ފެންބޮޑުވުމުގެ ހާދިސާތަކުން ގެއްލުންވާ ފަރާތްތަކަށް އެހީތެރިވުމަށް ސަރުކާރު ތައްޔާރު

ރާއްޖެއަށް މިހާރު ކުރަމުންދާ ވިއްސާރައާ ގުޅިގެން ފެންބޮޑުވުމުގެ ހާދިސާތަކުން ގެއްލުން ލިބޭ ފަރާތްތަކަށް އެހީވުމަށް ސަރުކާރުން ތައްޔާރަށް ތިބިކަމަށް ސިޓީތަކާއި އިދާރީ ދާއިރާތައް ހިންގުމާއި އާއްމު މަސައްކަތްތަކާބެހޭ ވަޒީރު އާދަމް ޝަރީފް ވިދާޅުވެއްޖެއެވެ.

ލައިވްކަވަރޭޖްއެއްގައި ދެއްވި ބަސްތީޤަތުމެއްގައި ވަޒީރު ވިދާޅުވީ، މާލެއަށް އިއްޔެ ކުޑަވަގުތުކޮޅެއްގެތެރޭގައި ބޯކޮށް ވާރޭވެހި ފެންބޮޑުވިކަމަށެވެ. މާލޭގައި ހުރި ޕަމްޕްތައް ބަރާބަރަށް މަސައްކަތް ކުރިނަމަވެސް، ހުއްޓުމެއްނެތި ބޯކޮށް ވާރޭވެހުމުގެ ސަބަބުން ފެންގަނޑު ހިނދުމުގައި ގޮންޖެހުންތަކެއް ދިމާވިކަމަށް އޭނާ ފާހަގަކުރެއްވިއެވެ.

މާލޭގެ އިތުރަށް ރަށްރަށަށްވެސް އެކި ވަރުގެ ގެއްލުންތައް ލިބުނުކަން ފާހަގަކުރައްވައި، ޚާއްޞަކޮށް ބޭރު ތޮށި ހަލާކުވެފައި ހުރި ރަށްރަށަށް ވަރަށް ބޮޑެތި ގެއްލުންތަކެއް ލިބުނުކަމަށް ވަޒީރު ވިދާޅުވިއެވެ. މިފަދަ މައްސަލަތައް ދިމާވަނީ ދުރަށް ވިސްނާނުލާ ކަންކަން ކުރުމުގެ ސަބަބުންކަމަށާއި، މިއީ ދެތިން ދުވަހުން ހައްލުވާނެ މައްސަލަތަކެއް ނޫންކަމަށްވެސް އޭނާ ވިދާޅުވިއެވެ.

ވަޒީރު އިތުރަށް ވިދާޅުވީ، ރަށްރަށުގައި ނަރުދަމާގެ މައްސަލަތައް ވަރަށް ބޮޑަށް ކުރިމަތިވަނީ ދުރު މުސްތަޤުބަލަކަށް ވިސްނާލުމެއްނެތި މިފަދަ މަސައްކަތްތައް ކުރެވިފައި ހުރުމުގެ ސަބަބުންކަމަށެވެ. މިފަދަ މައްސަލަތައް ހައްލުކުރުމަށް ސަރުކާރުން މަސައްކަތް ކުރައްވާނެކަމަށާއި، އަލަށް ފަށާ މަޝްރޫޢުތަކުގައިވެސް ދުރު މުސްތަޤުބަލަށް ވިސްނުމަށްފަހު މަސައްކަތްތައް ކުރިއަށްގެންދަވާނެކަމަށް އޭނާ ވިދާޅުވިއެވެ.

ވާރޭވެހި ފެންބޮޑުވުމުގެ ހާދިސާތަކުން ގެއްލުން ލިބޭ ފަރާތްތަކަށް މިހާރުވެސް އެހީތެރިކަން ފޯރުކޮށްދެމުންދާކަމަށާއި، ކުރިއަށް އޮތް ގަޑިތަކުގައިވެސް މިފަދަ ހާދިސާއެއް ހިނގައިފިނަމަ އެކަމަށް ތައްޔާރަށް ތިބިކަން ވަޒީރު ފާހަގަކުރެއްވިއެވެ.