ސައުދީ ސަރުކާރުން ހަދިޔާކުރި 50 ޓަނުގެ ކަދުރު ރާއްޖެއަށް ލިބިއްޖެ

އިސްލާމީ ކަންތައްތަކާ ބެހޭ މިނިސްޓްރީން ހާމަކުރި ގޮތުގައި، ސައުދީ އަރަބިއްޔާ ސަރުކާރުން މިއަހަރުގެ ރަމަޟާން މަހަށް ހަދިޔާކުރި 50 ޓަނުގެ ކަދުރު ރާއްޖެއަށް ލިބިއްޖެއެވެ. މި މަޢުލޫމާތު ހާމަކުރެއްވީ އިސްލާމީ ކަންތައްތަކާ ބެހޭ ވަޒީރު، ރޭ ޝާއިޢުކުރެއްވި މެސެޖެއްގައެވެ.

ވަޒީރުގެ މެސެޖުގައި ވިދާޅުވެފައިވަނީ، މި ކަދުރު މިހާރު މިނިސްޓްރީއަށް ލިބިފައިވާ ކަމަށާއި، ރަމަޟާން މަސް ފެށުމުގެ ކުރިން މި ކަދުރު ބެހުމުގެ މަސައްކަތް ނިންމާލެވޭނެ ކަމަށެވެ. އަދި މިއަހަރު ކަދުރު ބެހުމުގައި އައު ބަދަލެއް ގެންނަވާ ކަމަށާއި، އެގޮތުން މިސްކިތްތަކުގައި ރޯދަ ވީއްލުމުގެ ޕްރޮގްރާމްތައް ހިންގަން ބޭނުންވާ ޖަމްޢިއްޔާތަކަށްވެސް ކަދުރުން ބައެއް ދެއްވާނެ ކަމަށް ވަޒީރު ވަނީ ހާމަކުރައްވާފައެވެ.

ފާހަގަކޮށްލެވޭ ކަމަކީ، ސައުދީ އަރަބިއްޔާ ސަރުކާރުން ކޮންމެ އަހަރަކުވެސް ރަމަޟާން މަހަށް ރާއްޖެއަށް ކަދުރު ހަދިޔާކުރައްވާ ކަމެވެ. މިއީ ދެ ޤައުމުގެ ދެމެދުގައި އޮތް ރަޙްމަތްތެރިކަމުގެ ގުޅުން ދަމަހައްޓާ، އިސްލާމީ އުޚުއްވަތްތެރިކަން ވަރުގަދަކުރުމަށް ކުރައްވާ މަސައްކަތުގެ ތެރެއިން ކުރައްވާ ކަމެކެވެ.