ކުޑަހުވަދޫގައި ބޯކޮށް ވެހުނު ވާރޭގައި 11 ގެއަކަށް ފެންވަދެ ގެއްލުންވި

އިއްޔެ ހެނދުނު ގެ ވަގުތުތަކުގައި ކުޑަހުވަދޫގައި ބޯކޮށް ވެހުނު ވާރޭގެ ސަބަބުން ގިނަ ގެތަކަކަށް ފެންވަދެ ގެއްލުންވެއްޖެއެވެ. ކުޑަހުވަދޫގެ ޒިންމާދާރު ވެރިޔާ މުޙައްމަދު ޝިހާމް މަޢުލޫމާތު ދެއްވިގޮތުގައި މިހާތަނަށް 19 ގެއަކުން ފެންވަދެގެން ރިޕޯޓުކޮށްފައިވެއެވެ.

ފަރުދުން މީޑިއާއަށް މައުލޫމާތު ދެއްވަމުން ދ. ކުޑަހުވަދޫގެ ޒިންމާދާރު ވެރިޔާ މުހައްމަދު ޝިހާމް ވިދާޅުވީ ހެނދުނު ވެހެންފެށި ވާރޭގައި ބޮޑުވި ފެންގަނޑު 11 ޖަހަންވާއިރަށް ކޮންޓްރޯލް ކުރެވިފައިވާ ކަމަށެވެ.

"މީހުން ނޫޅޭ ތިރިކޮށް ހެދިފައިހުރި ދެގެއަކަށް އެތެރެއާއި އެއްކޮށް ފެންވަތް، އަދި ބައެއްގެތަކުގެ ގޯތިތެރެއަށް ފެންވަދެފައިވާކަން ފާހަގަކުރެވުނު. ތަކެއްޗަށް ގެއްލުން ލިބުނު ކަން ނޫނީ ނުލިބޭކަން ބަލަމުން މިދަނީ" ކަމަށް ޝިހާމް ވިދާޅުވިއެވެ.

އެމްއެންޑީއެފްގެ ފަޔަރ ލޮރީ ބޭނުންކޮށްގެން ޕަންޕު ބޭނުންކޮށްގެން ފެން ބޮޑުވި 11 ގެއެއް ކޮންޓްރޯލް ކުރެވިފައިވާ ކަމަށް އޭނާ ވިދާޅުވިއެވެ. އަދި ބައެއް މަގުތަކުގައި ތާރު އަޅާފައި އޮންނައިރު ވެލިމަގުތައް ތިރިކޮށް އިންނާތީ ތާރުމަގުން އަންނަ ފެން އެ ސަރަޙައްދުގައި ހުންނަ ގެތަކަށް ބޮޑަށް އަސަރުކުރި ކަމަށްވެސް ފާހަގަކުރެއްވިއެވެ.

ހުޅަނގު އުތުރު ފަރާތުން ކޯރު ކަނޑައިގެން ފެންހިންދުމަށް އާރުޑީސީ، ފުލުހުން، އެމްއެންޑީއެފް އަދި ކައުންސިލްގެ މުވައްޒަފުން މަސައްކަތްކުރި ކަމަށް ޝިހާމް ވިދާޅުވިއެވެ. މެންދުރު ފަހުން ވާރޭ ބޯކޮަށް ވެހި  ތާރުމަގުން ވެލިމަގުތަކަށް ފެންދާތީ، ފެން ނުދާނެ ކަހަލަ ގޮތަކަށް ވެލިބަސްތާ ބަހައްޓަ  ރައްކާތެރިކަމުގެ ފިޔަވަޅު އަޅާފައިވާކަމަށް\ އޭނާ މަޢުލޫމާތު ދެއްވިއެވެ.