Ads by Exprox

ޚަބަރު / ވިޔަފާރި

އެމްޑަބްލިއުއެސްސީގެ ޢާމްދަނީ އިތުރުކުރުމަށް ވިޔަފާރި ފުޅާކުރަނީ

އެމްޑަބްލިއުއެސްސީގެ ޢާމްދަނީ އިތުރުކުރުމަށް ވިޔަފާރި ފުޅާކުރަނީ

އެމްޑަބްލިޔުއެސްސީ ފޮޓޯ:ޕީއެސްއެމް

އާމިނަތު ޔުމްނާ

އާމިނަތު ޔުމްނާ

05 ޖެނުއަރީ 2025، 11:57

05 ޖެނުއަރީ 2025، 11:57

އެމްޑަބްލިއުއެސްސީގެ ޢާމްދަނީ އިތުރުކުރުމަށް ކުންފުނީގެ ޚިދުމަތްތަކާއި ވިޔަފާރި ފުޅާކުރުމުގެ މަސައްކަތްކުރަމުންދާކަމަށް އެމްޑަބްލިއުއެސްސީގެ މެނޭޖިންގ ޑިރެކްޓަރ ޢަބްދުލްމަތީން މުޙައްމަދު ވިދާޅުވެއްޖެއެވެ.

ޕީއެސްއެމް ނިއުސްގެ ރާއްޖެމިއަދު ޕްރޮގްރާމްގައި ވާހަކަދައްކަވަމުން މަތީން ވިދާޅުވީ، އެކުންފުނިން މިހާރުކުރާ މަސައްކަތްތަކުގެ ރޭޝިއޯއަކީ 55 އިންސައްތަ ކުންފުނީގެ ޔޫޓިލިޓީގެ ޚިދުމަތްކަމަށާއި، ކުންފުނީގެ ވިޔަފާރި މަސައްކަތްތަކަކީ 45 އިންސައްތަކަމަށެވެ. އެހެންކަމުން މިހާރު އަމާޒަކީ މި ރޭޝިއޯ ބަދަލުކޮށް ޔޫޓިލިޓީގެ ޚިދުމަތަކީ ކުންފުނީގެ ޢާމްދަނީގެ 40 އިންސައްތައަށް ހަދާ، 60 އިންސައްތައަކީ ޢާމްދަނީ ލިބޭނެ އެހެން މަސައްކަތްތަކަށް ހެދުންކަމަށް އޭނާ ވިދާޅުވިއެވެ.

އެމްޑަބްލިއުއެސްސީގެ މައިގަނޑު މަސައްކަތަކީ ރައްޔިތުންނަށް ރައްކާތެރި ބޯފެން ފޯރުކޮށްދިނުން ކަމުގައިވީނަމަވެސް އެކުންފުނިން ދަނީ ވިޔަފާރީގެ އުސޫލުން ކުންފުނީގެ ޚަރަދު ހަމަޖެއްސުމުގެ މަސައްކަތް ކުރަމުންނެވެ. މީގެ އިތުރުން، ސަރުކާރުގެ ފެން ކުންފުނީގެ ހިންގުން ހަރުދަނާކޮށް ރައްޔިތުންނަށް ފެނުގެ ޚިދުމަތް އަގުހެޔޮކޮށް ފޯރުކޮށްދިނުމަށް އެމްޑަބްލިއުއެސްސީން އަންނަނީ މުހިއްމު މަސައްކަތްތަކެއް ކުރައްވަމުންނެވެ.

އެމްޑަބްލިއުއެސްސީގެ ޔޫޓިލިޓީ ޚިދުމަތްތަކުގެ ތެރޭގައި މައިގަނޑުގޮތެއްގައި ހިމެނެނީ މާލެ ސަރަޙައްދުގެ ފެނުގެ ޚިދުމަތްތައް ފޯރުކޮށްދިނުމެވެ. އަދި ރ. ދުވާފަރުގެ ފެނާއި ކަރަންޓާއި ނަރުދަމާގެ އިތުރުން ކުނި މެނޭޖްކުރުމުގެ މަސައްކަތްވެސް ކުރަމުންދަނީ އެމްޑަބްލިއުއެސްސީއިންނެވެ.

ޔޫޓިލިޓީގެ ބޭރުން ވިޔަފާރި އުސޫލުން އެކުންފުނިންދަނީ ސަރުކާރުން ރަށްރަށުގައި ޤާއިމުކުރާ ފެނާއި ނަރުދަމާގެ ޚިދުމަތް ޤާއިމުކުރުމުގެ އެކި މަޝްރޫޢުތައްވެސް ކުރިއަށްގެންދަމުންނެވެ. މިގޮތުން ނިމިދިޔަ 2024 ވަނަ އަހަރު 20 ރަށެއްގެ މަސައްކަތް ނިންމާލާފައިވާއިރު 2025 ވަނަ އަހަރު އިތުރު 20 ރަށެއްގެ މަސައްކަތް އެކުންފުނިން ފަށާފައިވާކަމަށް އެމްޑަބްލިއުއެސްސީން ވިދާޅުވެއެވެ. އަދި ބޯފެން، ފުޅީގައި ބަންދުކޮށް ވިއްކުމުގެ މަސައްކަތްވެސް އެކުންފުނިން ދަނީ ފުޅާދާއިރާއެއްގައި ކުރަމުންނެވެ.
                    

މި ލިޔުން ކިޔާލުމުން

Ads by MSS