ހަށިވިއްކުމުގެ ވިޔަފާރިކުރަމުންދިޔަ 7 ބިދޭސީން ހައްޔަރުކޮށް ޑިޕޯޓުކުރަނީ

ރާއްޖޭގައި ފުޅާ ދާއިރާއެއްގައި ހަށިވިއްކުމުގެ ވިޔަފާރިކުރަމުންދިޔަ 7 ބިދޭސީން ހައްޔަރުކޮށްފައިވާ ކަމަށް މޯލްޑިވްސް އިމިގްރޭޝަނުން މިއަދު ހާމަކޮށްފިއެވެ.

އިމިގްރޭޝަނުން ބުނި ގޮތުގައި މި ޚާއްޞަ އޮޕަރޭޝަން ހިންގާފައިވަނީ ދިވެހި ފުލުހުންގެ ޚިދުމަތާ ގުޅިގެންނެވެ. މި އޮޕަރޭޝަނުގައި ހައްޔަރުކުރެވުނު މީހުންގެ ތެރޭގައި ހިމެނެނީ 4 އަންހެނުންނާއި 3 ފިރިހެނުންނެވެ.

އިމިގްރޭޝަނުން އިތުރަށް ބުނި ގޮތުގައި މި މައްސަލަ ތަޙުޤީޤުކުރުމަށްފަހު، މިހާތަނަށް 2 އަންހެނުން ވަނީ ރާއްޖެއިން ޑިޕޯޓުކޮށްފައެވެ. އަދި ބާކީ ތިބި 5 ބިދޭސީން ޑިޕޯޓުކުރުމުގެ މަސައްކަތް މިހާރުދަނީ ކުރިއަށެވެ.

މި ހާދިސާއާ ގުޅިގެން، ދާދި ފަހުން އިމިގްރޭޝަނުން ވަނީ ހަށިވިއްކުމުގެ ވިޔަފާރީގައި އުޅުނު އިތުރު 3 ބިދޭސީން ޑިޕޯޓުކޮށްފައިވާކަން ފާހަގަކޮށްލެވެއެވެ.

ދާޚިލީ ވުޒާރާ، މޯލްޑިވްސް އިމިގްރޭޝަން އަދި ދިވެހި ފުލުހުންގެ ޚިދުމަތް ގުޅިގެން، ގަވާއިދާ ޚިލާފަށް ރާއްޖޭގައި އުޅެމުންދާ އަދި ވިޔަފާރިކުރަމުންދާ ބިދޭސީން ދެނެގަތުމުގެ މަސައްކަތް ދަނީ ކުރިއަށެވެ. މިހާތަނަށް 5000 އަށްވުރެ ގިނަ ބިދޭސީން ވަނީ އެމީހުންގެ އަމިއްލަ ޤައުމުތަކަށް ފޮނުވާލާފައެވެ.

އިމިގްރޭޝަނުން އިތުރަށް ހާމަކުރި ގޮތުގައި، ޤަވާއިދާ ޚިލާފަށް އުޅޭ ބިދޭސީންނާ ގުޅޭ މައްސަލަތައް ހުށަހެޅުމަށް "އިމިގްރޭޝަން ވޮޗް" ގެ ނަމުގައި އޮންލައިން ޕްލެޓްފޯމެއް ވަނީ ޤާއިމްކޮށްފައެވެ. މި ޕްލެޓްފޯމަށް މިހާތަނަށް 1000 އަށްވުރެ ގިނަ މައްސަލަ ހުށަހަޅާފައިވެއެވެ.

މީގެއިތުރުން، ބިދޭސީންގެ މަޢުލޫމާތު އެއްކުރުމަށް "އޮޕަރޭޝަން ކުރަނގި" ގެ ނަމުގައި ޚާއްޞަ ހަރަކާތެއް ދަނީ ކުރިއަށެވެ. މި ހަރަކާތުގެ ދަށުން މިހާތަނަށް 18,919 ބިދޭސީންގެ ބަޔޯމެޓްރިކް މަޢުލޫމާތު އެއްކުރެވި، ރާއްޖޭގެ 194 ރަށެއްގައި މި މަސައްކަތް ވަނީ ފެށިފައެވެ.