ފުލުހުން ބަލާފާސްކުރަނިކޮށް އެޗްޑީސީގެ ކުރީގެ އެމްޑީގެ ގެއިން 1.4 މިލިއަން ނަގުދު ފައިސާ ފެނިއްޖެ

މަގާމުގެ ނުފޫޒު ބޭނުންކޮށްގެން، އެއްބަނޑު އެއްބަފާ ބޭބެ ހިމެނޭހެން، ބިންވެރިޔާ ސްކީމްގެ ތެރެއިން ޝަރުތު ހަމަނުވާ ބަޔަކަށް ހުޅުމާލެ އިން ބިންތަކެއް ދޫކޮށްފައިވާ މައްސަލައިގެ ތަހުގީގެއް ފަށާފައިވާތީ، މިނިވަން ތަހުގީގަކަށް ފުރުސަތު ދިނުމުގެ ގޮތުން ކަމަށް ވިދާޅުވެ މަގާމުން އިސްތިއުފާ ދެއްވާފައިވާ، ހުޅުމާލޭ ޑިވެލޮޕްމެންޓް ކޯޕަރޭޝަން (އެޗްޑީސީ)ގެ ކުރީގެ މެނޭޖިންގ ޑިރެކްޓަރ، ފަޒުލް ރަޝީދުގެ ގެ ފުލުހުން ބަލާފާސްކުރުމުގެ ތެރޭގައި އެ ގެއިން 1.4 މިލިއަން ނަގުތު ފައިސާ ފެނިފައިވާކަމަށް، މިހާރު ނޫހުން ރިޕޯޓުކޮށްފިއެވެ. 

ފަޒުލްގެ ގެ ފުލުހުން ބަލާފާސްކޮށްފައިވާކަމަށް މައުލޫމާތު ލިބިފައިވަނީ މިދިޔަ މަހުގެ 23 ވަނަ ދުވަހު، ކޯޓު އަމުރެއްގެ ދަށުންނެވެ. 

މި ފައިސާ ފުލުހުންނަށް ފެނިފައިވަނީ އެ ގޭގެ ތެރޭގައި އޮތް ދަބަބަހަކުންކަމަށް މައުލޫމާތު ލިބެއެވެ. މި ކަމުގެ މައުލޫމާތު ފުލުހުން އަދި މީޑިއާތަކަށް ހިއްސާކޮށްފައެއް ނުވެއެވެ. 

ނަމަވެސް އެ ގެ ބަލާފާސްކޮށް، އެ ގެއިން ތަހުގީގަށް ބޭނުންވާ ބައެއް ތަކެތި ގެންގޮސްފައިވާކަމަށް ފުލުހުން ކުރިން ހާމަކޮށްފައިވެއެވެ. އޭގެ ތެރޭގައި އިލޯކްޓްރޯނިކް ސާމާނު ހިމެނޭކަމަށް ބުނެފައިވެއެވެ.

ފަޒުލްގެ މައްޗަށް ކުރެވުނު ތުހުމަތުތަކާ ގުޅިގެން އޭނާ ސަސްޕެންޑުކޮށްފައި ވަނިކޮށް އިސްތިއުފާދެއްވިއިރު، ފުލުހުން ވަނީ އޭނާގެ ފުރުން މަނާކޮށް ޕާސްޕޯޓު ވެސް ހިފަހައްޓާފައެވެ. 

މި މައްސަލައާ ގުޅިގެން ފަޒުލްގެ އެއްބަނޑު އެއްބަފާ ބޭބެ، އެމްޑަބްލިއުއެސްސީގެ ކުރީގެ ޑެޕިއުޓީ މެނޭޖިން ޑިރެކްޓަރު މުހައްމަދު ފަަޒީލް ވެސް ވަނީ މަގާމުން ވަކިކޮށްފައެވެ.