ރަމަޟާން މަހު ތަރާވީޙު ނަމާދުކުރާނެ ދިވެހި ޙާފިޡުން ހޯދަން އިޢުލާނުކޮށްފި

އަންނަ ރަމަޟާން މަހު ރާއްޖޭގެ މިސްކިތްތަކުގައި އިމާމުވެ ތަރާވީޙު ނަމާދުކުރާނެ ދިވެހި ޙާފިޡުން ހޯދުމަށް އިސްލާމީ ކަންތައްތަކާ ބެހޭ ވުޒާރާއިން އިޢުލާނުކޮށްފިއެވެ. މި އިޢުލާނުގައި މާލެ އާއި ރަށްރަށުގެ މިސްކިތްތަކުގައި ތަރާވީޙު ނަމާދުކުރުމަށް އެދޭ ފަރާތްތަކުން ފޯމު ހުށަހެޅުމުގެ ސުންގަޑި ކަނޑައަޅާފައިވެއެވެ.

މާލޭގެ މިސްކިތްތަކުގައި އިމާމުވެ ތަރާވީޙު ނަމާދުކުރަން ބޭނުންވާ ދިވެހި ޙާފިޡުން، އަންނަ މަހުގެ 20 ވަނަ ދުވަހުގެ މެންދުރު 2:00 ގެ ކުރިން ފޯމު ހުށަހަޅަންޖެހޭނެއެވެ. އަދި ރަށްރަށުގެ މިސްކިތްތަކުގައި ހިފްޡުކޮށް ތަރާވީޙު ނަމާދުކުރަން އެދޭ ދިވެހި ޙާފިޡުން ޙާފިޡުން، އަންނަ ފެބްރުއަރީ މަހުގެ 6 ވަނަ ދުވަހުގެ މެންދުރު 2:00 ގެ ކުރިން ފޯމު ހުށަހަޅަންޖެހޭނެއެވެ.

މާލޭގައި ފޯމު ހުށަހަޅަންޖެހޭނީ އިސްލާމީ ކަންތައްތަކާ ބެހޭ ވުޒާރާގެ ކައުންޓަރަށެވެ. ރަށްރަށުގައި ނަމަ، އެ ރަށެއްގެ ނުވަތަ ސިޓީއެއްގެ ކައުންސިލަށް ފޯމު ހުށަހަޅަންޖެހޭނެއެވެ. ރަށު އަދި ސިޓީ ކައުންސިލްތަކަށް ހުށަހަޅާ ފޯމުތައް އަންނަ އަހަރުގެ ފެބްރުއަރީ މަހުގެ 16 ވަނަ ދުވަހުގެ ކުރިން އިސްލާމީ ކަންތައްތަކާ ބެހޭ ވުޒާރާއަށް ފޮނުވަންޖެހޭނެއެވެ.

ދިވެހި ޙާފިޡުންނަށް އެލަވަންސްގެ ގޮތުގައި ކޮންމެ ރެޔަކަށް 500 ރުފިޔާ ދޭގޮތަށް ހަމަޖެހިފައިވާއިރު، ކޮންމެ މިސްކިތަކަށް ގިނަވެގެން ދެ ޙާފިޡުންނަށް މި އެލަވަންސް ލިބޭނެއެވެ. އިސްލާމީ މަރުކަޒާއި ސަލްމާނު ރަސްގެފާނު މިސްކިތުގައި އިމާމުވެ ނަމާދުކުރައްވާ ޙާފިޡުންނަށް ކޮންމެ ރެޔަކަށް 700 ރުފިޔާގެ އެލަވަންސެއް ދޭގޮތަށް ވަނީ ހަމަޖެހިފައެވެ.