ކާރިސާތަކުން ރައްކާތެރިވުމަށް ދިވެހިރާއްޖޭގެ އައު އިސްތިރާޖު ތަޢާރަފުކޮށްފި

ދިވެހިރާއްޖެއަށް ކުރިމަތިވެދާނެ ކާރިސާތަކުން ރައްކާތެރިވުމަށްޓަކައި "މޯލްޑިވްސް ޑިޒާސްޓަރ ރިސްކް ރިޑަކްޝަން ސްޓްރެޓަޖީ 2024 – 2030" ގެ ނަމުގައި އައު އިސްތިރާޖެއް ވަނީ ތަޢާރަފުކޮށްފައެވެ. މި އިސްތިރާޖަކީ މޫސުމީ ގޮތުންނާއި އެނޫންވެސް ގޮތްގޮތުން ކުރިމަތިވެދާނެ ކާރިސާތަކުގެ ސަބަބުން ދިވެހިރާއްޖޭގެ ތިމާވެށްޓާއި ބިނާވެށި ރައްކާތެރިކުރުމަށްޓަކައި އެކުލަވާލާފައިވާ 7 އަހަރުގެ ޕްލޭނެކެވެ.

ދުނިޔޭގެ ތިމާވެއްޓަށް އަންނަމުންދާ ބަދަލުތަކުގެ ނުރަނގަޅު އަސަރު ދިވެހިރާއްޖެ ފަދަ ކުދި ޖަޒީރާ ޤައުމުތަކުން ދަނީ ތަޙައްމަލު ކުރަމުންނެވެ. އުދައެރުމާއި ވިއްސާރަވެ ފެންބޮޑުވުންފަދަ ހާދިސާތަކުގެ ސަބަބުން ދިރިއުޅެން ކުރާ މަސައްކަތްތަކަށާއި، ގޯތިގެދޮރާއި އާންމުންގެ މުދަލަށް ބޮޑެތި ގެއްލުންތަކެއް ލިބެމުންދާކަން ފާހަގަކުރެވެއެވެ.

މި އިސްތިރާޖުގައި ހިމެނޭ މައިގަނޑު 7 ކަމުގެ ތެރޭގައި ކާރިސާގެ ކަންކަން ބެލެހެއްޓުމާއި ގުޅޭ ޤާނޫނީ އިޖުރާއަތްތައް ހަރުދަނާކުރުމާއި، މަލްޓި-ހެޒަޑް ރިސްކް އެސެސްމަންޓް ހެދުމާއި، ބިނާވެއްޓާއި ގުދުރަތީ ވަޞީލަތްތަކުގެ ތެރެއިން ކާރިސާތަކާ ކުރިމަތިލުމުގެ ޤާބިލުކަން އިތުރުކުރުން ހިމެނެއެވެ. މީގެ އިތުރުން، ކާރިސާތަކަށް މުޖުތަމަޢުގެ ވިލުންތެރިކަން އިތުރުކުރުމާއި، ދުރާލާ އިންޒާރު ދޭ ނިޒާމްތައް ހަރުދަނާކުރުމާއި، ކާރިސާތަކުން އަރައިގަތުމުގެ ކެރިފޯރުންތެރިކަން އިތުރުކުރުމާއި، ކުރިމަތިވާ ކާރިސާތަކަށް ދެމެހެއްޓެނިވި ގޮތެއްގައި ތައްޔާރުވުމުގެ ސަޤާފަތެއް އާލާކުރުން ހިމެނެއެވެ.

ނޭޝަނަލް ޑިޒާސްޓަރ މެނޭޖްމަންޓް އޮތޯރިޓީގެ ޗީފް އެގްޒެކެޓިވް އޮފިސަރ ހިސާން ހަސަން ވިދާޅުވި ގޮތުގައި މި އިސްތިރާޖަކީ ކުރިމަގުގައި ދިމާވެދާނެ ކާރިސާތަކަށް ތައްޔާރުވުމުގެ ޤާބިލުކަން އިތުރުކުރުމަށާއި ކާރިސާތަކަށް ވިލުންތެރި ރާއްޖެއެއް ބައްޓަން ކުރުމަށް އެހީތެރިވެދޭނެ މަގުޗާޓެކެވެ. އަދި ބައިނަލްއަޤްވާމީ އެކިއެކި މުހިންމު މުޢާހަދާތަކާއި އެއްބަސްވުންތަކުގައި ރާއްޖެ ދަނީ ބައިވެރިވަމުންނެވެ.

މި އިސްތިރާޖުގެ މައިގަނޑު މަޤްޞަދަކީ މޫސުމީ ގޮތުންނާއި އެނޫންވެސް ގޮތްގޮތުން ކުރިމަތިވެދާނެ ކާރިސާތަކުގެ ސަބަބުން ރާއްޖޭގެ ތިމާވެށްޓާއި ބިނާވެށި ރައްކާތެރިކުރުމާއި، ރައްޔިތުންގެ ގެދޮރާއި މުދާ ހިމާޔަތްކުރުމާއި، ކާރިސާތަކަށް ކުރިއާލާ ތައްޔާރުވުމާއި، ކާރިސާތަކަށް ވިލުންތެރި މުޖުތަމަޢުއެއް ބިނާކުރުމާއި، ދެމެހެއްޓެނިވި ތަރައްޤީގެ ލަނޑުދަނޑިތައް ޙާޞިލުކުރުމެވެ.

މި ސްޓްރެޓަޖީގެ ސަބަބުން ޤުދުރަތީ ކާރިޘާތަކުން ލިބިދާނެ އަދި ލިބޭ ގެއްލުންތައް ކުޑަކުރުމަށާއި، މިދާއިރާއިން އިންސާނީ ވަސީލަތް ތަރައްޤީ ކުރުމަށް އިތުރު ފުރުޞަތުތައް ފަހިވެގެންދާނެކަމަށް ބެލެވެއެވެ. އަދި މިފަދަ ސްޓްރެޓަޖީއެއްގެ ސަބަބުން މޫސުމަށް އަންނަ ބަދަލުތަކުގެ ސަބަބުން ކުދި އަދި ބިންތިރި ޖަޒީރާ ޤައުމުތަކަށް ލިބޭ ގެއްލުމާ ގުޅޭގޮތުން ބައިނަލްއަޤްވާމީ މައިދާނުގައި ވަކާލާތުކޮށް އަޑުއުފުލުމުގެ ފުރުސަތު އިތުރުވެގެންދާނެއެވެ.

ރައީސުލްޖުމްހޫރިއްޔާ ޑރ. މުޙައްމަދު މުޢިއްޒުގެ ސަރުކާރުން ކާރިސާ ހިރާސް ކުޑަކުރުމަށް ދެއްވާ އިސްކަން މި އިސްތިރާޖު އެކުލަވާލުމުން ދައްކުވައިދެއެވެ. ވިލުންތެރި ދިވެހިރާއްޖެއެއް ބިނާ ކުރުމުގެ މަސައްކަތް ނޭޝަނަލް ޑިޒާސްޓަރ މެނޭޖްމަންޓް އޮތޯރިޓީން ދަނީ މެދުކެނޑުމެއް ނެތި ކުރަމުންނެވެ.

މި އިސްތިރާޖު ތަންފީޒުކުރުމުގެ ސަބަބުން ދިވެހިރާއްޖެއަށް ކުރިމަތިވެދާނެ ކާރިސާތަކަށް ތައްޔާރުވުމާއި، އޭގެ އަސަރުތައް ކުޑަކުރުމާއި، އަދި ކާރިސާތަކުން އަރައިގަތުމުގެ ޤާބިލުކަން އިތުރުވެގެންދާނެކަމަށް ބެލެވެއެވެ. މިއީ ދިވެހިރާއްޖޭގެ ދެމެހެއްޓެނިވި ތަރައްޤީއަށާއި، ރައްޔިތުންގެ ރައްކާތެރިކަމަށް އެޅޭ މުހިންމު ފިޔަވަޅެއްކަން ފާހަގަކުރެވެއެވެ.