ދުނިޔޭގެ މޫސުމަށް އަންނަ ބަދަލުތަކުގެ ސަބަބުން ސިޔާސީ ގޮތުން އުނދަގޫތައް ކުރިމަތިވެ، ސަރުކާރުތައް ހިންގުމަށް ދަތިތައް ކުރިމަތިވޭ

ދުނިޔޭގެ މޫސުމަށް އަންނަމުންދާ ބަދަލުތަކާ ގުޅިގެން 2024 ވަނަ އަހަރަކީ މީހުން ރެކޯޑު ބަލަހައްޓަން ފެށި ފަހުން އެންމެ ހޫނު އަހަރު ކަމަށް މޫސުމާބެހޭ މާހިރުން ވަނީ އަންދާޒާކޮށްފައެވެ. މިއީ 2023 ވަނަ އަހަރުގެ ރެކޯޑު  ވިދިވިދިގެން ދެވަނަ އަހަރަށް ރެކޯޑު ހެދުމުގެ ފުރުސަތު އޮތް ކަމެއްކަމުގައި ކަމާ ބެހޭ ފަރާތްތަކުން އަންނަނީ ބުނަމުންނެވެ.

ދުނިޔެ  ހޫނުވުމުގެ ސަބަބުން ކަނޑުގެ ލޮނުގަނޑު ބޮޑުވުމާއި، ވަޔާ އަދި ބޯކޮށް ވާރޭވެހުން ފަދަ ގުދުރަތީ ކާރިސާތައް އިތުރުވެ، އެތައްހާސް މީހުންގެ ފުރާނައަށް ގެއްލުން ލިބި، ބިލިއަން ޑޮލަރުގެ ގެއްލުން ވަނީ ލިބިފައެވެ. ފާއިތުވީ ދެ އަހަރުގެ ތެރޭގައި މޫސުމަށް އައި ބަދަލުތަކުގެ އަސަރުން ސަލާމަތްވި ގައުމެއް މަދެވެ. އޭގެ ތެރެއިން ސްޕެއިނަކީ އެންމެ ބޮޑަށް އަސަރުކުރި އެއް ގައުމެވެ.

ސްޕެއިންގެ ވެލެންސިއާ ސަރަޙައްދުގައި ފެންބޮޑުވުމުގެ ސަބަބުން ލިބިފައިވާ ބައެއް ގެއްލުން

2023 ވަނަ އަހަރު ސްޕެއިންގެ ކޯޑޯބާގައި ފަހްރަންހައިޓް 101 ޑިގްރީއަށް ހޫނުވެ، އޭގެ ފަހުން ޖުލައި އަދި އޯގަސްޓް މަހު މުޅި ގައުމަށް ހޫނުގެ ރާޅެއް އެރިއެވެ. މީގެ ސަބަބުން 8،000 އަށްވުރެ ގިނަ މީހުން މަރުވެފައިވެއެވެ. މި ހޫނުގެ ސަބަބުން ހަނަފަސްވުން އިތުރުވެ، ފެނުގެ ވަސީލަތްތައް ދަށްވެ، އިޤްތިސާދަށް މުހިންމު އޮލިވް ތެޔޮ އުފެއްދުން ދަށްވެގެން ދިޔައެވެ. އަދި ގައުމުގެ އެކި ސަރަހައްދުތަކުގައި ބޮޑެތި އަލިފާނުގެ ހާދިސާތައް ހިނގިއެވެ.

މިދިޔަ އަހަރުގެ އޮކްޓޯބަރު މަހު ވެލެންސިއާ ސަރަހައްދަށް އަހަރެއްގެ ވާރޭ އެއް ދުވަހު ވެހި، 224 މީހުން މަރުވެ، 1967 ގެ ފަހުން ޔޫރަޕްގައި ހިނގި އެންމެ ނުރައްކާތެރި ފެންބޮޑުވުމުގެ ހާދިސާއަށް ވެގެން ދިޔައެވެ. މޫސުމާބެހޭ މާހިރުން ބުނާ ގޮތުގައި މި ކާރިސާގެ ބޮޑު ބައެއް ދިމާވީ އިންސާނުންގެ ޢަމަލުތަކުގެ ސަބަބުން ދުނިޔެ ހޫނުވަމުން ދިޔުމުގެ ސަބަބުންނެވެ.

މި ހާދިސާގެ ފަހުން އެޤައުމުގެ ސަރުކާރުގެ މައްޗަށް ރައްޔިތުންގެ ރުޅި އިތުރުވެ، އިންޒާރު ދިނުމުގައި ލަސްވެ، އެކަށީގެންވާ ފިޔަވަޅު ނޭޅުނު ކަމަށް ބުނެ ސަރުކާރާ ދެކޮޅަށް މުޒާހަރާތައް ކުރިއެވެ. ސްޕެއިންގެ ރަސްގެފާނާއި ރާނީ އަދި ބޮޑުވަޒީރު ފެންބޮޑުވި ސަރަހައްދަށް ޒިޔާރަތްކުރި އިރު، ރައްޔިތުން އެ ފަރާތްތަކަށް ދިމާލަށް ޗަކަވެސް އުކިއެވެ.

ސްޕެއިންގެ 47 މިލިއަން ރައްޔިތުންނާއި އަހަރަކު 95 މިލިއަން ފަތުރުވެރިން އެ ގައުމުގެ ރީތި މޫސުމާއި މެދު އަބަދުވެސް އުފާވެފައި ތިބި ނަމަވެސް، ފާއިތުވި ދެ އަހަރު ދުވަހު ދިމާވި ކާރިސާތަކުން ދައްކައިދެނީ  މޫސުމަކީ އިތުބާރުކުރެވޭ އެއްޗެއް ނޫން ކަމެވެ. މި ކާރިސާތަކުން މީހުންގެ ފުރާނައަށާއި ގެދޮރަށް ގެއްލުން ލިބުމުގެ އިތުރުން ގައުމުގެ ސިޔާސީ ނިޒާމަށްވެސް ބޮޑެތި އަސަރުތަކެއް ކޮށްފައިވެއެވެ.

ސްޕެއިންގައި މި ހުރިހާ ކަމެއް ހިނގާފައިވަނީ ކުޑަ ސަރަހައްދެއްގައި ކުރު މުއްދަތެއްގެ ތެރޭގައި ކަމަށްވާތީ އެ ގައުމުގެ ހާލަތު ފާހަގަކޮށްލެވެއެވެ. ނަމަވެސް މިއީ މުޅި ދުނިޔޭގައި ފެންނަމުންދާ ކަމެކެވެ. ދުނިޔޭގެ އެކި ކަންކޮޅުތަކުގައި މޫސުމަށް އަންނަ ބަދަލުތަކުގެ ސަބަބުން ކާރިސާތައް އިތުރުވެ، އޭގެ ސަބަބުން ބައެއް ގައުމުތަކުގައި މުޒާހަރާތައް ހިނގައެވެ.

ސްޕެއިންގައި ފެންބޮޑުވެފައި

މި ހުރިހާ ކަމެއް ހިނގަމުންދަނީ ދުނިޔޭގެ މޫސުމާ ގުޅޭ ސިޔާސަތުތައް އިތުރަށް ހަރުކަށިވާނެ ކަމަށް ލަފާކުރެވޭ ދަނޑިވަޅެއްގައެވެ. އެމެރިކާގެ އަލަށް އިންތިޚާބުވި ރައީސް ޑޮނަލްޑް ޓްރަމްޕް ވަނީ މޫސުމާ ގުޅޭ ބައިނަލްއަޤްވާމީ އެއްބަސްވުންތަކުން އެމެރިކާ އަނބުރާ ގެންނާނެ ކަމަށް ބުނެފައެވެ. އަދި ޔޫރަޕިއަން ޔޫނިއަންގެ ގައުމުތަކުން އެމެރިކާގެ ތެޔޮ އަދި ގޭސް ނުގަނެފިނަމަ އެ ގައުމުތަކުން އެތެރެކުރާ މުދަލަށް ޓެކްސް ނަގާނެ ކަމަށްވެސް ވަނީ ބުނެފައެވެ. މިކަމުގެ ސަބަބުން ސްޕެއިންގެ ސާފު ހަކަތައިގެ ވިޔަފާރި އެމެރިކާގައި ފުޅާކުރުމަށް ހުރަސްތަކެއް ކުރިމަތިވެދާނެއެވެ.

ދުނިޔޭގެ މޫސުމަށް އަންނަ ބަދަލުތަކުގެ ސަބަބުން ސިޔާސީ ގޮތުން އުނދަގޫތަކެއް ކުރިމަތިވެ، ސަރުކާރުތައް ހިންގުމަށް ދަތިތަކެއް ކުރިމަތިވާނެ ކަމަށް ލަފާކުރެވެއެވެ. އަދި މި ބަދަލުތަކުގެ ސަބަބުން ގައުމުތަކުގެ މެދުގައި ހުރި ގުޅުންތަކަށްވެސް އަސަރުކުރާނެ ކަމަށް ބެލެވެއެވެ.