ކުޅިވަރު

ލީގަށް ވާދަކުރާ އާސެނަލް އަނެއްކާ ވެސް މާޔޫސްކޮށްލައިފި

ލީގަށް ވާދަކުރާ އާސެނަލް އަނެއްކާ ވެސް މާޔޫސްކޮށްލައިފި

އާސެނަލް ކޮޅަށް ގޯލު ޖެހުމަށްފަހު ޖާއޯ ޕެޑްރޯ، ފޮޓޯ: ޕްރިމިއަރ ލީގު

މިފްތާޙް މުޙައްމަދު

މިފްތާޙް މުޙައްމަދު

05 ޖެނުއަރީ 2025، 08:34

05 ޖެނުއަރީ 2025، 08:34

ހުލާސާ

މި ނަތީޖާއާއެކު އާސެނަލްއަށް މިވަނީ ލީގުގެ އެއްވަނައިގައި އޮތް ލިވަޕޫލާ ދެމެދު އޮތް ފަރަގު ތިން ޕޮއިންޓަށް ކުޑަ ކުރުމަށް ލިބުނު ފުރުސަތު ގެއްލިފައި.

އާސެނަލްއަށް ނުވަނޭރީ ކާމިޔާބުކުރި ގޯލާއެކު، އުމުރުން 18 އަހަރު ނުވަނީސް ލީގުގައި އެއް ގޯލަށް ވުރެން ގިނަ ގޯލު ކާމިޔާބުކުރި ލިސްޓުގެ 6ވަނަ އިން އޭނާ ވަނީ ޖާގަ ހޯދާފައި.


މިދިޔަ ސީޒަނެކޭ އެއްގޮތަށް މި ސީޒަނުގައި ވެސް ލީގު ތައްޓަށް ވާދަކުރަމުން އަންނަ އާސެނަލްއަށް ބްރައިޓަން އެންޑް ހޯލްވްސް މެޗުން ދެ ޕޮއިންޓު ގެއްލި، އަނެއްކާ ވެސް މާޔޫސްކަމާ ކުރިމަތިލާން ޖެހިއްޖެއެވެ. 

ބްރައިޓަންގެ އެމެރިކަން އެކްސްޕްރެސް ސްޓޭޑިއަމްގައި ކުޅުނު މި މެޗު 1-1 އިން އެއްވަރުވިއިރު، އާސެނަލްއަށް މިވަނީ ލީގުގެ އެއްވަނައިގައި އޮތް ލިވަޕޫލާ ދެމެދު އޮތް ފަރަގު ތިން ޕޮއިންޓަށް ކުޑަ ކުރުމަށް ލިބުނު ފުރުސަތު ގެއްލިފައެވެ. 

އާސެނަލް މެޗުން މޮޅުވާން ދަނިކޮށް ނަތީޖާ ބަދަލުކޮށްލީ، މި ދެ ޓީމު މިދިޔަ އޯގަސްޓުމަހު ބައްދަލުކުރިއިރު ވެސް އެ ޓީމުގެ ކޮޅަށް ގޯލުޖަހައި، އެ މެޗުގެ ނަތީޖާ ވެސް 1-1 އަށް ބަދަލުކޮށްލި، ޖާއޯ ޕެޑްރޯ ކާމިޔާބުކުރި ޕެނަލްޓީއަކުންނެވެ. މިއީ ވިލިއަމް ސަލީބާ އޭނާއަށް ކުރި ފައުލަކަށް ލިބުނު ޕެނަލްޓީއެކެވެ. 

އާސެނަލްއަށް މި މެޗުގައި ލީޑު ނަގައިދިނީ އެ ޓީމަށް ކުޅެމުން އަންނަ އުމުރުން 17 އަހަރުގެ އީތަން ނުވަނޭރީއެވެ. ބުކާޔޯ ސަކާއަށް ލިބުނު އަނިޔާއާ ގުޅިގެން އާސެނަލްގެ ފުރަތަމަ 11 އިން ޖާގަ ހޯދި ނުވަނޭރީ މި ގޯލު ކާމިޔާބުކުރީ، ކަނާތް ފަރާތުން ޕެނަލްޓީ އޭރިއާގެ ތެރެއަށްވަދެ ދުރުކަނަށް ބޯޅަ ފޮނުވާލައިގެންނެވެ.

މި ގޯލާއެކު، އުމުރުން 18 އަހަރު ނުވަނީސް ލީގުގައި އެއް ގޯލަށް ވުރެން ގިނަ ގޯލު ކާމިޔާބުކުރި ލިސްޓުގެ 6ވަނަ އިން ނުވަނޭރީ މިވަނީ ޖާގަ ވެސް ހޯދާފައެވެ. މި ސީޒަނުގައި އޭނާ މިހާތަނަށް ދެ ގޯލު ކާމިޔާބުކޮށްފައިވާއިރު، އޭނާގެ ފުރަތަމަ ގޯލު ފެނުނީ ނޮވެންބަރު މަހު ނޮޓިންހަމް ފޮރެސްޓާ ދެކޮޅަށް އާސެނަލް ކުޅުނު މެޗުގައެވެ. މި ލިސްޓުގެ އެއްވަނައިގައި 7 ގޯލާއެކު އޮތީ މެންޗެސްޓަރ ޔުނައިޓެޑަށް ކުޅުނު ވޭން ރޫނީއެވެ.

މެޗުގެ ފަހުކޮޅުގައި ބްރައިޓަންއިން އިތުރު ގޯލެއް ޖަހާ އާސެނަލް ބަލިކުރެވޭތޯ ގިނަ ހަމަލާތަކެއް އުފެއްދިއެވެ. ނަމަވެސް، އެ ޓީމަށް އެކަން ހާސިލް ނުކުރެވުނުއިރު، އާސެނަލް މިވަނީ މެޗަކުން ބަލިނުވެ 10 މެޗަށް ދަންމާލާފައެވެ.

މި ނަތީޖާއާއެކު އާސެނަލް އޮތީ 40 ޕޮއިންޓާއެކު ލީގުގެ ދެވަނައިގައެވެ. އަދި އެއްވަނައިގައި އޮތް ލިވަޕޫލަށް 5 ޕޮއިންޓު އިތުރަށް ލިބިފައިވާއިރު، އެ ޓީމު އަދި އޮތީ އާސެނަލްއަށް ވުރެން ދެ މެޗު މަދުން ކުޅެފައެވެ. 

އަދި ނޮވެންބަރު 23ގެ ފަހުން މެޗަކުން މޮޅުވެފައިނުވާ ބްރައިޓަން އޮތީ ލީގުގެ 10ވަނައިގައެވެ. 

މި ލިޔުން ކިޔާލުމުން

Ads by MSS