެރެކުރުމަކީ މަނާކަމެއް ނޫންކަމަށް ހެލްތު މިނިސްޓްރީން ބުނެފިއެވެ.

ދިވެހި ޒުވާނުން ދުންފަތުން ދުރުކުރުމަށް ސަރުކާރުން ކުރަމުންދާ މަސައްކަތުގެ ތެރެއިން، މިދިޔަ ނޮވެންބަރު މަހު ވަނީ، ވޭޕް އެތެރެކުރުމާއި ބޭނުން ކުރުން މަނާކޮށް، ދުންފަތް ކޮންޓްރޯލްކުރުމާ ބެހޭ ގާނޫނަށް  އިސްލާހު ގެނަސްފައެވެ. އެ އިސްލާހާ ގުޅިގެން ރާއްޖޭގައި ދުންފަތް އުފެއްދުމަކީ މަނާކަމެކެވެ.

އަދި މިކަމާ ގުޅިގެން، މި ޤާނުނު ތަންފީޒު ކުރުމަށް ހެލްތު މިނިސްޓްރީން މޯލްޑިވްސް ކަސްޓަމްސް ސާރވިސަސްއަށް ފޮނުވި ސިޓީއަކާ ގުޅިގެން، ބައެއް މީހުން ވަނީ އޭގެ ތެރޭގައި ސިޒޭޝަންގެ ފަރުވާއަށް ބޭނުންވާ އެއްޗެހި ނުވަތަ ނިކޮޓިން ޕެޗު ވެސް މަނާވި ކަމަށް ބުނެ ކަންބޮޑުވުން ފާޅުކޮށްފައެވެ. 

އެހެން ނަމަވެސް ދުންފަތް ކޮންޓްރޯލް ކުރުމާ ބެހޭ ގާނޫނުގައި ބުނެފައިވާ ގޮތުގައި، ދުންފަތުން ދުރުހެލިވުމަށް "ސެޒޭޝަން" ފަރުވާގެ ތެރެއިން ދެވޭ އަދި ކަމާ ބެހޭ ފަންނީ އިދާރާތަކުން ކަނޑައަޅައި ހުއްދަކޮށްފައިވާ ނިކޮޓިން ރިޕްލޭސްމަންޓް ތެރަޕީ ނުވަތަ ފަރުވާގެ ގޮތުގައި ބޭނުންކުރާ މި ކަހަލަ އެހެން ބާވަތްތައް މި ގާނޫނުގެ ބޭނުމަށް ދުންފަތުގެ ބާވަތްތައް ކަމަށް ނުބެލެވޭނެއެވެ.

ނަމަވެސް އެ ގާނޫނުގެ 42 ވަނަ މާއްދާގެ (ދ) ގައި ބަޔާންކޮށްފައިވާ ގޮތުގައި، "ދުންފަތުގެ ބާވަތްތައް" ގޮތުގައި ބެލެވޭނީ، ދުންފަތާއި ދުންފަތުގެ ތަނޑި އާއި ނިކޮޓިން އާއި އެ ތަކެތި ހިމަނައިގެން ތައްޔާރުކޮށްފައި ހުންނަ ތަކެއްޗަށެވެ. އަދި އެއިން އެއްވެސް ބާވަތެއް، އެއްވެސް މިންވަރަކަށް ހިމެނޭ އެއްޗެއް، ހަފައިގެން، ބޮއެގެން، ވަސްދަމައިގެން، ހަށިގަނޑުގެ ތަނެއްގައި ތަތްކޮށްގެން، ޖައްސައިގެން ނުވަތަ އުނގުޅައިގެން ވިޔަސް، ހަށިގަނޑަށް ވާސިލުވާ ގޮތަށް ތައްޔާރުކޮށްފައިވާ ކޮންމެ އެއްޗަކީ ދުންފަތުގެ ބާވަތެއް ކަމަށް ވެސް އެ ގާނޫނުގައި ވެއެވެ.

ދުންފަތް ކޮންޓްރޯލް ކުރުމާ ބެހޭ ގާނޫނަށް ގެނައި އިސްލާހާ ގުޅިގެން ރާއްޖޭގައި ވޭޕް ބުއިމާއި އޭގެ ވިޔަފާރިކުރުން މިދިޔަ ޑިސެންބަރު މަހުގެ 15 ވަނަ ދުވަހުން ފެށިގެން ވަނީ މަނާކޮށްފައެވެ.

މީގެ އިތުރުން އިލެކްޓްރޯނިކް ސިނގިރޭޓް ވިއްކުމާއި ހިލޭ ބެހުމާއި ބޭނުންކުރުމާއި ރާއްޖެ އެތެރެކުރުން ވެސް ވަނީ މަނާކޮށްފައެވެ. 

އަދި ސަރުކާރުން ވަނީ ސިނގިރޭޓާއި ބިޑީގެ ޑިއުޓީ ވެސް 50 ޕަސެންޓު ބޮޑުކޮށްފައެވެ.