Ads by Exprox

ޚަބަރު

ވިއްސާރައިގައި މާލޭގެ 36 ގޭބިސީއެއްގެ 226 މީހުންނަށް ވަގުތީ ބޯހިޔާވަހިކަން

ވިއްސާރައިގައި މާލޭގެ 36 ގޭބިސީއެއްގެ 226 މީހުންނަށް ވަގުތީ ބޯހިޔާވަހިކަން

އެމްއެންޑީއެފް އިން އިއްޔެކުރި ވިއްސާރައިގައި ޕަންޕު ބޭނުންކޮށްގެން ފެން ހިންދަނީ ފޮޓޯ:އެމްއެންޑީއެފް

އާމިނަތު ޔުމްނާ

އާމިނަތު ޔުމްނާ

04 ޖެނުއަރީ 2025، 10:22

04 ޖެނުއަރީ 2025، 10:22

ރާއްޖެއަށް މިހާރު ކުރަމުންދާ ވިއްސާރައިގައި މާލޭގެ މަގުތަކުގައި ފެންބޮޑުވެ، ގޭތެރެއަށް ފެން ވަނުމާ ގުޅިގެން 36 ގޭބިސީއެއްގެ 226 މީހުންނަށް ވަގުތީ ބޯހިޔާވަހިކަން ހަމަޖައްސައިދީފިއެވެ. މިކަން ހާމަކުރެއްވީ ނޭޝަނަލް ޑިޒާސްޓަރ މެނޭޖްމަންޓް އޮތޯރިޓީ (އެންޑީއެމްއޭ) އިންނެވެ.

އެންޑީއެމްއޭއިން ދެއްވި މަޢުލޫމާތުގައިވާ ގޮތުން، މާލޭގައި ފެންބޮޑުވެގެން އެކި އެހީތަކަށް އެދި 774 ތަނަކުން ރިޕޯޓުކޮށްފައިވެއެވެ. މީގެ ތެރެއިން ވެލިބަސްތާ ޖެހުމަށް އެދި 554 ރިކުއެސްޓް ލިބިފައިވާ ކަމަށް އެ އޮތޯރިޓީން ވިދާޅުވިއެވެ. އަދި 53 ގެއެއްގެ ރެޕިޑް އެސެސްމަންޓް ހަދާފައިވާ ކަމަށާއި، 36 ގޭބިސީގެ 226 މީހުންނަށް ވަގުތީ ބޯހިޔާވަހިކަމާއި ކެއިންބުއިން ފޯރުކޮށްދެވިފައިވާ ކަމަށްވެސް އެންޑީއެމްއޭއިން ހާމަކުރެއްވިއެވެ.

މި ވިއްސާރައިގެ ސަބަބުން މާލެ ސިޓީގެ އިތުރުން އެހެން ރަށްތަކަށްވެސް އެކި ވަރުގެ ގެއްލުންތައް ލިބިފައިވެއެވެ. މިގޮތުން ރ. އިނގުރައިދޫއަށާއި ށ. މަރޮށްޓަށް އުދައަރައިގެން ގެއްލުން ލިބިފައިވާއިރު، ފ. ނިލަންދޫގައި 80 އިންސައްތަ ސަރަހައްދު ފެންބޮޑުވެފައިވެއެވެ. މީގެ އިތުރުން ދ. ކުޑަހުވަދޫ، ދ. މީދޫ، ފ. މަގޫދޫ، އދ. މާމިގިލި، ކ. ގުރައިދޫ، ފ. ފީއަލި އަދި ކ. ހިންމަފުށްޓަށްވެސް އެކި ވަރުގެ ގެއްލުންތައް ލިބިފައިވާކަމަށް ރިޕޯޓުކޮށްފައިވެއެވެ.

މާލޭގައި ފެންބޮޑުވެގެން ވެލިބަސްތާ ޖެހުމުގެ މަސައްކަތުގައި މާލޭ ސިޓީ ކައުންސިލް، ފުލުހުންނާއި ސިފައިން، އަދި ސިޓީތަކާއި އިދާރީ ދާއިރާތައް ހިންގުމާއި އާންމު މަސައްކަތްތަކާ ބެހޭ ވުޒާރާގެ މުވައްޒަފުންނާއި ސްކައުޓުން ބައިވެރިވެފައިވާ ކަމަށް އެންޑީއެމްއޭއިން ހާމަކުރެއްވިއެވެ.

މޫސުމާބެހޭ މަޢުލޫމާތު ދެއްވާ ފަރާތްތަކުން ބުނާ ގޮތުގައި މާލެއަށް އިއްޔެ ކުރި ވިއްސާރައިގައި 142.6 މިލިމީޓަރުގެ ވާރޭވެހިފައިވެއެވެ. މި ވިއްސާރައިގެ ސަބަބުން ގިނަ ބަޔަކަށް ދަތިތަކާ ކުރިމަތިލާން ޖެހިފައިވާއިރު، ކަމާބެހޭ އިދާރާތަކުން ގެއްލުން ލިބުނު ފަރާތްތަކަށް އެހީތެރިކަން ފޯރުކޮށްދިނުމުގެ މަސައްކަތް ކުރިއަށް ގެންދަމުންދާކަން ފާހަގަކުރެވެއެވެ.
                    

މި ލިޔުން ކިޔާލުމުން

Ads by MSS