ޚަބަރު
ރާއްޖެއާއި ޔޫއޭއީއާ ދެމެދު ގުޅުން ބަދަހިކުރުމަށް ޚާރިޖީ ވަޒީރު ޔޫއޭއީއަށް ފުރާވަޑައިގެންފި
ޚާރިޖީ ވަޒީރު ޑރ. ޢަބްދުﷲ ޚަލީލް ފޮޓޯ: މޯލްޑިވްސް ޖަރނަލް
ޚާރިޖީ ވަޒީރު ޑރ. ޢަބްދުﷲ ޚަލީލް ރަސްމީ ދަތުރުފުޅެއްގައި އެކުވެރި ޢަރަބި އިމާރާތަށް (ޔޫއޭއީ) ވަޑައިގެންފިއެވެ. މި ދަތުރުފުޅަކީ ޔޫއޭއީގެ ބޮޑުވަޒީރުގެ ނައިބު އަދި ޚާރިޖީ ވަޒީރު، ހިޒް ހައިނަސް ޝެއިޚް ޢަބްދުﷲ ބިން ޒާޔިދު އަލް ނަހްޔާންގެ ދަޢުވަތަކަށް ކުރައްވާ ދަތުރުފުޅެކެވެ.
މި ދަތުރުފުޅުގައި ޑރ. ޚަލީލް ވަނީ ޔޫއޭއީގެ ޚާރިޖީ ވަޒީރާ ބައްދަލުކުރައްވާ، ދެ ޤައުމުގެ ދެމެދުގައިވާ ގުޅުން އިތުރަށް ހަރުދަނާކުރުމާއި، މިހާރު ކުރިއަށްދާ އެއްބާރުލުމުގެ ދާއިރާތައް މުރާޖަޢާކުރުމާއި، އަދި ކުރިމަގުގައި އިތުރު އެއްބާރުލުން ހޯދުމުގެ ފުރުޞަތުތަކާ ބެހޭގޮތުން މަޝްވަރާކުރައްވާނެ ކަމަށް ހާމަކުރައްވާފައެވެ. މީގެ އިތުރުން، ޚާރިޖީ ވަޒީރު ވަނީ ޔޫއޭއީ ސަރުކާރުގެ އެހެނިހެން އިސް ބޭފުޅުންނާވެސް ބައްދަލުކުރައްވާ، ދެ ޤައުމުގެ މަސްލަހަތު ކުރިއެރުވުމަށް އެއްބާރުލުން ދެވިދާނެ ދާއިރާތަކާ ބެހޭގޮތުން މަޝްވަރާކުރައްވާނެ ކަމަށް ބަޔާންކުރައްވާފައެވެ.
Arrived Abu Dhabi on an official visit to the UAE.
— Abdulla Khaleel (@abkhaleel) January 5, 2025
Looking forward to engaging in productive discussions with the Deputy Prime Minister and Foreign Minister, HH Sheikh Abdullah bin Zayed Al Nahyan and the UAE leadership to bolster our shared commitment to economic growth and…
މި ދަތުރުފުޅަކީ ދިވެހިރާއްޖެއާއި ޔޫއޭއީއާ ދެމެދު އޮތް ދެމެހެއްޓެނިވި ގުޅުން ދައްކުވައިދޭ، އަދި ތަރައްޤީއާއި، އައު ކަންތައްތަކާއި، ފާގަތިކަމަށް ދެ ޤައުމުން ކުރާ މަސައްކަތް ފާހަގަކޮށްދޭ ދަތުރުފުޅެކެވެ.
ޚާރިޖީ ވަޒީރުގެ މި ދަތުރުފުޅުގައި އެމްބެސެޑަރ އެޓް ލާޖް ޢަބްދުﷲ ޙަމީދު އަދި ޚާރިޖީ ވުޒާރާގެ ޖޮއިންޓް ސެކްރެޓަރީ މަރްޔަމް ރީޝާ ބައިވެރިވެ ވަޑައިގަންނަވައެވެ.
