ދުނިޔޭގެ އެންމެ މުސްކުޅި މީހާ އުމުރުން 116 އަހަރުގައި މަރުވެއްޖެ

ދުނިޔޭގައި ހުރި އެންމެ މުސްކުޅި މީހާގެ ގޮތުގައި ޖިނަސް ވާރލްޑް ރެކޯޑްސް އިން ކަނޑައަޅާފައި ހުރި ޖަޕާނުގެ ޓޮމީކޯ އިޓޫކާ، އުމުރުން 116 އަހަރުގައި މަރުވެއްޖެއެވެ.

ރިޕޯޓުތައް ބުނާގޮތުން އިޓޫކާ މަރުވެފައިވަނީ ޑިސެމްބަރު 29ވަނަ ދުވަހު، ޖަޕާނުގެ މުސްކުޅިން ބަލަހައްޓާ ސެންޓަރެއް ކަމުގައިވާ، ޔޯގޯ ޕްރީފެކްޗާރގައި ދިރިއުޅެމުން ދަނިކޮށެވެ. 

ދޮންކޭލާއި، ޔޫގަޓް ރަހަލާ ޖަޕާނުގެ ބުއިމެއް ކަމުގައިވާ ކެލްޕިސްއަށް ލޯބިކުރާ އިޓޫކާ އުފަންވެފައިވަނީ 23 މެއި 1908 ގައެވެ. 

ގެރޮންޓޮލޮޖީ ރިސާޗް ގްރޫޕުން ހާމަކުރާ ގޮތުގައި، އިޓޫކާއަކީ ދުނިޔޭގައި ހުރި އެންމެ ދުވަސްވީ މީހާގެ ގޮތުގައި ކަނޑައެޅީ، 117 އަހަރުގެ މާރިއާ ބެންޔަސް މިދިޔަ އަހަރު މަރުވުމާ ގުޅިގެންނެވެ.

މިދިޔަ އަހަރު އިޓޫކާ ފާހަގަކުރި އޭނާގެ 116 ވަނަ އުފަންދުވަހުގައި، ގިނަ މާބޮނޑިތަކެއްގެ އިތުރުން، އޭނާއަށް ވަނީ މޭޔަރުގެ ތަހުނިޔާ ކާޑެއް ވެސް ލިބިފައެވެ.

ޖަޕާނުގެ އޮސާކާއަށް އުފަން އިޓޫކާއަކީ ހައިސްކޫލުގައި ވޮލީ ބޯޅަ ކުޅުންތެރިއެކެވެ. އަދި އޭނާ ވަނީ، އުސްމިނުގައި 10،000 ފޫޓަށް ވުރެން ދިގު ފަރުބަދައެއް ކަމުގައިވާ، މައުންޓް އޮންޓޭކްއަށް ދެފަހަރު އަރާފައެވެ.

ޖިނަސްއިން ހާމަކޮށްފައިވާ ގޮތުގައި އިޓޫކާ ކައިވެނިކުރީ އުމުރުން 20 އަހަރުގައެވެ. އަދި އޭނާއަށް ދެ ފިރިހެން ކުދިންނާއި ދެ އަންހެން ކުދިން ލިބިފައި ވެއެވެ. މި ތަނުން މިހާރު ދުނިޔޭގައި ތިބީ އެއް ފިރިހެން ކުއްޖަކާއި އެއް އަންހެން ކުއްޖެއްގެ އިތުރުން، ފަސް މާމަ ދަރިންނެވެ.

އިޓޫކާގެ ފިރިމީހާއަކީ ހެދުން އުފައްދާ ކާރުހާނާއެއް ހިންގި މީހެއް ކަމުން، ދެވަނަ ބޮޑު ހަނޑުރާމައިގެ ދުވަސްވަރު އޭނާ މަސައްކަތްކޮށްފައިވަނީ އެ ކާރުހާނާގެ އޮފީހުގައެވެ. އަދި 1979 ގައި ފިރިމީހާ މަރުވުމުން ދެން ދިރިއުޅެފައިވަނީ ނާރާ ކިޔާ ހިސާބެއްގައި، އެކަންޏެވެ.

ގެރޮންޓޮލޮޖީ ރިސާޗް ގްރޫޕުން ހާމަކޮށްފައިވާ ގޮތުގައި، އިޓޫކާ މަރުވުމާ ގުޅިގެން މިހާރު ދުނިޔޭގައި ހުރި އެންމެ ދުވަސްވީ ފަރާތަކީ ބްރެޒިލްގެ އިނާ ކަނަބާރޯ ލޫކަސްއެވެ. އޭނާ އުފަންވެފައި ވަނީ އިޓޫކާ ވިހެއިތާ 16 ދުވަސް ފަހުންނެވެ.