އެޗްޑީސީއަށް ޑެޕިއުޓީ މެނޭޖިން ޑިރެކްޓަރަކު އައްޔަނުކޮށްފި

ހުޅުމާލެ ޑިވެލޮޕްމެންޓް ކޯޕަރޭޝަން (އެޗްޑީސީ)އަށް ޑެޕިއުޓީ މެނޭޖިން ޑިރެކްޓަރަކު އައްޔަނުކޮށްފިއެވެ. އެ މަގާމަށް އައްޔަންކޮށްފައި ވަނީ ފަޔާޒު މަންސޫރުއެވެ.

މީގެ ކުރިން ވެސް ފަޔާޒު އެޗްޑީސީގައި ޚިދުމަތްކުރައްވާފައި ވެއެވެ. ހުޅުމާލޭގައި އެންމެ ފުރަތަމަ ބިން ހިއްކުމުގެ މަސައްކަތްކުރިއިރު، މީގެ ވިއްސަކަށް އަހަރު ކުރިން އޭނާ އޭރު މަސައްކަތް ކުރެއްވީ ޑެޕިއުޓީ ޑިރެކްޓަރެއްގެ މަޤާމުގައެވެ. 

ފަޔާޒު މި މަޤާމަށް އައްޔަނު ކުރުމުގެ ކުރިން، އެ ކުންފުނީގެ މެނޭޖިންގް ޑިރެކްޓަރުގެ މަޤާމުގައި ހުންނެވި ފަޒުލް ރަޝީދުގެ މައްޗަށް ކޮރަޕްޝަންގެ ތުހުމަތު ކުރެވިގެން އެބޭފުޅާ ސަސްޕެންޑުކޮށްފައި ހުއްޓައި ވަނީ މަޤާމުން އިސްތިއުފާ ދެއްވާފައެވެ. އަދި އޭގެ ފަހުން، މުޙައްމަދު މައުރޫފް ޖަމީލް ވަނީ އެ މަޤާމަށް އައްޔަންކޮށްފައެވެ.

ފަޔާޒުގެ ލިންކްޑްއިން ޕްރޮފައިލް ބުނާ ގޮތުން، އޭނާ ވަނީ އޮސްޓްރޭލިއާގެ ކުއީސްލޭންޑް ޔުނިވާސިޓީ އޮފް ޓެކްނޮލޮޖީން ކުއަންޓިޓީ ސާވޭއިން ބެޗްލާސް އޮފް އާޓްސް އެންޑް ސައިންސަސް ހާސިލް ކުރައްވާފައެވެ. އަދި އެއަށްފަހު ނިއު ޒިލެންޑްގެ ވިކްޓޯރިއާ ޔުނިވާސިޓީ އޮފް ވެލިންގްޓަން އިން ބިލްޑިން ސައިންސް އިން އެބޭފުޅާ ވަނީ މާސްޓާސް ޑިގްރީ ވެސް ހާސިލުކުރައްވާފައެވެ.