ކުޅިވަރު
މީގެ ދުވަސްކޮޅެއް ކުރިން ލީގަށް ވާދަކުރި ޗެލްސީއަށް މިހާރު ހާލަތު ބަދަލުވެއްޖެ

ކްރިސްޓަލް ޕެލެސްއަށް މެޗުގެ ނަތީޖާ ހަމަހަމަކޮށްދިން ގޯލު ކާމިޔާބުކުރުމަށްފަހު މަޓޭޓާ އުފާފާޅު ކުރަނީ، ފޮޓޯ: ގެޓީއިމޭޖަސް
ހުލާސާ
ލިވަޕޫލްއާ ދެކޮޅަށް އޮކްޓޫބަރު މަހު ކުރިމަތިލާން ޖެހުނު ބައްޔަށްފަހު، ލީގުގައި ރަގަޅު ނަތީޖާތަކެއް ހޯދާ، ލީގު ރޭހުގައި ޗެލްސީއިން ގަދަޔަށް ފައިތިލަ ސާބިތުކުރި.
ކްރިސްޓަލް ޕެލެސް މެޗުން އެއްވަރުވިއިރު، މިއީ އެ ޓީމު ފަހުން ކުޅުނު ހަތަރު މެޗުން ހޯދުނު ދެވަނަ ޕޮއިންޓު.
ލިވަޕޫލްއާ ދެކޮޅަށް އޮކްޓޫބަރު މަހު ކުރިމަތިލާން ޖެހުނު ބައްޔަށްފަހު، ލީގުގައި ރަގަޅު ނަތީޖާތަކެއް ހޯދާ، ލީގު ރޭހުގައި ގަދަޔަށް ފައިތިލަ ސާބިތުކުރިކަމަށް ބެލެވުނު ޗެލްސީއަށް މިހާރު ހާލަތު ބަދަލުވެއްޖެއެވެ.
ހޮނިހިރު ދުވަހު ކްރިސްޓަލް ޕެލެސްއާ ދެކޮޅަށް ކުޅުނު މެޗުގައި އެ ޓީމުން ކުރީކޮޅު ލީޑު ނަގާފައި ވަނިކޮށް، މެޗު ނިމެން ކައިރިވެފައި އޮއްވައި ޖީން-ފިލިޕް މަޓޭޓާ ކާމިޔާބުކުރި ގޯލާއެކު، ޗެލްސީއަށް ވަނީ އަނެއްކާ ވެސް ދެ ޕޮއިންޓު ގެއްލިފައެވެ.
މި މެޗު 1-1 އިން އެއްވަރުވެފައިވާއިރު، މިއީ އެ ޓީމު ފަހުން ކުޅުނު ހަތަރު މެޗުން ހޯދުނު ދެވަނަ ޕޮއިންޓެވެ.
ޗެލްސީއަށް މެޗުގެ 14 ވަނަ މިނެޓުގައި ލީޑު ނަގައިދިނީ ކޯލް ޕާމާރއެވެ. ޖޯޑަން ސާންޗޯގެ އެހީތެރިކަމާއެކު ޕާމާރ ކާމިޔާބުކުރި މި ގޯލަކީ ލީގުގައި މިހާތަނަށް ފެނުނު އޭނާގެ 13 ވަނަ ގޯލެވެ.
އެ ގޯލަށްފަހު ޗެލްސީގެ ލީޑު ފުޅާކުރުމަށް އެ ޓީމަށް ގިނަ ފުރުސަތުތަކެއް ލިބުނެވެ. ނަމަވެސް، ނިކޮލަސް ޖެކްސަންއަށް ލިބުނު ފުރުސަތުތަކުގެ އިތުރުން ސަންޗޯ، މޫސަސް ކައިސީޑޯ އަދި ޖޯޝް އަޝެއަމްޕޮންގް ފޮނުވާލި ބޯޅަތައް ވަނީ ގޯލާ އަމާޒުނުކުރެވިފައެވެ.
ޕެލެސްއަށް މެޗުގައި ފުރަތަމަ ހަމަލާ އުފެއްދުނީ ފުރަތަމަ ހާފުގެ 35 ވަނަ މިނެޓުގައެވެ. ނަމަވެސް މި ހަމަލާ ދިފާއުކުރާކަށް ޗެލްސީގެ ގޯލްކީޕަރ، ރޮބާޓް ސަންޗޭޒްއަށް މާ ބުރަ މަސައްކަތްތަކެއް ކުރާކަށް ނުޖެހުނެވެ.
ފުރަތަމަ ހާފުގައި ކުޅުނު ޓެމްޕޯގައި ޗެލްސީއަށް ދެވަނަ ހާފު ނެފެށުމުގެ ނަތީޖާއަކަށްވީ، ދެވަނަ ހާފުގެ ކުރީކޮޅު ޕެލެސްއިން ޗެލްސީގެ ގޯލަށް ނުރައްކާކުރަން ފެށުމެވެ.
އަދި ދެވަނަ ހާފުގައި ލީޑު ފުޅާކުރުމަށް ލިބުނު ފުރުސަތުތައް ޗެލްސީއިން ބޭކާރުކޮށްލުމުން، މެޗު ނިމެން ކުޑަތަންވެފައި ވަނިކޮށް ޕެލެސްއިން ވަނީ މެޗުގެ ނަތީޖާ ހަމަހަމަކޮށްފައެވެ. މިއީ އެބެރެޗީ އެޒޭގެ އެސިސްޓަކުން މަޓޭޓާ ކާމިޔާބުކުރި ގޯލެކެވެ.
މި ނަތީޖާއާއެކު ޗެލްސީ މިހާރު އޮތީ ލީގުގެ 4ވަނައިގައެވެ. އަދި އެންމެ ފަހުން ކުޅުނު ތިން މެޗުން ބަލިވެފައިނުވާ ޕެލެސް އޮތީ ލީގުގެ 15ވަނައިގައެވެ.