މާލޭގައި ހިންގި އޮޕަރޭޝަނެއްގައި 43 ފުޅި ބަނގުރަލާއެކު މީހަކު ހައްޔަރުކޮށްފި

މާލޭގައި ފުލުހުން ހިންގި އޮޕަރޭޝަނެއްގައި ގިނަ އަދަދެއްގެ ބަނގުރަލާއެކު މީހަކު ހައްޔަރުކޮށްފިއެވެ. މި އޮޕަރޭޝަނަކީ ގަވާއިދާ ޚިލާފަށް ބަނގުރާ ގެންގުޅެ، އެތަކެތީގެ ވިޔަފާރިކޮށް އަދި ބޭނުންކުރާކަމަށް ލިބުނު މަޢުލޫމާތަކާ ގުޅިގެން ކުރިއަށް ގެންދެވުނު އޮޕަރޭޝަނެކެވެ.

ފުލުހުންގެ ޑްރަގް އެންޑް ނާކޮޓިކްސް އިންޓެލިޖެންސަށް ލިބުނު މަޢުލޫމާތަކާ ގުޅިގެން ރޭ ހިންގުނު މި އޮޕަރޭޝަނުގައި ހައްޔަރުކޮށްފައިވަނީ ރ. މަޑުއްވަރި / އުފުލަންދޫގެ، ޢަލީ ޙާޒިމް (22އ) އެވެ. އޭނާ ދުއްވަމުންދިޔަ ކާރު ހުއްޓުވައި ބަލައި ފާސްކުރުމުން، އެކި ބްރޭންޑްތަކުގެ ޖުމްލަ 43 ފުޅި ބަނގުރާ ފެނިފައިވެއެވެ.

މި މައްސަލައާ ގުޅިގެން ޢަލީ ޙާޒިމްގެ ބަންދާމެދު ގޮތެއް ނިންމުމަށް ކޯޓަށް ހާޒިރުކުރުމުން، 10 ދުވަހުގެ ބަންދުގެ މުއްދަތެއް ދީފައިވެއެވެ. އަދި އޭނާ ދުއްވަމުންދިޔަ ކާރުވެސް ވަނީ ޓޯވކޮށްފައެވެ.

ފުލުހުންގެ ފަރާތުން މި މައްސަލައިގެ ތަޙުޤީޤު މިހާރު ކުރިއަށް ދާކަމަށް ބުނެފައިވެއެވެ.