ގޯލްޑަން ޗެރިޓީ ޝީލްޑް ގަމުން ކާމިޔާބުކޮށް، ފައިސާގެ އިނާމު ފަލަސްތީނަށް ހަދިޔާކޮށްފި

ގޯލްޑަން ފުޓްސަލް ޗެލެންޖު ފެށުމުގެ ގޮތުން ކުޅޭ ހާއްސަ މެޗު، ނުވަތަ ޗެރިޓީ ޝީލްޑް މެޗު ކާމިޔާބުކޮށް، ލ. ގަމުން އެ ޓީމަށް ލިބުނު ފައިސާގެ އިނާމު ފަލަސްތީނުގެ ޣައްޒާގެ ރައްޔިތުންނަށް ހަދިޔާކުރަން ނިންމައިފިއެވެ.

މުބާރާތުގެ އެންމެ ފަހުގެ ދެ ޗެމްޕިއަނުންގެ މެދުގައި ކުޅެމުން އަންނަ ޗެރިޓީ ޝީލްޑް މެޗުގައި ހޮނިހިރު ދުވަހުގެރޭ ބައްދަލުކޮށްފައިވަނީ މިދިޔަ އަހަރުގެ ޗެމްޕިއަން އޭދަފުއްޓާއި، އޭގެ ކުރީ އަހަރުގެ ޗެމްޕިއަން ލ. ގަމެވެ. 

ގަމަކީ މިދިޔަ އަހަރު ފައިނަލުގައި އޭދަފުއްޓާ ދެކޮޅަށް ކުޅުނު ޓީމެވެ. ނަމަވެސް މިދިޔަ އަހަރު ތިމަރަފުއްޓާ ދެކޮޅަށް ކުޅެ ފުރަތަމަ ފަހަރަށް ޗެރިޓީ ޝީލްޑް ކާމިޔަބުކުރި ގަމަށް، ފައިނަލް މެޗުގައި އޭދަފުއްޓާ ދެކޮޅަށް ކުޅެ ނާކާމިޔާބުވީ 4-2 އިންނެވެ.

ރެހެންދި ފުޓްސަލް ދަނޑުގައި ކުޅުނު މި މެޗުގައި މުހިންމު ދެ ކުޅުންތެރިން ނުލާ ނިކުތް ގަމުން މެޗު ކާމިޔާބުކުރީ 1-0 އިންނެވެ. ގަމުން ރޭގެ މެޗަށް ނިކުމެފައިވަނީ، އެ ޓީމުގެ ކެޕްޓަން، ހުސެއިން ޝަރީފް (އޮންލީ) އާއި އަލީ ޝާމިސް (ތޮއްޕޭ) އެވެ. މި ދެ ކުޅުންތެރިންވެސް ތިބީ އަނިޔާގައެވެ.

އަނެއްކޮޅުން އޭދަފުށިން ވެސް ކުޅެފައިވަނީ މުހިންމު ތިން ކުޅުންތެރިއެއް ނުލައެވެ. އެގޮތުން މާޒިޔާ ސްޕޯޓްސް އެންޑް ރެކްރިއޭޝަނަށް ކުޅެމުން އަންނަ އަލީ ފާސިރު (ސެންޓޭ)، ހައިޝަމް ހަސަން (ބިޑި) އަދި ހަމްޒާ މުހައްމަދު (ހަމްޕު)އަށް ވަނީ އެ ކްލަބުން ރިލީޒް ނުދޭން ނިންމާފައެވެ.

ރޭގެ މެޗުގައި ދެ ޓީމުގެ ފަރާތުން ހަމަހަމަ ކުޅުމެއް ފެނިގެން ގޮސްފައިވާއިރު، މެޗުގެ ނަތީޖާ ބަދަލުކުރީ ދެވަނަ ހާފުގައި އަބްދުﷲ ޖުނައިދު (ޖެންނޭ) ކާމިޔާބުކުރި ގޯލަކުންނެވެ.

ޗެރިޓީ ޝީލްޑް މެޗުން މޮޅުވުމުން ގަމަށް ވަނީ ފައިސާގެ އިނާމުގެ ގޮތުގައި 25،000ރ. ލިބިފައެވެ. އަދި އެ ޓީމުން ވަނީ މި ފައިސާ އެއްކޮށް ޣައްޒާއަށް ހަދިޔާ ކުރުމަށް ނިންމާފައެވެ.

މުބާރާތުގައި މި އަހަރު 129 ޓީމަކުން ވާދަކުރާއިރު، އަތޮޅުގެ ރަށްތަކުގެ މެދުގައި ކުޅޭ މެޗުތައް މިރޭ ފަށާނެއެވެ. މިރޭ ކުޅުމަށް ހަމަޖެހިފައުވަނީ ހއ އަތޮޅާއި ހދ އަތޮޅުގެ މެޗުތަކެވެ.