ޚަބަރު
ގުޅީގެ ރައްޔިތުންގެ އުންމީދުތަކުގައި ޙަޤީޤީ ކުލަޖައްސަވައިދެއްވާނޭކަމުގެ ޔަޤީންކަން ރައީސުލްޖުމްހޫރިއްޔާ ދެއްވައިފި

ކ. ގުޅީގެ ރައްޔިތުންނާ ރައީސުލްޖުމްހުރިއްޔާ ބައްދަލު ކުރައްވަނީ، ފޮޓޯ: ރައީސް އޮފީސް

ފަރުދުން
05 ޖެނުއަރީ 2025، 09:03
05 ޖެނުއަރީ 2025، 09:03
ހުލާސާ
ގުޅީގެ ބިން ހިއްކުމުގެ މަޝްރޫޢުއާއި ބަަނދަރުގެ މަސައްކަތާއި ބަނދަރުގެ ނެރުފައިކަށީގެ މައްސަލައާއި ލޯކަލް ޓޫރިޒަމަށް ދޫކޮށްފައިވާ ބިމުގެ މައްސަލައަށް ހައްލެއް ހޯއްދަވާނެކަމަށް ރައީސުލްޖުމްހޫރިއްޔާ ވިދާޅުވި.
މާލެ އަތޮޅު ގުޅީގެ ރައްޔިތުންގެ އުއްމީދުތަކުގައި ހަޤީޤީ ކުލަޖައްސައިދެއްވާނޭކަމުގެ ޔަޤީންކަން ރައީސުލްޖުމްހޫރިއްޔާ ޑޮކްޓަރ މުޙައްމަދު މުޢިއްޒު ދެއްވައިފިއެވެ. ރައީސުލްޖުމްހޫރިއްޔާ މި ޔަޤީންކަން ދެއްވީ، ގުޅިއަށް މިހާރު ކުރައްވަމުން ގެންދަވާ ދަތުރުފުޅުގައި އެ ރަށު ރައްޔިތުންނާ ބައްދަލުކުރައްވައި ވާހަކަފުޅު ދައްކަވަމުންނެވެ.
އެގޮތުން އެ ރަށު ބިންހިއްކުމުގެ މަޝްރޫއު ކުރިޔަށް ގެންގޮސް، ބަންޑް ވޯލް ޖަހައި، ފަސްއަޅައި ނިމިގެން ނޫނީ، އެ މަޝްރޫޢު ދެން ނުހުއްޓޭނެ ކަމުގައި ރައީސުލްޖުމްހޫރިއްޔާ ވިދާޅުވެފައިވެއެވެ.
އަދި ނިމިދިޔަ ދައުރުގެ ފަހުކޮޅުގައި، އެކަން ކުރުމަށް އެއްބަސްވުމެއްގައި ސޮއިކުރި ނަމަވެސް، އެ މައްސަލައަށް ޢަމަލީ ސިފައެއް ގެނެވޭނޭ ފަދަ ބަޖެޓެއް ފަހިކޮށްދީފައި ނުވާކަން ރައީސުލްޖުމްހޫރިއްޔާ ފާހަގަކުރައްވާފައި ވެއެވެ. ނަމަވެސް އެމްޓީސީސީއާއެކު މިހާރު މި މަސައްކަތް ފަށާ، ކުރިޔަށް ގެންގޮސް، ކައުންސިލުން ބައްޓަންކޮށްފައިވާގޮތަށް، އިތުރު ބަދަލެއް ނުގެނެސް ބިންހިއްކުން ކުރިޔަށް ގެންދަވާނެކަމަށް އެމަނިކުފާނު ވަނީ ވިދާޅުވިއެވެ.
ގުޅިއަކީ ފަތުރުވެރިކަމުގެ ވިޔަފާރީގައި ކުރިއަރާފައިވާ، އަދި ރަށަށް އަރައި ފައިބާ މީހުންގެ އަދަދު ކޮންމެ ދުވަހަކު ވެސް ގިނަ ރަށަކަށް ވެފައި ވިޔަސް، އެ ރަށުގެ ބަނދަރުގެ ޖާގައިގެ ދަތިކަން އިންތިހާއަށް އޮވެއެވެ. އެހެންކަމުން މި މައްސަލަ ހައްލުކުރުމުގައި، ރަށަށް ފައިދާ ބޮޑުވާނޭ އަދި އިޤްތިޞާދީ ނަފާ ބޮޑުވާނޭ ގޮތަށް އިސްކަންދެއްވައިގެން، ރަށު ކައުންސިލާއި، ކޮންސްޓްރަކްޝަން މިނިސްޓްރީން މަޝްވަރާކުރައްވައި، އެ މަސައްކަތް ކުރިޔަށް ގެންދެވާނެކަމަށް ރައީސުލްޖުމްހޫރިއްޔާ ވަނީ ވިދާޅުވެފައެވެ.
މީގެ އިތުރުން، ބަނދަރުގެ ނެރުފައިކަށީގެ މައްސަލައިގައި، މިހާރު ކުރަމުންދާ މަސައްކަތްތަކުގެ ތެރެއިން ޙައްލެއް ހޯދެން އޮތްތޯ ބެއްލެވުމަށް ފަންނީ ލަފާއަށް އެދިވަޑައިގެން، އެ ފަދަ ޙައްލެއް އޮތްނަމަ، ޙައްލު ހޯއްދަވައިދެއްވާނޭކަމުގެ ޔަޤީންކަންވެސް އެމަނިކުފާނު ވަނީ ދެއްވާފައެވެ.
އަދި ބިމުގެ ދަތިކަމާއެކު، ބަނދަރުގެ ދަތިކަން ނައްތާލުމަކީ ގުޅީގެ ތަރައްޤީއާ ގުޅިފައިވާ ކަމެއްކަމަށް ރައީސުލްޖުމްހޫރިއްޔާ ވަނީ ފާހަގަ ކުރައްވާފައެވެ.
ހަމައެއާއެކު، ލޯކަލް ޓޫރިޒަމަށް ދޫކޮށްފައިވާ ބިމާ ގުޅިގެން ކުރިމަތިވެފައިވާ މައްސަލަތަކަށް ހައްލު ހޯއްދަވާނެކަމަށް ވެސް ރައީސުލްޖުމްހޫރިއްޔާ ވިދާޅުވިއެވެ.
އެގޮތުން އެޓަރނީ ޖެނެރަލާއި ފަތުރުވެރިކަމުގެ ވުޒާރާ އާއި ރަށު ކައުންސިލުން މި މައްސަލަ ދިރާސާކޮށް، ރަށަށް އެންމެ ފައިދާވާނޭ ގޮތަކީ އެ އެއްބަސްވުން ނިމުމަކަށް ގެނައުންކަމުގައި ނިންމަވައިފިނަމަ، އެކަން އެގޮތަށް ކުރުމަށް މަގުފަހިކޮށްދެއްވާނޭ ކަމަށްވެސް ރައީސުލްޖުމްހޫރިއްޔާ ވަނީ ވިދާޅުވެފައެވެ.
މީގެ އިތުރުން، އެ ރަށުގެ ތައުލީމީ ދާއިރާއާއި ގުޅުންހުރި މަސައްކަތްތަކާއި، ސިއްޙީ ދާޢިރާގެ ޤާބިލުކަން އިތުރުކުރެއްވުމަށް މި އަހަރު އަހައްމިއްޔަތުކަން ދެއްވާނެކަމަށް ރައީސުލްޖުމްހޫރިއްޔާ ވަނީ ވިދާޅުވެފައެވެ.
އަދި އެ ރަށަށް ކުރިމަތިވެފައިވާ މިސްކިތުގެ ޖާގައިގެ މައްސަލައާއި ކުނި މެނޭޖުކުރުމުގެ މައްސަލައަށްވެސް ޙައްލެއް ހޯއްދަވައިދެއްވާނޭކަމުގެ ޔަޤީންކަން ރައީސުލްޖުމްހޫރިއްޔާ މިއަދު ދެއްވެވިއެވެ.