ޣައްޒާގައި އިސްރާއީލުގެ ހަމަލާތައް ހަރުކަށިވަމުންދާއިރު، އެމެރިކާއިން އިސްރާއީލަށް ހަތިޔާރު ވިއްކުމަށް ނިންމައިފި

ޢައްޒާގައި އިސްރާއީލުގެ ސިފައިން ދެމުންދާ ހަމަލާތަކުގައި އިތުރު 70 ފަލަސްތީނު ރައްޔިތުން ޝަހީދުވެއްޖެއެވެ. މެޑިކަލް އަދި ސަލާމަތީ ޚިދުމަތްތަކުން ބުނާ ގޮތުގައި މިއީ ގައްޒާގެ  ތަފާތު 30 ސަރަޙައްދަކަށް ދިން ހަމަލާތަކެކެވެ. މި ހަމަލާތަކުގައި ގިނަ އަދަދެއްގެ ކުޑަކުދިން ޝަހީދުވެފައިވާ ކަމަށް ވެސް ބުނެއެވެ.

މި ހަމަލާތައް ހަރުކަށިވަމުންދާއިރު، އެމެރިކާގެ ރައީސް ޖޯ ބައިޑެން ވަނީ އިސްރާއީލަށް 8 ބިލިއަން ޑޮލަރުގެ ހަތިޔާރު ވިއްކުމަށް ހުށަހަޅާފައެވެ. މިއީ އޭނާގެ ދައުރު ނިމުމުގެ ދެ ހަފުތާ ކުރިންނެވެ. ގައްޒާގައި މަރުވަމުންދާ މީހުންގެ އަދަދު އިތުރުވަމުންދާތީ، މިކަމާ ގުޅޭގޮތުން ފާޅުކުރެވޭ ފާޑުކިޔުންތަކަށް ބައިޑެން ދިނީ ބީރިކަންފަތެކެވެ.

އިސްރާއީލުގެ ދިފާއީ ވަޒީރު އިސްރާއީލް ކަޓްޒް ވަނީ ގައްޒާގައި ހިފަހައްޓާފައިވާ ބަންދީން ދޫކޮށްލުމާ ގުޅޭގޮތުން ހަމާސްއާއެކު ނުސީދާކޮށް މަޝްވަރާތައް ފެށިފައިވާކަން ކަށަވަރުކޮށްދީފައެވެ. މި މަޝްވަރާތައް ކުރިއަށްދަނީ ޤަޠަރުގައެވެ.

ލުބުނާނުގެ ހިޒްބުއްލާގެ އިސްވެރިޔާ ނައީމް ޤާސިމް ބުނެފައިވަނީ ފާއިތުވި މަހު އެއްބަސްވި ހަނގުރާމަ ހުއްޓާލުމުގެ އެއްބަސްވުމާ ޚިލާފަށް އިސްރާއީލުން ކުރަމުންދާ ޢަމަލުތަކަށް ޖަވާބުދާރީވުމަށް ތައްޔާރަށް ތިބިކަމަށެވެ. އދ. ގެ ސުލްޙަ ބެލެހެއްޓުމުގެ ބާރު (ޔުނިފިލް) އިން ބުނެފައިވަނީ އިސްރާއީލުގެ މި ޢަމަލުތަކުން ހަނގުރާމަ ހުއްޓާލުމުގެ އެއްބަސްވުމަށް ނުރައްކާވެފައިވާ ކަމަށެވެ.

އިސްރާއީލުން ގައްޒާއަށް ދެމުންދާ ހަމަލާތަކުގައި މިހާތަނަށް މަދުވެގެން 45،658 ފަލަސްތީނު ރައްޔިތުން ޝަހީދުވެ، 108،583 މީހުން ޒަޚަމްވެފައިވެއެވެ. މިއީ 2023 ވަނަ އަހަރުގެ އޮކްޓޯބަރު 7 ވަނަ ދުވަހުން ފެށިގެންނެވެ. އެ ދުވަހު ހަމާސްއިން އިސްވެ ހިންގި ހަމަލާތަކުގައި އިސްރާއީލުގެ 1،139 މީހުން މަރުވެ، 200 އަށްވުރެ ގިނަ މީހުން ބަންދުގައި ގެންގޮސްފައިވެއެވެ.