ތަފާތު ސްޓޭޖަކުން މެސީއަށް ހާއްސަ އެވޯޑެއް ލިބިއްޖެ

ފުޓުބޯޅައިގެ އެވޯޑު ސްޓޭޖުތަކަށް ފަރިތަ އާޖެންޓީނާގެ ލިއޮނެލް މެސީއަށް، އެހެން ފަހަރުފަހަރާ ތަފާތު ސްޓޭޖަކުން ޙާއްސަ އެވޯޑެއް ލިބިއްޖެއެވެ. މެސީއަށް މި ފަހަރު ލިބުނީ، އެމެރިކާގެ ރައީސް ދެއްވާ، އެގައުމުގައި އާންމު ފަރުދުންނަށްދޭ އެންމެ މަތީ ޝަރަފު ކަމަށްވާ "ޕްރެޒިޑެންޝިއަލް މެޑަލް އޮފް ފްރީޑަމް'އެވެ.

މެސީގެ އިތުރުން، 18 ފަރާތަކުން ވަނީ މި ފަހަރު މި އެވޯޑު ހާސިލްކޮށްފައެވެ. އޭގެ ތެރޭގައި އެމެރިކާގެ ކުރީގެ ސެކްރެޓަރީ އޮފް ސްޓޭޓް ހިލަރީ ކްލިންޓަން އާއި، ހޮލީވުޑްގެ އެކްޓަރު ޑެންޒެލް ވޮޝިންޓަން އާއި، އެޓާނީ ޖެނެރަލް ރޮބަޓް ފްރަންސިސް ކެނެޑީ އަދި ވޯގް މަޖައްލާގެ އެޑިޓަރު އަނާ ވިންޓޯ ހިމެނެއެވެ.

އެމެރިކާގެ އިންޓަ މިއާމީއަށް ކުޅެމުން އަންނަ މެސީއަކީ މި އެވޯޑު ހާސިލްކުރި ފުރަތަމަ ފިރިހެން ފުޓުބޯޅަ ކުޅުންތެރިޔާއެވެ. ނަމަވެސް މި ހާއްސަ ރަސްމިއްޔާތުގައި މެސީ ބައިވެރިވެފައެއް ނުވެއެވެ. 

މިކަން އެންގުމުގެ ގޮތުން އޭނާ ވައިޓް ހައުސްއަށް ފޮނުވި ސީޓިގައި ބުނެފައިވަނީ، މި މެޑަލް ލިބުމަކީ އޭނާއަށް ލިބުނު ވަރަށް ބޮޑު ޝަރަފެއް ކަމުގައެވެ. ނަމަވެސް ޝެޑިއުލް ރޭވިފައިވާ ގޮތުން މެޑަލްއާ ހަވާލުވުމަށް ވައިޓް ހައުސްއަށް ހާޒިރުވުމަށް އުޒުރުވެރިވާ ކަމަށާއި، ކުރިޔަށް އޮތް ދުވަސްތަކުގައި އެމެރިކާގެ ރައީސްއާ ބައްދަލުވާނެކަމަށް އުއްމީދުކުރާ ކަމަށް ވެސް ބުނެފައިވެއެވެ.

ލިއޯ މެސީ ފައުންޑޭޝަންގެ ނަމުގައި މެސީއަކީ ސިއްހީ ދާއިރާއިންނާއި ތައުލީމީ ދާއިރާއިން ދުނިޔޭގެ އެކި ހިސާބުތަކުގައި ތަފާތު ޕްރޮގްރާމްތައް ހިންގަމުން އަންނަ ފަރާތެކެވެ. އަދި އޭނާއަކީ ޔުނިސެފްގެ އެމްބެސެޑަރއެއް ވެސް މެއެވެ.

އެމެރިކާގެ ރައީސް ދެމުން އަންނަ "ޕްރެޒިޑެންޝިއަލް މެޑަލް އޮފް ފްރީޑަމް' އަކީ އެމެރިކާގެ ފާގަތިކަމާއި، އަސާސްތަކާއި، ސަލާމަތާއި، ރައްކާތެރިކަމާއި، ދުނިޔޭގެ ސުލްހަ އަށް ނުވަތަ އެނޫންވެސް މުހިންމު އިޖުތިމާއީ، އާއްމު ނުވަތަ އަމިއްލަ މަސައްކަތްތަކުގައި ނަމޫނާ ހިދުމަތްތަކެއް ކޮށްދީފައިވާ ނުވަތަ ކޮށްދެމުން އަންނަ ފަރާތްތަކަށް ދެމުން އަންނަ މެޑެއްޔެކެވެ. 

މެސީގެ އިތުރުން މި މެޑަލް ލިބިފައިވާ ކުޅިވަރު ޝަހުސިއްޔަތުންގެ ތެރޭގައި ގޮލްފް ލެޖެންޑް ޓައިގާ ވުޑްސް، ބާސްކެޓްބޯޅަ ލެޖެންޑް މައިކަލް ޖޯޑަން އަދި ބޮކްސިން ލެޖެންޑް މުހައްމަދު އަލީ ހިމެނެއެވެ.