ކުޅިވަރު / ދުނިޔެ
ފުލުހުންނާ ހިނގި ކުރިމަތިލުމަކަށްފަހު އެމެރިކާގެ އޮލިމްޕިކް މެޑަލިސްޓް، ފްރެޑް ކާރލީ ހައްޔަރުކޮށްފި

ފްރެދް ކާރލީ ވަނީ ޕެރިސް އޮލިމްޕިކްސްގައި މީޓަރު ބްރދޯުވުމުން ންޒް މެޑަލް ހޯދާފައި
ހުލާސާ
ކާރލީއާ ދެކޮޅަށް ފުލުހުން އުފުލާ ދައުވާއަކީ އެހެން މީހުންނަށް އަނިޔާވެރިވުމާއި، ފުލުހުންގެ އަމުރަށް ނުކިޔަމަންތެރިވުމާއި އަދި އޭނާގެ ބޭއަދަބީ އަމަލު.
މައްސަލަ ހޫނުވީ، ޕޮލިހުންގެ ބަހަށް ކާރލީ އިޖާބަ ނުދިނުމުންކަމަށް މިއާމީ ބީޗް ޕޮލިސް ޑިޕާޓްމެންޓުން ބުނޭ.
އެމެރިކާގެ މިއާމީ ބީޗްގައި ފުލުހުންނާ ހިނގި ކުރިމަތިލުމަކަށްފަހު، ޕެރިސް އޮލިމްޕިކްސްގައި 100 މީޓަރު ދުވުމުން ބްރޯންޒް މެޑަލް ހޯދާފައިވާ ފްރެޑް ކާރލީ ހައްޔަރުކޮށްފިއެވެ. އޭނާ ހައްޔަރު ކުރުމުގައި ފުލުހުންވަނީ ސްޓަން-ގަން ވެސް ބޭނުންކޮށްފައެވެ.
ބުރާސްފަތި ދުވަހުގެރޭ ހިނގި މި ހާދިސާއާ ގުޅިގެން، އެހެން މީހުންނަށް އަނިޔާވެރިވުމާއި، ފުލުހުންގެ އަމުރަށް ނުކިޔަމަންތެރިވުމާއި އަދި އޭނާގެ ބޭއަދަބީ އަމަލާ ދެކޮޅަށް ދައުވާ ކުރާނެކަމަށް ފުލުހުން ހާމަކޮށްފައިވެއެވެ.
ފުލުހުން ވަނީ މި ހާދިސާއާ ގުޅޭ ބޮޑީ ކެމެރާ ފުޓޭޖު ވެސް މިހާރު އާންމުކޮށްފައެވެ. އެ ފުޓޭޖުން ފެންނަ ގޮތުން، ކާރލީ ފުލުހުންނާ ދިމާލަށް އައުމުން ފުލުހުންގެ އޮފިސަރަކު ވަނީ އޭނާ ހުއްޓުވަން މަސައްކަތްކޮށްފައެވެ. އެގޮތުން ކާރލީގެ މޭ މަތީގައި އަތް އެޅުމަށްފަހު އޭނާ ކޮށްޕާލުމަށް ފުލުސް މީހާ މަސައްކަތް ކޮށްފައިވެއެވެ.
ނަމަވެސް ކާރލީ ވަނީ ފުލުސްމީހާގެ އަތް ފޮޅާލާފައެވެ. އަދި ދެ ފަރާތުގެ ދެމެދުގައި ކުރިމަތިލުންތަކެއް ހިނގާފައިވަނީ އެއަށްފަހުއެވެ.
ކުރިމަތިލުމުގައި ކާރލީ ވެއްޓުމުން ފުލުހަކު އޭނާގެ ގައިގައި އެއް ފަހަރަށް ވުރެން ގިނަ ފަހަރު ޖަހާފައި ވެސް ވެއެވެ. އަދި އެއަށްފަހު އޭނާ މައިތިރި ކުރުމުގެ ގޮތުން ދެން ބޭނުންކޮށްފައިވަނީ ސްޓަން-ގަންއެވެ.
ކާރލީގެ ދިފާއީ ވަކީލު ބުނެފައިވަނީ، އެ ވީޑިއޯގައި ފެންނަގޮތުން، ކާރލީއާ ދޭތެރޭ ޕޮލިހުން އަމަލުކޮށްފައިވަނީ ވަރަށް އިހާނެތިކޮށެވެ.
އަދި ގައުމަށް ކިތަންމެ ގިނަ މެޑަލްއަކާއި ރީތި ނަމެއް ހޯދައިދީފައިވާ މީހެއް ވިޔަސް، ކާރލީއާއި ދޭތެރޭ ޕޮލިހުން އަމަލުކޮށްފައިވަނީ އެފްރިކާ ދަރިފަސްކޮޅަށް ނިސްބަތްވާ އެމެރިކާ މީހުންނާ ދޭތެރޭގައި އަމަލުކުރާ އާންމު އުސޫލުން ކަމަށެވެ. އިންސާނިއްޔަތާއި ހަމްދަރުދީގެ ކަންފުޅެއް ވެސް ޕޮލިހުންގެ ފުށުން ނުފެންނަ ކަމަށް އޭނާ ބުނެފައި ވެއެވެ.
މިއާމީ ބީޗް ޕޮލިސް ޑިޕާޓްމެންޓުން ބުނެފައިވާ ގޮތުގައި، ޕޮލިހުންނާއި ދިމާލަށް ކާރލީ އައި ވަގުތަކީ، ޕާކު ކުރުން މަނާ ތަނެއްގައި އޭނާގެ ކާރު ޕާކުކޮށްފައި އޮތުމާ ގުޅިގެން އެކަމާ ގުޅޭ ކަންތައްތަކެއް ބަލަމުން ދިޔަ ވަގުތެކެވެ. އަދި މައްސަލަ ހޫނުވީ، ޕޮލިހުންގެ ބަހަށް ކާރލީ އިޖާބަ ނުދިނުމުންކަމަށް ވެސް، އެ ޑިޕާޓްމެންޓުން ހާމަކޮށްފައިވެއެވެ.
ކާރލީ ހައްޔަރު ކުރުމަށްފަހު ޓާރނާ ގިލްފޯޑް ނައިޓް ކަރެކްޝަނަލް ސެންޓަރަށް ގެންދިއުމުގެ ކުރިން އޭނާ ވަނީ ހޮސްޕިޓަލަށް ގެންގޮސްފައެވެ. އަދި ހުކުރު ދުވަހު މިއާމީ-ޑޭޑް ކަންޓްރީ ކޯޓަށް ހާޒިރުކުރުމުން، އޭނާގެ ދިފާއީ ވަކީލު ވަނީ ފުލުހުންނަށް ވަރަށް ބޮޑަށް ފާޑުކިޔާފައެވެ.
އެހެން މައްސަލައަކާ ގުޅިގެން އޭނާ ވަނީ ހޮނިހިރު ދުވަހު ވެސް ކޯޓަށް ހާޒިރުކޮށްފައެވެ. އެއީ މެއި 2024 ގައި އޭނާގެ އަންހެނުންގެ ކަރުގައި އަތް ވަށާލައިގެން ނޭވައި ހާސްކޮށްލި މައްސަލައެއްގަ އާއި، އަންހެނުންގެ ފޯނު އޭނާގެ ހުއްދައާ ނުލައި ގެންދިޔަ މައްސަލައަކާ ގުޅިގެންނެވެ.