މަސްދޯނިތަކުގައި ލޮނުފެނުން މަސް ފިނިކުރާ ނިޒާމު ގާއިމުކުރުމަށް އަލުން ލޯނު ހުޅުވާލައިފި

މަސްދޯނިތަކުގައި ލޮނުފެނުން މަސް ފިނިކުރާ ނިޒާމު ނުވަތަ އާރްއެސްޑަބްލިއު ސިސްޓަމް ގާއިމުކުރުމަށް ދޫކުރަން ނިންމާފައިވާ ލޯނަށް އެދި ހުށަހެޅުމުގެ ފުރުޞަތު އަލުން ހުޅުވާލުމަށް މަސްވެރިކަމާއި ކަނޑުގެ ވަސީލަތްތަކާބެހޭ ވުޒާރާއިން ނިންމައިފިއެވެ.

މަސްވެރިކަމާބެހޭ ވުޒާރާއިން ޕީއެސްއެމް ނިއުސްއަށް ދެއްވި މަޢުލޫމާތުގައި ވިދާޅުވިގޮތުގައި، މިދިޔަ ސެޕްޓެމްބަރު މަހު ހުޅުވާލި ފުރުޞަތުގައި 39 ފަރާތަކުން ލޯނަށް އެދި ހުށަހަޅާފައިވެއެވެ. އޭގެ ތެރެއިން 19 ފަރާތެއް ޝަރުތު ހަމަވާކަމަށް ވުޒާރާއިން ފާހަގަކުރެއްވިއެވެ. މިހާރު ކުރިއަށްދަނީ ޝަރުތުހަމަވާ ފަރާތްތަކާއެކު އެގްރީމަންޓްތަކުގައި ސޮއިކުރުމުގެ މަސައްކަތްކަމަށާއި، އެގްރީމަންޓްގައި ސޮއިކުރާ ހިސާބުން ފެށިގެން ލޯނު ދޫކުރަމުން ގެންދާނެކަމަށް ވުޒާރާއިން ވިދާޅުވިއެވެ.

އަންނަ އަންގާރަ ދުވަހު އެސްޑީއެފްސީ ޕޯޓަލް މެދުވެރިކޮށް އާރްއެސްޑަބްލިއު ފައިނޭންސިން ފެސިލިޓީއަށް އެދި ހުށަހެޅުމުގެ ފުރުޞަތު އަލުން ހުޅުވާލުމަށް ވަނީ ނިންމާފައެވެ. މި ފަހަރު ހުޅުވާލަނީ އިތުރު ލުއިތަކާ އެކުގައެވެ. އެގޮތުން އަލަށް ބަންނަ ދޯނިތަކުގައިވެސް އާރްއެސްޑަބްލިއު ސިސްޓަމް ހަރުކުރުމަށް ލޯނަށް އެދި ހުށަހެޅޭނެއެވެ.

އެސްޑީއެފްސީ މެދުވެރިކޮށް ދޫކުރާ މި ލޯނުގެ ދަށުން ރަހުނަކާ ނުލައި 100,000 ރުފިޔާއިން ފެށިގެން 2,000,000 ރުފިޔާއާ ހަމައަށް ލޯނު ދޫކުރެވޭނެއެވެ. އަދި މީގެ ކުރިން ހުޅުވާލި ފުރުޞަތުތަކާ ޚިލާފަށް، މި ފަހަރު ދޯނިތަކުގައި އަވިން ހަކަތަ އުފައްދާ ސޯލާ ނިޒާމާއި ޖެނެރޭޓަރު ގަތުމަށްވެސް ފުރުޞަތު ދެވޭނެއެވެ. ލޯނު އަނބުރާ ދެއްކުމަށް 6 މަސް ދުވަހުގެ ގްރޭސް ޕީރިއަޑަކާއެކު 10 އަހަރުގެ މުއްދަތެއް ދެވޭނެއެވެ.

ސަރުކާރުން ވަނީ މި މަސައްކަތާއެކު އައިސް ހޯދުމަށް މަސްވެރިން ކުރާ ދަތުރުތަކަށް ލުއި ލިބޭނެކަމަށް ވިދާޅުވެފައެވެ. މިހާރުވެސް ދެކުނުގެ ގިނަ ދޯނިތަކެއްގައި މި ނިޒާމު ހަރުކުރެވިފައިވާއިރު، ސަރުކާރުގެ އަމާޒަކީ ހުރިހާ މަސްދޯންޏެއްގައިވެސް މި ނިޒާމު ގާއިމުކުރުމެވެ.