ކުޅިވަރު

ސިޓީ މަޑުމަޑުން ހަމަޔަކަށް އެޅެމުން އަންނަކަމުގެ ނިޝާންތައް ފެންނަން ފަށައިފި

ސިޓީ މަޑުމަޑުން ހަމަޔަކަށް އެޅެމުން އަންނަކަމުގެ ނިޝާންތައް ފެންނަން ފަށައިފި

މެންޗެސްޓަރ ސިޓީގެ ދެވަނަ ގޯލު ހާލަންޑު ކާމިޔާބުކުރީ ބޮލުން، ފޮޓޯ: ޕްރިމިއަރ ލީގު

މިފްތާޙް މުޙައްމަދު

މިފްތާޙް މުޙައްމަދު

05 ޖެނުއަރީ 2025، 08:34

05 ޖެނުއަރީ 2025، 08:34

ހުލާސާ

މެޗަށްފަހު ވާހަކަ ދައްކަމުން ސިޓީގެ ކޯޗު، ޕެޕް ގާޑިއޯލާ ބުނީ، މެޗުން މޮޅުވުމުން އުފާކުރާ ކަމަށާއި ނަމަވެސް އެ މެޗުގައި ވެސް އެ ޓީމުގެ އަސްލު ސްޓޭންޑާރޑް ފެނިގެން ގޮސްފައި ނުވާކަމަށް.

އޮކޮޓޫބަރު މަހުގެ ފަހުން އަލަށް ޖެހިޖެހިގެން ދެ މެޗު ކާމިޔާބުކޮށް، މެންޗެސްޓަރ ސިޓީ މަޑުމަޑުން ފޯމަކަށް އެޅެމުން އަންނަކަމުގެ ނިޝާންތައް ފެންނަން ފަށައިފިއެވެ.

އެގޮތުން ހޮނިހިރުދުވަހުގެރޭ އިއްތިހާދު ސްޓޭޑިއަމްގައި ވެސްޓްހޭމްއާ ދެކޮޅަށް ކުޅުނު މެޗު އެ ޓީމުން ކާމިޔާބުކޮށް މޮޅަކާއެކު އަހަރު ފެށިއިރު، މިދިޔަ އާދީއްތަ ދުވަހު ލެސްޓާ ސިޓީ ވެސް ވަނީ ބަލިކޮށްފައެވެ. އޭގެ ކުރިން އެ ޓީމުން ކުޅުނު 13 މެޗުން ކާމިޔާބު ކުރެވިފައިވަނީ އެންމެ މެޗެކެވެ.

ވެސްޓްހޭމްއާ ދެކޮޅަށް ކުޅުނު މެޗުގައި ސިޓީގެ ފޯވާޑް، އާލިން ހާލަންޑު ދެ ގޯލު ކާމިޔާބުކޮށްފައިވާއިރު، އެ ޓީމަށް ކުޅެމުން އަންނަ ބްރެޒިލްގެ ސެވީނިއޯވަނީ މޮޅު ކުޅުމެއް ދައްކާފައެވެ. 

ރޭގެ މެޗު ސިޓީ އިން 4-1 އިން ކާމިޔާބުކުރިއިރު، އެ ޓީމު ވަނީ 10ވަނަ މިނެޓުގައި ލީޑު ނަގާފައެވެ. 

މިދިޔަ ހަފްތާގައި ސިޓީއަށް ފުރަތަމަ ގޯލު ކާމިޔާބުކޮށްދިން ސެވީނިއޯ ވާތް ފަރާތުން ގޯލު ކުރިމައްޗަށް ހުރަސްކޮށްލި ބޯޅަ ގޯލަށް ވަދެފައިވަނީ ވެސްޓްހޭމްގެ ޑިފެންޑަރ، ކޯފުލް ފައިގައި ޖެހިފައި ބައިކޮޅަށެވެ. 

އޭގެ ފަހުން ސެވީނިއޯވަނީ ފުރަތަމަ ހާފުގައި ސިޓީއަށް ދެވަނަ ގޯލެއް ކާމިޔާބުކޮށްދިނުމަށް އެހީވެދީފައެވެ. ވާތްފަރާތުން އޭނާ ހުރަސްކޮށްދިން ބޯޅަ މި ފަހަރު ގޯލަށް ފޮނުވާލީ ހާލަންޑު ބޮލުން ޖަހާފައެވެ.

ދެވަނަ ހާފުގެ 10ވަނަ މިނެޓުގެ ތެރޭގައި ހާލަންޑުވަނީ އިތުރު ގޯލެއް ކާމިޔާބުކޮށްފައެވެ. އެ ގޯލަށް ވެސް އެސިސްޓުކޮށްދިނީ ސެވީނިއޯއެވެ. ސެވީނިއޯ ކަޓްކޮށްލި ތުރޫޕާސް ހާލަންޑު ގޯލަށް ފޮނުވާލީ ކީޕަރުގެ ބޯމަތިން ހިއްލާލުމަށްފަހުއެވެ.

އަދި އޭގެ ތިން މިނެޓު ފަހުން ސިޓީގެ ހަތަރުވަނަ ގޯލު ކާމިޔާބުކުރީ، ވެސްޓެހޭމްގެ ކުއްދޫސްއަށް ހެދުނު ގޯހެއްގެ ބޭނުން ހިފައިގެންނެވެ. ކުއްދޫސް ފަހަތަށް ކުޅެލި ބޯޅަ ހޯދައި، ކެވިން ޑިބްރޫނޭ ޕެނަލްޓީ އޭރިއާ ތެރެއަށް ވަނުމަށްފަހު ފަސޭހަ ގޯލެއް ޖަހާލުމަށް ފިލް ފޮޑެންއަށް ބޯޅަ ޕާސްކުރިއެވެ. އަދި އެ ބޯޅަ ޔަގީންކަމާއެކު ފޮޑެން ވަނީ ގޯލުގެ ދާގަނޑަށް ފޮނުވާލާފައެވެ.

ވެސްޓްހޭމް އިން ފަހު ހާފުގައި ދޭތެރެދޭތެރެއިން ސިޓީގެ ގޯލަށް ނުރައްކާ ކުރަމުން ގޮސް، އެންމެ ފަހުން ގޯލެއް ކާމިޔާބުކުރެވުނީ މެޗުގެ 71ވަނަ މިނެޓުގައެވެ. އެއީ އެ ޓީމަށް ފުލްކްރޫގް ކާމިޔާބުކޮށްދިން ގޯލެކެވެ.

މެޗަށްފަހު ވާހަކަ ދައްކަމުން ސިޓީގެ ކޯޗު، ޕެޕް ގާޑިއޯލާ ބުނީ، މެޗުން މޮޅުވުމުން އުފާކުރާ ކަމަށާއި ނަމަވެސް އެ މެޗުގައި ވެސް އެ ޓީމުގެ އަސްލު ސްޓޭންޑާރޑް ފެނިގެން ގޮސްފައި ނުވާކަމަށެވެ. އެހެންކަމުން ޓީމުގެ ކުޅުން ރަގަޅު ކުރުމަށް އަދިވެސް ގިނަ މަސައްކަތްތަކެއް ކުރަންޖެހޭކަމަށް އޭނާ ފާހަގަކުރިއެވެ.

މި ލިޔުން ކިޔާލުމުން

Ads by MSS