ފިނީގެ ތޫފާނެއްގެ ސަބަބުން އެމެރިކާގެ 62 މިލިއަން މީހުންނަށް ނުރައްކާ

މިދިޔަ ހޮނިހިރު ދުވަހުގެ މެންދުރުފަހުން ފެށިގެން އެމެރިކާގެ 1،300 މޭލުގެ ސަރަޙައްދެއްގައި ދިރިއުޅޭ 62 މިލިއަން މީހުންނަށް އަސަރުކުރާނެ ބޮޑު ވިންޓަރ ސްޓޯމެއް އައިސްފައިވާ ކަމަށް މޫސުމާބެހޭ ފަރާތްތަކުން މަޢުލޫމާތު ދީފިއެވެ. މި ތޫފާނުގެ ސަބަބުން ގަދަ ވިއްސާރައާއި،  ގަނޑުފެން ވެހި، ބިމުގައި އައިސްއުފެދި، ގަދަ ވައިޖެހުމުގެ އިތުރުން ވިދާ ގުގުރާ ވިއްސާރަ ކުރާނެ ކަމަށް ބެލެވެއެވެ.

އެމެރިކާގެ ނެޝަނަލް އޯޝަނިކް އެންޑް އެޓްމޮސްފެރިކް އެޑްމިނިސްޓްރޭޝަން (އެންއޯއޭއޭ) ގެ ވެދަރ ޕްރެޑިކްޝަން ސެންޓަރުން ބުނެފައިވަނީ ބައެއް ސަރަޙައްދުތަކުގައި މިއީ ފާއިތުވި 10 އަހަރުގެ ތެރޭގައި އެންމެ ބޮޑަށް ގަނޑުފެން ވެހޭނެ ދުވަސްތަކެއް ކަމަށެވެ. މި ތޫފާނުގެ ސަބަބުން މަދުވެގެން 12 ސްޓޭޓެއްގައި ބޯ ގަނޑުފެން ވެހި، ބިމުގައި އައިސްގަނޑު ހަރުލާ، ގަޑިއަކު 40 މޭލުގެ ބާރުމިނުގައި ވައިޖަހާނެ ކަމަށް ބެލެވެއެވެ.

މި ތޫފާނުގެ ސަބަބުން ދަތުރުފަތުރު ކުރުމަށް ވަރަށް ބޮޑެތި ދަތިތަކެއް ކުރިމަތިވެ، ކަރަންޓު ކެނޑި، އާންމު ދިރިއުޅުމަށް ބޮޑެތި ހުރަސްތަކެއް ކުރިމަތިވާނެ ކަމަށް ބެލެވެއެވެ. ވިންޓަރ ސްޓޯމް ސެވެރިޓީ އިންޑެކްސްއިން ބުނެފައިވަނީ މެދު އެމެރިކާގެ ބައެއް ސަރަޙައްދުތަކުގައި އާދީއްތަ ދުވަހުގެ ނިޔަލަށް ދަތުރުފަތުރު ކުރުމަކީ ނުރައްކާތެރި ނުވަތަ ނުކުރެވޭނެ ކަމަކަށް ވެގެންދާނެ ކަމަށެވެ.

މި ތޫފާނު ފެށިގެން އައީ ހޮނިހިރު ދުވަހުގެ މެންދުރުފަހު، މެކްސިކޯ ކަނޑުން އުތުރަށް އައި ތެތް ވައިގެ ސަބަބުންނެވެ. އޭގެ ފަހުން އިރުމަތިން ހުޅަނގަށް ދަތުރުކޮށް، އާދީއްތަ ދުވަހުގެ ހެނދުނު މިސިސިޕީ ވެލީއާއި މިޑްވެސްޓްގެ ބައެއް ސަރަޙައްދުތަކަށް އަސަރުކުރާނެ ކަމަށް ބެލެވެއެވެ. އަދި އާދީއްތަ ދުވަހު އޮހައިއޯ ވެލީއާއި ދެކުނު-އިރުމަތީ ސަރަޙައްދުތަކަށް އަސަރުކޮށް، އާދީއްތަ ދުވަހުގެ ރޭ އަދި ހޯމަ ދުވަހު އިރުމަތީ ސަރަޙައްދުތަކަށް އަސަރުކުރާނެ ކަމަށް ބެލެވެއެވެ.

މި ތޫފާނުގެ ސަބަބުން 1 ފޫޓަށްވުރެ އުސްކޮށް ގަނޑުފެން ވެހި، ކަރަންޓު ކެނޑޭ ވަރަށް އައިސްގަނޑު އެޅުމުގެ ފުރުސަތު އޮތް ކަމަށް މޫސުމާބެހޭ ފަރާތްތަކުން ބުނެފައިވެއެވެ. އަދި މި ތޫފާނުގެ ފަހުން  ފިނި މޫސުމެއް އަންނާނެ ކަމަށްވެސް ބެލެވެއެވެ.